ស្វីស៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើឲ្យប្រមុខដឹកនាំបណ្តាប្រទេសនានាសំដែងសុឆន្ទៈ និងការទទួលខុសត្រូវខ្ពស់ ដើម្បីឆ្លើយតបចំពោះបញ្ហាប្រឈមសកល ដែលកំពុងកើតមានឡើងនៅពេលបច្ចុប្បន្ននេះ ដើម្បីរក្សាបាននូវបរិយាកាសវិនិយោគ និងស្ថិរភាពភូមិសាស្ត្រនយោបាយ ក៏ដូចជា បង្កើនការទុកចិត្ត ក្នុងវិស័យហិរញ្ញវត្ថុ និងវិស័យឧស្សាហកម្ម។
ការស្នើរបស់សម្តេចតេជោ ហ៊ុន សែនធ្វើឡើងក្នុងកិច្ចប្រជុំកំពូលអ្នកដឹកនាំវិនិយោគសាកល នៃវេទិកាវិនិយោគពិភពលោក ឆ្នាំ២០១៨ ក្រោមប្រធានបទ៖ ទស្សនវិស័យវិនិយោគរបស់កម្ពុជា ក្នុងយុគសម័យសាកលភាវូបនីយកម្ម នៅថ្ងៃទី២៣ ខែតុលា ឆ្នាំ២០១៨ នៅទីក្រុងហ្សឺណែវ ប្រទេសស្វីស។
សម្តេចតេជោ ហ៊ុន សែនបញ្ជាក់ថា សង្គ្រាមពាណិជ្ជកម្មដ៏ស្រួចស្រាលនេះ បានធ្វើឲ្យការចរចាពាណិជ្ជកម្ម ក្នុងអង្គការពាណិជ្ជកម្មពិភពលោក ត្រូវជាប់គាំងដោយសារភាពមិនច្បាស់លាស់ នៃគោលនយោបាយពន្ធថ្មីៗ ព្រមទាំងការដាក់គំនាប និងទណ្ឌកម្មនានា ជាហេតុធ្វើឲ្យប៉ះពាល់ធ្ងន់ធ្ងរ ដល់ពាណិជ្ជកម្ម ការវិនិយោគ និងការនាំចេញទំនិញ ពីបណ្តាប្រទេសអភិវឌ្ឍន៍តិចតួចទៅផ្សារអន្តរជាតិ ក៏ដូចជា បង្កឧបសគ្គដល់ការអនុវត្តរបៀបវារៈ២០៣០ នៃអង្គការសហប្រជាជាតិផងដែរ។«ឈរលើមូលដ្ឋាននេះ ខ្ញុំសូមស្នើឲ្យប្រមុខដឹកនាំទាំងអស់គ្នាសំដែងសុឆន្ទៈ និងការទទួលខុសត្រូវខ្ពស់ ដើម្បីឆ្លើយតបចំពោះបញ្ហាប្រឈមសកលនេះ ដើម្បីរក្សាបាននូវបរិយាកាសវិនិយោគ និងស្ថិរភាពភូមិសាស្ត្រនយោបាយ ក៏ដូចជា បង្កើនការទុកចិត្ត ក្នុងវិស័យហិរញ្ញវត្ថុ និងវិស័យឧស្សាហកម្មផងដែរ»។
សម្តេចតេជោថ្លែងទៀតថា ក្នុងនាមជាសមាជិកអង្គការសហប្រជាជាតិមួយ ប្រកបដោយស្មារតីទទួលខុសត្រូវ កម្ពុជាត្រៀមខ្លួនជាស្រេចក្នុងការរួមចំណែក ជាមួយដៃគូរពាក់ព័ន្ធ ទាំងអស់ ដើម្បីការពារប្រព័ន្ធពាណិជ្ជកម្មសេរី និងស្នើភាព ក៏ដូចជា ដើម្បីរក្សាសន្ដិភាព, សន្ដិសុខ និងស្ថេរភាពក្នុងតំបន់ និងក្នុងពិភពលោក។ សូមអញ្ជើញប្រមុខដឹកនាំប្រទេស និងក្រុមហ៊ុននានាចូលរួមជាដៃគូវិនិយោគជាមួយយើង ដើម្បីរួមចំណែកអភិវឌ្ឍកម្ពុជា និងលើកកម្ពស់កំណើនពិភពលោក។
សម្តេចបញ្ជាក់ថា«ក្នុងនាមរាជរដ្ឋាភិបាលកម្ពុជា ខ្ញុំសូមធានាជូនវិនិយោគិនគ្រប់រូប នូវបរិស្ថានអនុគ្រោះ និងការគាំទ្រដល់ការវិនិយោគ ជាពិសេសធានារក្សានូវសន្ដិភាព សន្ដិសុខ និងស្ថិរភាពនយោបាយ ក៏ដូចជាស្ថេរភាពម៉ាក្រូសេដ្ឋកិច្ច ព្រមទាំងក្របខ័ណ្ឌច្បាប់ និងស្ថាប័ន ប្រកដោយប្រសិទ្ធិភាព, តម្លាភាព និងគណនេយ្យភាព»។សម្តេចតេជោបានថ្លែងទៀតថា ទោះស្ថិតក្នុងស្ថានភាពបែបណាក្ដី រាជរដ្ឋាភិបាលកម្ពុជា នូវតែបន្ដប្រកាន់ខ្ជាប់ គោលនយោបាយបើកចំហរ ដែលធ្លាប់បានរួមចំណែកដល់កំណើនសេដ្ឋកិច្ចខ្ពស់, ក្នុងរង្វង់៧%ក្នុង១ឆ្នាំ ក្នុងរយៈពេលជាង២ទស្សវត្សរ៍កន្លងមក។
ការវិនិយោគផ្ទាល់ពីបរទេសសម្រាប់កម្ពុជា មានការកើនឡើង១២% ក្នុងឆ្នាំ២០១៧ ដល់កម្រិតខ្ពស់បំផុតគឺ ២.៨ប៊ីលានដុល្លារអាមេរិក នៅក្នុងវិស័យហិរញ្ញវត្ថុ ទូរគមនាគមន៍ អចលនទ្រព្យ និងទំនិញកម្មន្តសាលមិនមែនវាយនភណ្ឌ ដែលធ្វើឱ្យកម្ពុជា ស្ថិតក្នុងចំណោមប្រទេសអភិវឌ្ឍន៍តិចតួច៥ប្រទេស លើពិភពលោក ទទួលបានកំណើននៃការវិនិយោគខ្ពស់ជាងគេ។
សម្តេចប្រមុខរាជរដ្ឋាភិបាល បានថ្លែងទៀតថា ការវិនិយោគផ្ទាល់ពីបរទេស ជាប្រភពហិរញ្ញវត្ថុដ៏សំខាន់ សម្រាប់ការកាត់បន្ថយភាពក្រីក្រ។
កម្ពុជាបានកាត់បន្ថយភាពក្រីក្រពី៥៣% នៅឆ្នាំ២០០៤ មកនៅត្រឹមប្រមាណ១៣.៥% នៅឆ្នាំ២០១៤។ សម្រាប់កម្ពុជា ការវិនិយោគផ្ទាល់ពីបរទេស ត្រូវបានចាត់ទុកថាជាកត្តាគន្លឹះមួយ ជួយដល់ការអភិវឌ្ឍសេដ្ឋកិច្ចជាតិ និងការសម្រេចគោលដៅអភិវឌ្ឍន៍ ប្រកបដោយចីរភាពរបស់អង្គការសហប្រជាជាតិ (SDGs)។
