ក្រចេះ ៖ ប្រជាពលរដ្ឋ និងអាជីវករលក់ដូរនៅក្នុងផ្សារសាមគ្គីក្រុងក្រចេះ ស្នើឲ្យមន្ត្រីជំនាញ សាខាកាំកុងត្រូល និងអាជ្ញាធរខេត្ត ចុះត្រួតពិនិត្យជាប្រចាំទៅលើបន្លែផ្លែឈើ និងគ្រឿង ឧបភោគបរិភោគដែលខូចគុណភាព និងហួសកាលបរិច្ឆេទ ដើម្បីសុខភាពប្រជាពលរដ្ឋ។
ការលើកឡើងរបស់អាជីវករ និងប្រជាពលរដ្ឋ ខណៈដែលក្រុមមន្ត្រីជំនាញសាខាកាំកុងត្រូល ខេត្តក្រចេះ សហការជាមួយមន្ទីរពាណិជ្ជកម្មខេត្ត ដឹកនាំដោយលោក យាង បាក់ និងមានការចូលរួមពីលោក ស្រេង សុភាព អភិបាលរងខេត្តក្រចេះ ចុះត្រួតពិនិត្យមុខម្ហូប ទំនិញ ដែលខូចគុណភាព និងហួសកាលបរិច្ឆេទ នៅផ្សារសាមគ្គីក្រុងក្រចេះ ក្នុងសង្កាត់ ក្រចេះ ក្រុងក្រចេះ នាព្រឹកថ្ងៃទី៧ ខែវិចិ្ឆកា ឆ្នាំ២០១៨។
លោក យាង បាក់ អនុប្រធានសាខាកាំកុងត្រូលខេត្ដក្រចេះ បានឲ្យដឹងថា ក្រោយពេល ដែលចុះពិនិត្យទំនិញដូចជា បន្លែ ផ្លែឈើ ត្រីសាច់ មី គុយទាវ អំបិល ស្ករ ទឹកខ្មេះ សណ្តែកបណ្តុះ បន្លែ ផ្អក ជ្រក់ស្ពៃ និងទំនិញមួយចំនួនទៀត រហូតដល់ទៅ ៥៥មុខប្រភេទ។ លោកបានបញ្ជាក់ថា ជាលទ្ធផល បន្ទាប់ពីឆ្លងកាត់ការវិភាគយ៉ាងម៉ត់ចត់ ដោយរថយន្តមន្ទីរ ពិសោធន៍ចលតនៃអគ្គនាយកដ្ឋានកាំកុងត្រូល បានរកឃើញសារធាតុ Salicylic Acid នៅក្នុងស្ពៃជ្រក់ និងសារធាតុ Synthethic dyc នៅក្នុងម្ទេសកិន ហើយមន្ត្រីជំនាញបានធ្វើការ ដកហូតស្ពៃជ្រក់ទាំងនោះ ចំនួន ៥០គីឡូក្រាម និងធ្វើការណែនាំម្ចាស់កិនឲ្យបញ្ឈប់ការ ប្រើប្រាស់ល័ក្ខគីមីបន្តទៀត។
ជាមួយគ្នានោះដែលលោក ស្រេង សុភាព អភិបាលរងខេត្តក្រចេះ បានធ្វើការផ្តាំផ្ញើ ទៅដល់អាជីវករ លក់ដូរទាំងអស់ ចូលរួមគោរពច្បាប់ និងត្រួតពិនិត្យទំនិញអោយបាន ត្រឹមត្រូវ អំពីកាលបរិច្ឆេទ មុននឹងលក់ ឬផ្គត់ផ្គង ទៅដល់ប្រជាពលរដ្ឋ។
ដោយ កិះខន
