ក្រចេះ ៖ អាជ្ញាធរខេត្តក្រចេះ គ្រប់លំដាប់ថ្នាក់ រួមយុវជនប្រមាណជាង ៤៥០ នាក់ ប្រារព្វទិវារំលឹកដល់ជនរងគ្រោះចរាចរណ៍ផ្លូវគោកលើកទី១៣ ដែលរៀបចំដោយមន្ទីរសាធារណៈការ និងដឹកជញ្ជូនខេត្ត ក្រោមអធិបតីភាពឯកឧត្តមអភិបាលនៃគណៈអភិបាលខេត្ត វ៉ា ថន ។
ក្នុងរបាយការណ៍សម្រាប់រយៈពេល៩ ខែដើមឆ្នាំ ២០១៨ របស់លោកប្រធានមន្ទីរសាធារណៈការ និងដឹកជញ្ជូនខេត្ត ស្រេង ស្រស់ បានបញ្ជាក់ឲ្យដឹងថា ៖ គ្រោះថ្នាក់ចរាចរណ៍បានកើតឡើងចំនួន ១៣៣ លើក បើប្រៀបធៀបរយៈពេល៩ខែដើមឆ្នាំ ២០១៧ គ្រោះថ្នាក់កើតឡើង ១៣៩ លើក ថយចុះ ៦ លើក ស្មើនឹង ៤,៣១% ក្នុងនោះគ្រោះថ្នាក់ដោយអ្នកបើកបរម៉តូមិនពាក់មួកសុវត្ថិភាពចំនួន ៨៧ករណី ស្មើនឹង ៦៥,៤១% ហើយការរងគ្រោះថ្នាក់ទាំងនេះ បណ្តាលឲ្យគ្រោះថ្នាក់ដល់មនុស្សចំនួន ២៥២នាក់ លើ ២៥នាក់ ថយចុះ ១នាក់ ក្នុងនោះស្លាប់ ៥៥ នាក់ លើ ៦១ នាក់ ថយចុះ ៦ នាក់ ស្មើ ៩,៨៣%, របួសធ្ងន់ ១៣០ នាក់ លើ ១៣៥ នាក់ ថយចុះ ៥ នាក់ ស្មើ ៣,៧០% , របួសស្រាល ៦៧នាក់ លើ៥៧ នាក់ កើនឡើង ១០ នាក់ ស្មើ ១៧,៤៦% ។
ក្នុងពិធី តំណាងជនរងគ្រោះថ្នាក់ចរាចរណ៍ បានបញ្ចេញនូវចំណាប់អារម្មណ៍របស់ខ្លួន ដោយបញ្ជាក់ថា ៖ រូបលោកពិតជាមានវិប្បដិសារីយ៉ាងខ្លាំង ក្រោយពីបានជួបនូវហេតុការណ៍ដ៏រន្ធត់នេះ ទាំងនេះគឺមកពីការធ្វេសប្រហែសរបស់អ្នកដ៏ទៃ និងខ្លួនឯង ត្រឹមតែមួយពព្រិចភ្នែកបានបង្កគ្រោះថ្នាក់កើតឡើង ដែលលោកជាមេគ្រួសារទទួលបន្ទុក រ៉ាប់រងផ្គត់ផ្គង់ជីវភាពប្រចាំថ្ងៃលើគ្រួសារទាំងមូល បាត់បង់នូវឱកាសបំពេញការងារ និងអស់ចំណាយជាច្រើនលើការព្យាបាល បាត់បង់ទ្រព្យសម្បតិ្តជាច្រើនសម្រាប់គ្រួសារ និងសង្គមជាតិ ហើយបានក្លាយជាជនពិការផងដែរ ។
មានប្រសាសន៍បន្ថែមក្នុងពិធី ឯកឧត្តមអភិបាលខេត្ត បានលើកឡើងថា ៖ ស្ថិតក្នុងស្ថានការណ៍ទូទៅរបស់កម្ពុជា កំពុងអភិវឌ្ឍន៍រីកចម្រើនឥតឈប់ឈរ ស្ថេរភាព សន្តិសុខសង្គម និងសុវត្ថិភាពសណ្តាប់ធ្នាប់សាធារណៈ កាន់តែត្រូវបានធានាយ៉ាងរឹងមាំ និងកម្រិតជីវភាពប្រជ/ពទូទាំងប្រទេសកាន់តែល្អប្រសើរឡើងនោះ បានធ្វើឲ្យកំណើនមធ្យោបាយយានយន្តគ្រប់ប្រភេទ កើនឡើងយ៉ាងគំហុកនាប៉ុន្មានឆ្នាំថ្មីចុងក្រោយនេះ ។
ទន្ទឹមនេះ គ្រោះថ្នាក់ចរាចរណ៍ក៏ស្ថិតនៅក្នុងកំណើនមួយគួរឲ្យព្រួយបារម្មណ៍ផងដែរ ដែលគ្រោះថ្នាក់នេះជាកត្តាមួយធ្វើឲ្យអន្តរាយដល់អាយុជីវិតមនុស្ស សត្វ បរិស្ថាន និងការខូចខាតទ្រព្យសម្បត្តិរដ្ឋ ឯកជន និងបានជះឥទ្ធិពលយ៉ាងធ្ងន់ធ្ងរមកលើសេដ្ឋកិច្ចជាតិ និងគោលនិយោបាយកាត់បន្ថយភាពក្រីក្រ រួមនិងការអភិវឌ្ឍន៍លើកគ្រប់បិស័យរបស់រាជរដ្ឋាភិបាលផងដែរ ។
ក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ឃើញថាសមិទ្ធផលជាតិសំខាន់ៗ ជាពិសេសហេដ្ឋារចនាសម្ព័ន្ធ ត្រូវបានកើតឡើងនិងមានភាពប្រទាក់ក្រឡាតភ្ជាប់គ្នាពីតំបន់មួយទៅមួយ ដែលពីមុនមិនធ្លាប់មានក៏ប៉ុន្តែជាមួយនិងភាពងាយស្រួលខាងលើនេះ ត្រូវបានអ្នកបើកបរ និងប្រើប្រាស់ផ្លូវមួយចំនួនដែលមិនគោរពច្បាប់ចរាចរណ៏ ខ្វះការគោរពសិទ្ធិគ្នា បានបង្កភាពអនាធិបតេយ្យដូចជា ៖ បើកបរក្នុងល្បឿនលឿនហួសកំរិតកំណត់ បើកបរក្នុងភាពស្រវឹង បើកបរប្រណាំងប្រជែង បើបរមិនគោរពផ្លាកសញ្ញា គំនូសសញ្ញា និងភ្លើងសញ្ញាចរាចរណ៏ជាដើម ៕
ដោយ កិះខន