ក្រចេះ៖ នៅថ្ងៃទី ១៤ កក្កដា ២០១៦ សាខាកាកបាទក្រហមកម្ពុជាខេត្តក្រចេះមានរៀបចំកិច្ចប្រជុំកសាងផែនការអភិវឌ្ឍន៏ ៦ឆ្នាំ ( ២០១៤-២០១៩ ) ដែលប្រព្រឹត្តទៅក្រោមអធិបតីភាព ឯកឧត្តម ធុន គ្រី ប្រធានគណៈកម្មាធិការសាខាកាកបាទក្រហមខេត្តក្រចេះនិង លោក កៀង វឌ្ឍនៈ ជំនួយការលេខាធិការដ្ឋានកាកបាទក្រហមកម្ពុជា ដោយមានការអញ្ជើញចូលរួមពី លោក លោកស្រីសមាជិកគណៈកម្មាធិការសាខាកាកបាទក្រហមខេត្ត លោក លោកស្រីអភិបាលស្រុក ក្រុងជាប្រធានអនុសាខា យុវជនស្មគ្រ័ចិត្ត ប្រជាសហគមន៏ផងដែរ ។
គោលបំណងនៃកិច្ចប្រជុំកសាងផែនការអភិវឌ្ឍន៏នេះ ជាតម្រូវការមួយដ៏សំខាន់ជាងគេដែលជាការចាំបាច់ដើម្បីសម្រេចអោយបាននូវគោលដៅ និងបង្កើនគុណភាពនៃកម្មវិធី និងគម្រោងរបស់សាខាកាកបាទក្រហម សំដៅផ្ដល់សេវាកម្មបានយ៉ាងត្រឹមត្រូវ ទាន់ពេលវេលា និងមានប្រសិទ្ធភាពចំពោះប្រជាពលរដ្ឋងាយរងគ្រោះនៅក្នុងប្រទេសកម្ពុជា ដោយមានការអនុវត្តតាមទស្សនៈវិស័យបេសកម្ម និងគុណតម្លែជារួមរបស់កាកបាទក្រហមដូចជា គោលការគ្រឹះគឺភាពមនុស្សធ៌ម ភាពមិនលំអៀង អព្យាក្រឹត ឯករាជ្យភាព សេវាកម្មស្ម័គ្រចិត្រនិងសកល និងមានទស្សនៈវិស័យក្នុងការចូលរួមចំណែកពន្លឿនការកាត់បន្ថយភាពក្រីក ការពារសេចក្ដីថ្លៃថ្នូរបស់មនុស្សជាតិ និងការពារតម្លៃមនុស្សធ៌មរបស់ជនរងគ្រោះ ព្រមទាំងមានបេសកម្មជាសហគមន៏ជាតិនាំមុខគេក្នុងវិស័យមនុស្សធ៌ម ជាកម្លាំងមនុស្សធ៌មប្រមូលផ្ដុំដើម្បីបន្តជួយដល់ជនរងគ្រោះបំផុតតាមរយៈ ការគ្រប់គ្រង់គ្រោះមហន្តរាយ ការថែទាំសុខភាពក្នុងសហគមន៏ និងការលើកកម្ពស់គោលការណ៏គ្រឹះ និងតម្លៃមនុស្សធ៌មរបស់ចលនាកាកបាទក្រហម ។
មានប្រសាសន៏ក្នុងកិច្ចប្រជុំ ឯកឧត្តម ធុន គ្រី ប្រធានគណៈកម្មាធិការសាខាកាកបាទក្រហមខេត្តក្រចេះ បានបញ្ជាក់ថា ដោយផ្អែកលើយុទ្ធសាស្ត្រចតុកោណរបស់រាជរដ្ឋាភិបាល និយុទ្ធសាស្ត្រអភិវឌ្ឍន៏ របស់កាកបាទក្រហមកម្ពុជា និងផ្អែកលើការចាំបាច់របស់មូលដ្ឋានដែលពាក់ព័ន្ធនិងសំណូមពរដែលកាកបាទក្រហមត្រូវបំពេញមុខងារ តួនាទីរបស់ខ្លួនដែលជាអ្នកបំរើផលប្រយោជន៏ជូនប្រជាពលរដ្ឋនៅមូលដ្ឋាន ។
ឯកឧត្តម បានបន្តថា ការបំពេញតួនាទីរបស់សាខាកាកបាទក្រហមទាំងថ្នាក់ខេត្ត ស្រុក ក្រុង ឃុំ សង្កាត់ គឺទាមទារចាំបាច់លើកគម្រោងផែនការរបស់ខ្លួនអោយច្បាស់លាស់ដើម្បីជាត្រីវិស័យនៃការប្រព្រឹត្តទៅរបស់ខ្លួនប្រកបដោយជោគជ័យគ្រប់កាលៈទេសៈ ព្រមទាំងទទួលបាននូវគោលបំណងដ៏សំខាន់នៃការអនុវត្តការងារមានគោលដៅពិតប្រាកដ ។
ឯកឧត្តម ធុន គ្រី បានសំណូមពរដល់សមាជិក សមាជិការនៃកិច្ចប្រជុំ ទាំងមូលអោយខិតខំ យកចិត្តទុកដាក់បំផុតក្នុងការក្ដាប់យកខ្លឹមសារឯកសារ និងសូមចូលរួមជាសំនួរដើម្បីបញ្ជាក់អោយបានច្បាស់លាស់ ពីខ្លឹមសារឯកសារនិមួយ របស់បទឧទ្ទេសនាមរបស់តំណាងកាកបាទក្រហមកម្ពុជានិងជួយជាគំនិតយោបល់ បទពិសោធន៏ដល់ក្រុមការងារ ដើម្បីបានជាទុនក្នុង កសាងផែនការនេះ អោយមានភាពច្បាស់លាស់ទៅតាមមូលដ្ឋាននិមួយៗទាំងក្នុងពេលបច្ចុប្បន្ន និងទៅអនាគត់ ៕
កិះ ខន
