ពីមួយអាណត្តិទៅមួយអាណត្តិភាពអយុត្តិធម៌សម្រាប់ប្រជាពលរដ្ឋក្រីក្រ ចំពោះរឿងទំនាស់ដីធ្លីគឺមិនចេះចប់ឡើយ មិនថានៅរាជធានីភ្នំពេញ ឬនៅតាមបណ្តាខេត្តនោះទេ ។
ជាក់ស្តែងកាលពីថ្ងៃទី25 ខែកញ្ញា ឆ្នាំ2018 កន្លងទៅថ្មីៗនេះ ប្រជាពលរដ្ឋចំនួន បីគ្រួសាររស់នៅភូមិចុងកៅស៊ូ សង្កាត់ស្លរក្រាម ក្រុង-ខេត្តសៀមរាប បានទទួលរងនូវភាពអយុត្តិធម៌មួយយ៉ាងខ្លាំង ដោយលោក សំ រឹទ្ធ សុខុន ព្រះរាជអាជ្ញារងអមសាលាដំបូងខេត្តសៀមរាប បានបញ្ជាកងកំលាំងប៉ូលីសប៉េអឹមមកអនុវត្តដោយបង្ខំនូវដីកាសម្រេចលេខ 95 ពស.អរវី “ក” /18 ចុះថ្ងៃទី29 ខែមិនា ឆ្នាំ2018 របស់សាលាដំបូងខេត្តសៀមរាប ដោយបញ្ជាអោយកម្មករយករបងស័ង្កសីយកមកហ៊ុំព័ទ្ធលើដីធ្វើអាជីវកម្មរបស់ឈ្មោះ ឡាយ សុជាតិ, ឈ្មោះ សែម សឿត និងឈ្មោះ ហៀង ឡាលីន ស្ថិតនៅតំបន់ផ្សាររាត្រីអង្គឃ្យូងលូ ក្នុងភូមិចុងកៅស៊ូសង្កាត់ស្លរក្រាម ក្រុង-ខេត្តសៀមរាប ។ ដោយមិនអនុញ្ញាតអោយសាមីម្ចាស់សមភារៈចូលយករបស់របរសូម្បីតែកង់សម្រាប់កូនជិះទៅរៀន។
តាមសម្តីរបស់លោកស្រី អុប សុភា ប្រពន្ធរបស់លោក ឡាយ សុជាតិ បានរៀបរាប់ប្រាប់អ្នកយកពត៌មាន ថាៈ លោកស្រី និងប្តីលោកស្រីបានមកទិញដីនេះ (ដីមានទំនាស់ស្ថិតនៅតំបន់ផ្សាររាត្រីអង្គរឃ្យូងយូ ក្នុងភូមិចុងកៅស៊ូ សង្កាត់ស្លរក្រាម ក្រុង-ខេត្តសៀមរាប) ពីឈ្មោះ ចិត្ត សុធា អ្នកគ្រប់គ្រងដីធ្វើអាជីវកម្មទំហំ 55mx75mកាលពីថ្ងៃទី12 ខែមិនា ឆ្នាំ2010។
ហើយក៏បានសុំច្បាប់ធ្វើអាជីវកម្មដាក់រទេះភ្លើងក្មេងជិះកំសាន្ត, ទោងយោល ផ្ទះកូនបាល់, គប់ប៉េងប៉ោង, ថាស់ហោះ, ជិះកូនទា,និងឡានបុកគ្នា ដោយមានអាជ្ញាប័ណ្ណពីមន្ទីរជំនាញ និងអាជ្ញាធរខេត្តចេញច្បាប់អនុញ្ញាតអោយធ្វើអាជីវកម្ម។ បន្ទាប់មកនៅក្នុងកំឡុងឆ្នាំ2014 នាងខ្ញុំ ក៏បានដាក់ពាក្យ ស្នើសុំចុះបញ្ជីធ្វើប័ណ្ណកម្មសិទ្ធិដី។ ប៉ុន្តែត្រូវបានមន្ត្រីសុរិយោដីធ្វើការបដិសេធមិនព្រមចុះបញ្ជីអោយទេ ដោយគេប្រាប់ថាដីនេះស្ថិតនៅតំបន់ហាមឃាតរបស់អាជ្ញាធរអប្សរា។
