ខេត្តកំពត៖ថ្មីៗនេះលេចធ្លាយរឿងក្អួតឈាមមួយសម្រាប់សកម្មជនគណបក្សប្រជាជននៅខេត្តកំពតដែលខ្មែរយើងតែងហៅថាអ្នកឡើងបានតែបេះផលបានទៅអ្នកប្រឡេះវិញឆ្កុយ។
បើតាមប្រភពច្បាស់ការមួយ បានឱ្យដឹងថា នៅថ្ងៃ ថ្ងៃ ទី១៣ ខែវិច្ឆិកា ឆ្នាំ២០១៨ រដ្ឋបាលខេត្តកំពតនឹងធ្វើពិធីប្រកាសតែងតាំងអភិបាលរងខេត្តកំពត់ថ្មីម្នាក់ជំនួស លោក ស៊ុក សារ៉ាដ ដែលត្រូវចូលនិវត្តន៍។
តំណែងអភិបាលរងខេត្តកំពតថ្មីនេះនេះពីមុនគេដឹងថានឹងត្រូវត្រូវបានជំនួសដោយ លោក ភុន សារពេជ្រ សមាជិកក្រុមការងារយុវជនថ្នាក់កណ្តាល និងជាប្រធានក្រុមការងារយុវជនគណបក្សប្រជាជនកម្ពុជាខេត្តកំពត។នេះបើយោងលិខិតមួយច្បាប់របស់ អគ្គនាយកដ្ឋានរដ្ឋបាល ក្រសួងមហាផ្ទៃលេខ ៤០៥៧ អរប ចុះថ្ងៃចន្ទ ១២រោច ខែអស្សុជ ឆ្នាំច ព.ស.២៥៦២ ត្រូវនឹងថ្ងៃទី០៥ ខែវិច្ឆិកា ឆ្នាំ២០១៨ ជម្រាបមក ឯកឧត្តមអភិបាល នៃគណៈអភិបាលខេត្តកំពត។
មូលហេតុគឺគេគ្រប់គ្នាដឹងថា ឈ្មោះលោកភុនសារពេជ្រនេះត្រូវបានឯកឧត្តម នៃ ប៉េណា សមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលចុះជួយខេត្តកំពតកាលនៅរស់បានឯកភាពស្នើសុំទៅក្រសួងមហាផ្ទៃជាបេក្ខភាព អភិបាលរងខេត្តកំពត ជំនួស លោក ស៊ុក សារ៉ាដដែលត្រូវចូលនីវត្តន៍ ដោយមានយោបល់ឯកភាពពី លោក ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ពជើងគោក លោកកែ ប៊ុនខៀង ប្រធានក្រុមការងារយុវជនគណបក្សប្រជាជនកម្ពុជាថ្នាក់កណ្តាល ផងដែរ។
ប៉ុន្តែអ្វីដែលគួរឱ្យភ្ញាក់ផ្អើល និងហួសចិត្តជាទីបំផុតពេលអាប៉ោងបើកគ្របវាអត់ឃើញឈ្មោះ ភុន សារពេជ្រ ស្អីហ្នុងទេតែបែរជាលេចចេញឈ្មោះ ហាស់ សូបិនដោយមាន មានអនុក្រឹត្យចុះហត្ថេខាដោយសម្តេចតេជោនាយករដ្ឋមន្ត្រីតែងតាំងជាអភិបាលរងខេត្តកំពតជំនួស លោក ស៊ុក សារ៉ាដ ទៅវិញ។
ប្រការនេះបានធ្វើឲ្យមាន ជាចម្ងល់ថា÷
១-តើលោក ហាស់ សូបិន មានស្នាដៃអ្វីខ្លះដែលបានបម្រើប្រជាពលរដ្ឋក្នុងខេត្តកំពត?
២-តើយោងលើឯកសារអ្វីដែលតែងតាំង លោក ហាស់ សូបិន ជាអភិបាលរងខេត្តជំនួស ឯកឧត្តម ស៊ុក សារ៉ាដ ដែលត្រូវចូលនិវត្តន៍?។
៣-តើ លោក ភុន សារពេជ្រ មានបុគ្គលិកលក្ខណៈ សមត្ថភាព លទ្ធភាពយ៉ាងណា បានជាក្រសួងមហាផ្ទៃមិនអាចតែងតាំងជាអភិបាលរងខេត្តកំពត ជំនួស ឯកឧត្តម ស៊ុក សារ៉ាដ ដែលត្រូវចូលនិវត្តន៍?។
ជាចម្លើយអ្នកដឹងរឿងបាននិយាយឌឺថាងាយយល់ទេ៖ទី១លោកណៃប៉េណាដែលជាអ្នកមានទឹកមាត់ប្រៃនោះចូលមរណៈភាពបាត់ទៅហើយគ្មានអ្នកយកអ្នកស្លាប់មកធ្វើអីទេ។ទី២គីឡូលោកភុនសារពេជ្រធ្ងន់មែនព្រោះតាមមើលមិនក្រោម១០០គីឡូទេតែខ្សោយខាងខ្សែប្រឡៅនិងធនធានសេដ្ឋកិច្ច។ទី៣អាចមកពីលោកភុនសារពេជ្រមិនទាន់ជាមន្ត្រីរាជការជាន់ខ្ពស់ដែលជាលេសគ្រប់គ្រាន់សម្រាប់គេទាត់ចោលបេក្ខភាពហ្នឹងទៅ!!។សរុបទៅស្រុករំដួលយើងចឹង!!។
