ខេត្តបន្ទាយមានជយ័៖កាលពីព្រឹកថ្ងៃទី៣១ ខែតុលា ឆ្នាំ២០១៨នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍កម្ពុជាបានជួបជាមួយឧត្តមសេនីយ៍ត្រី សុរៈសេដ ផាតផាន អគ្គនាយកអន្តោប្រវេសន៍នៅលើស្ពានមិត្តភាព ច្រកទ្វារអន្តរជាតិប៉ោយប៉ែតក្នុង។
គោលបំណងនៃការជួបគ្នានេះគឺដើម្បី ធ្វើកិច្ចសហប្រតិបត្តិការនៅតាមបន្ទាត់ព្រំដែន ដើម្បីទប់ស្កាត់បទល្មើសជួញដូរគ្រឿងញៀនឆ្លងដែន,ទំនិញគេចពន្ធ,ឃាតកម្មនិងភេរវកម្មឆ្លងដែនផងដែរ។
នាយឧត្តមសេនីយ៍ គៀត ច័ន្ទថារិទ្ធ បានថ្លែងថា៖ ការពង្រឹងសម្ព័ន្ធភាពរវាងមន្ត្រីនគរបាលអន្តោប្រវេសន៍ ក៏ដូចជាការផ្លាស់ប្តូរបទពិសោធន៍រវាងភាគីទាំងពីរ មានគោលបំណងរក្សាសន្តិសុខ សណ្តាប់ធ្នាប់ ធ្វើសហប្រតិបត្តិការទប់ស្កាត់បទល្មើសឆ្លងដែនដូចជា ភេរវកម្មឆ្លងដែន ឧក្រិដ្ឋកម្មឆ្លងដែន ការជួញដូរមនុស្សឆ្លងដែន ជួញដូរគ្រឿងញៀនឆ្លងដែន ទំនិញគេចពន្ធឆ្លងដែន និងទប់ស្កាត់ពលករចំណាកស្រុកខុសច្បាប់ផងដែរ។
ចំពោះប្រជាពលរដ្ឋដែលលួចឆ្លងដែនមិនស្របច្បាប់នាយឧត្តមសេនីយ៍គៀត ច័ន្ទថារិទ្ធ បញ្ជាក់ថា៖ ត្រូវតែលើកកម្ពស់ការយល់ដឹងរបស់ពួកគាត់ និងពន្យល់អប់រំណែនាំឲ្យដឹងច្បាស់ពីគុណវិបត្តិ នៃភាពមិនស្របច្បាប់ ហើយចំពោះកិច្ចការងារនេះ ក្រសួងស្ថាប័នពាក់ព័ន្ធ បានលើកទឹកចិត្តក្រុមហ៊ុនដែលនាំពលករទៅក្រៅប្រទេស ដើម្បីឲ្យក្រុមហ៊ុនមានសន្ទុះបំផុសណែនាំពលករ ឲ្យឆ្លងដែនទៅរកការងារធ្វើនៅបរទេស ដោយស្របច្បាប់វិញ។
សូមបញ្ជាក់ដែរថា៖បន្ទាប់ពីកិច្ចប្រជុំពិភាក្សារគ្នានៅសណ្ឋាគា ឥណ្ឌូចិន ស្រុកអារញ្ញ័ ប្រទេសថៃ រួចមកថ្នាក់ដឹកនាំអន្តោប្រវេសន៍នៃប្រទេសទាំងពីបានចាប់ដៃគ្នា នៅលើស្ពានមិត្តភាព ច្រកទ្វារអន្តរជាតិប៉ោយប៉ែត ដើម្បីរឹតបន្តឹងទំនាក់ទំនង នៅស្ពានមិត្តភាពកម្ពុជា-ថៃ ក្រោមបរិយាកាស សប្បាយរីករាយនឹងមិត្តភាព ក្នុងកិច្ចសហប្រតិបត្តិការ រវាងប្រទេសទាំងពីរ៕
សូមបញ្ជាក់ថាកន្លងមកបញ្ហាប្រជាបលរដ្ឋខ្មែរលួចចូលដីថៃដើម្បីរកការងារធ្វើនិងប្រព្រឹត្តបទល្មើសផ្សេងដូចជាលួចកាប់ឈើររកស៊ីខុសច្បាប់ខ្លះស្លាប់ឬចាប់ខ្លួនដាក់គុកគឺសុទ្ធតែមានការឃុបឃឹតពីមន្ត្រីសមត្តកិច្ចខ្មែរទើបបងប្អូនអាចចូលទៅបាន!៕