តែសម្រាប់ការស្នាក់នៅនិងប្រកបអាជីវកម្មគឺនៅដដែលចាំដល់ពេលណាដែលរដ្ឋត្រូវការយកកន្លែងនេះ (ផ្សាររាត្រីអង្គរឃ្យូងយូ) ធ្វើអីផ្សេងពេលនោះមានការដោះស្រាយ ប៉ុន្តែមកដល់កំឡុងឆ្នាំ2015-2016 ស្រាប់តែលេចចេញឈ្មោះលោកស្រី លី អ៊ុំអេង មកប្រាប់ថាដីដែលពួកខ្ញុំកំពង់ប្រកបអាជីវកម្មគឺជាដីរបស់គាត់។ ហើយក៏បានប្តឹងផ្តល់គ្នាតាំងពីកំឡុងឆ្នាំ2016 មករហូតទាល់តែលេចចេញវិញ្ញាបនបត្រសម្គាល់ម្ចាស់អលនវត្ថុលេខ 171001034989 ដែលលោកស្រី លី អ៊ុំអេង ថាជាកម្មសិទ្ធិរបស់គាត់។
លោកស្រី អុប សុភា បានបញ្ជាក់បន្ថែមថាទោះបីលោកស្រី លី អ៊ុំអេងអះអាងថាប័ណ្ណកម្មសិទ្ធិលេខ 171001034989 ជារបស់គាត់លោកស្រី និងប្តីលោកស្រីក៏បានដាក់ពាក្យប្តឹងទៅអយ្យការអមសាលាដំបូង និងតុលាការខេត្តសៀមរាប ក៏ដូចជាក្រសួងរៀបចំដែនដីនគរូបនីយកម្ម និងសំណង់ដើម្បីអោយគេបើកការស៊ើបអង្កេតចំពោះប័ណ្ណកម្មសិទ្ធិលេខ 171001034989 រួចរាល់ហើយដែរ។ ហើយក្រសួងរៀបចំដែនដីក៏បានចេញលិខិតលេខ 14-18 ដនស/អសដភ ជម្រាបមកអភិបាលខេត្តសៀមរាបដើម្បីពិនិត្យ និងដោះស្រាយ។ ប៉ុន្តែមិនត្រូវបានតុលាការរងចាំនោះទេគឺគេអនុវត្តដោយបង្ខំតែម្តង។
លោក ស៊ុយ សុខុន មេធាវីការពារក្តីអោយលោកស្រី អុប សុភា បាននិយាយយ៉ាងខ្លីថាចំពោះបញ្ហាទំនាស់ដីរវាងកូនក្តីរបស់លោក គឺលោក ឡាយ សុជាតិ និងប្រពន្ធ ឈ្មោះ អុប សុភា ជាមួយលោកកស្រី លី អ៊ុំអេង លោកយល់ថារឿងនេះតុលាការគួរស៊ើបអង្កេតអោយបានច្បាស់លាស់មុននឹងសម្រេចធ្វើអ្វីមួយជៀសវាងធ្វើអោយខូចប្រយោជន៍ដល់ភាគីម្ខាងៗ។
តាមប្រភពពីប្រជាពលរដ្ឋដែលរស់នៅ និងប្រកបអាជីវកម្មនៅតំបន់ផ្សាររាត្រីអង្គរឃ្យូងយូបាននិយាយថាដីនេះបើលោកស្រី លី អ៊ុំអេង អាចធ្វើប័ណ្ណកម្មសិទ្ធិបានពួកយើងជាប្រជាពលរដ្ឋក៏អាចធ្វើប័ណ្ណកម្មសិទ្ធិបានដែរ រដ្ឋមិនអាចចេញប័ណ្ណអោយតែអ្នកមានបានទេ។
