ភ្នំពេញ៖ព្រឹកថ្ងៃទី០១ ខែវិច្ឆិកា ឆ្នាំ២០១៨នេះ កម្លាំងនគរបាល បានបើកប្រតិបត្តិការឡោមព័ទ្ធផ្ទះមួយកន្លែងស្ថិតត្រង់ចំណុចផ្ទះលេខ១៨៤A ផ្លូវលេខ៦៩R ក្នុងភូមិចំការឪឡឹក១ សង្កាត់កាកាប១ ខណ្ឌពោធិ៍សែនជ័យដើម្បីចាប់ជនសង្ស័យម្នាក់ ដែលបក្ខពួកប៉ុនប៉ងបំផ្ទុះភេរវកម្ម ប្រឆាំងរាជរដ្ឋាភិបាលាតមដិការតុលាការ។
លោកវរសេនីយ៍ឯក យឹម សារ៉ាន់ អធិការនគរបាលខណ្ឌពោធិ៍សែនជ័យ បានប្រាប់កាសែតថា ជនសង្ស័យខាងលើឈ្មោះ ប៉េង រ៉ា អាយុ៤៨ឆ្នាំ ជាអ្នកធ្វើការ និងចាំដីឲ្យគេនៅម្តុំពេជ្រនិល គឺជាបក្ខពួកក្រុមចង់បំផ្ទុះភេរវកម្ម ក្នុងចំណោមបក្ខពួកសរុបចំនួន៨នាក់។ ជននេះត្រូវបានចាប់ខ្លួនតាមដីការបស់តុលាការ និងធ្វើឡើងក្រោមបញ្ជាពីនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងស្នងការនគរបាលរាជធានីភ្នំពេញ លោកឧត្តមសេនីយ៍ឯក ស ថេត។
សូមបញ្ជាក់ថា កាលពីថ្ងៃទី០២ ខែតុលា ឆ្នាំ២០១៨ កន្លងទៅនេះ កម្លាំងនគរបាលនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន បានតាមចាប់ខ្លួនមេខ្លោងម្នាក់ ពាក់ព័ន្ធទៅនឹងមនុស្សប្រុស-ស្រី៨នាក់ ដែលមានអតីតភិក្ខុសង្ឃ១អង្គផងនោះនៅខេត្តព្រះវិហារ។ ជនសង្ស័យរូបនោះមានឈ្មោះ ក្រូច ដែលការចាប់ខ្លួនឈ្មោះនេះ សមត្ថកិច្ចបានដកហូតអាវុធមានវែងមានខ្លី និងមានគ្រឿងរំសេវជាឧបករណ៍ដាក់បំផ្ទុះទៀតផង។
ការបង្ក្រាបពេលនោះ កម្លាំងនគរបាល បានដកហូតកាំភ្លើងចំនួន២៨ដើម ហើយក្រុមទាំងនេះ ត្រូវបានតុលាការចេញដីកាដាក់ពន្ធនាគារជាបណ្តោះអាសន្នរួចហើយ៕