គួររំលឹកផងដែរថាបើយើងពិនិត្យទៅលើអនុក្រឹត្យលេខ 158 អនក្រ.បក ចុះថ្ងៃទី25 ខែកក្កដា ឆ្នាំ2016 ចុះហត្ថលេខាដោយសម្តេចអគ្គមហាសេនាបតីតេជោ ហ៊ុន សែន មានខ្លឹមសារថាការធ្វើប្រទានកម្មជាកម្មសិទ្ធិជូនប្រជាពលរដ្ឋដែលបានកាន់កាប់ប្រើប្រាស់ និងដាំដុះជាប់នៅក្នុងបុរីសណ្ឋាគារអង្គរសៀមរាប ក្រុងសៀមរាប ខេត្តសៀមរាប ។
សម្រេច
មាត្រា 1 : អនុក្រិត្យនេះមានវិសាលភាពអនុវត្តទៅលើទីតាំងបុរីសណ្ឋាគារដែលមានចែងនៅក្នុងអនុក្រឹត្យ លេខ 97 អនក្រ.បក ចុះថ្ងៃទី13 ខែតុលា ឆ្នាំ1995 ស្តីពីការពង្រីកផ្ទៃដីបុរីសណ្ឋាគារអង្គរសៀមរាប គ្រប់គ្រងដោយអាជ្ញាធរអប្សរា។
មាត្រា 2 : ធ្វើប្រទានកម្ម ជាកម្មសិទ្ធិជូនប្រជាពលរដ្ឋវិញចំពោះក្បាលដីទាំងឡាយណាដែលអាជ្ញាធរអប្សរាមិនទាន់បានដោះស្រាយគោលនយោបាយលហើយបានកាន់កាប់អាស្រ័យផលជាក់ស្តែង។ ដូច្នេះហើយចំពោះបញ្ហាទំនាស់ដីរវាងលោកស្រី លី អ៊ុំអេង និងប្រជាពលរដ្ឋប៉ុន្មានគ្រួសារខាងលើតុលាការគួរគប្បីផ្ទេរសមត្ថកិច្ចមកអោយអាជ្ញាធរខេត្តក៏ដូចជាអាជ្ញាធរអប្សរាជាអ្នកដោះស្រាយវិញទើបអាចទទួលបានយុត្តិធម៌ទាំងសង្ខាង។
ជុំវិញពត៌មាននេះបើតាមលោក ហ៊ី សាយ ប្រធានមន្ទីររៀបចំដែនដីនគរូបនីយកម្មសំណង់ និងសុរិយោដី ខេត្តសៀមរាបបានអោយដឹងថា៖ លោកមិនបានដឹងថាតើលោកស្រី លី អ៊ុំអេង ប្តឹងសុំអោយតុលាការអនុវត្តដីគាត់កន្លែងណានោះទេ ព្រោះលោកស្រី លី អ៊ុំអេង មានប័ណ្ណកម្មសិទ្ធិដីច្រើនកន្លែងណាស់នៅសៀមរាប។ បើចង់ដឹងច្បាស់លុះត្រាតែយកប័ណ្ណនោះមកអោយអ្នកជំនាញត្រួតពិនិត្យនោះទើបដឹងច្បាស់ថាពិតឬមិនពិត។
បើតាមបតិក្រុមអ្នកតាមដានពត៌មានដែលបានជជែកគ្នានៅតុកាហ្វេវិញគឺគេថាចំពោះរឿងទំនាស់ដីរបស់លោកស្រី លី អ៊ុំអេង ជាមួយប្រជាពលរដ្ឋនៅខេត្តសៀមរាប គឺបានកើតឡើងតាំងពីឆ្នាំ 2015 មកម្ល៉េះ។ ក៏ប៉ុន្តែការដោះស្រាយរបស់អាជ្ញាធរខេត្តសៀមរាបមិនដឹងជាយ៉ាងម៉េចបានជាចេញប័ណ្ណកម្មសិទ្ធិអោយទៅលោកស្រី លី អ៊ុំអេង តែម្នាក់ទៅវិញ ហើយម្យ៉ាងដីនោះគឺស្ថិតនៅចំដែនហាមឃាត់របស់អាជ្ញាធរអប្សរាទៀត។
ជុំវិញពត៌មាននេះយើងមិនអាចសុំការពន្យល់ពី ឯកឧត្តម ឃឹម ប៊ុនសុង អភិបាលនៃគណៈអភិបាលខេត្ត សៀមរាប និង ឯកឧត្តមប្រធានអាជ្ញាធរអប្សរាបានទេ៕
