ភ្នំពេញ៖ ទីតាំងដី-អគារ អគ្គស្នងការដ្ឋាននគរបាលជាតិ នៅសង្កាត់ទន្លេបាសាក់ ខណ្ឌចំការមននិងត្រូវរើ ទៅដាក់នៅនៅភូមិខ្វារ សង្កាត់ដង្កោ ខណ្ឌដង្កោវិញ ។
យោងតាមលិខិតរបស់ អគ្គស្នងការនគរបាលជាតិ ចុះកាលពីថ្ងៃទី២៩ ខែធ្នូ ឆ្នាំ២០១៧ ដែលចេញផ្សាយ ផ្លូវការកាលពីថ្ងៃទី២២ តុលា បានឲ្យដឹងថា “អគ្គស្នងការដ្ឋាននគរបាលជាតិ សូមអនុញ្ញតគោរព រាយការណ៍ជូន សម្ដេចក្រឡាហោម មេត្តាជ្រាបថា ទីតាំងដី-អាគារអគ្គស្នងការដ្ឋាន នគរបាលជាតិ ស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ មានសភាពចាស់ទ្រុឌទ្រោម តូចចង្អៀតខ្វះអគារសម្រាប់ កងកម្លាំងបំពេញការងារប្រចាំថ្ងៃ កន្លែងសម្រាកប្រចាំការ កន្លែងកម្លាំងហ្វឹកហាត់ ឃ្លាំងរក្សាទុកអាវុធ ចំណតរក្សាទុករថយន្ត ឃ្លាំងដាក់សម្ភារៈផ្សេងៗ និងនាយកដ្ឋានមួយចំនួន ដែលចំណុះឲ្យអគ្គស្នងការ ដ្ឋាននគរបាលជាតិ កម្លាំងបច្ចុប្បន្ននេះក៏មាន ចំនួនឡើងជាបន្ដបន្ទាប់ ធ្វើឲ្យជួបការលំបាកក្នុង ការបំពេញការងារភារកិច្ចប្រចាំថ្ងៃ ។ ម្យ៉ាងវិញទៀតនៅពេល កម្លាំងអន្តរាគមន៍ចេញប្រតិបត្តិការម្តងៗ ច្រកទ្វារចេញ ចូល មានការកកស្ទះចរាចរណ៍ ជារៀងរាល់ថ្ងៃ” ។
លិខិតរបស់អគ្គស្នងការបានបន្ដថា ដើម្បីងាយស្រួលក្នុង ការបំពេញការងារ និងកែសម្រួលទីតាំង ឲ្យមានលក្ខណៈសមស្របតាម ស្តង់ដារអគ្គស្នងការដ្ឋាននគរបាលជាតិ ស្នើសុំគោលការណ៍អនុញ្ញាតឲ្យក្រុមហ៊ុន LONG MA INVVEST AND REALESTATE Co., LTD ធ្វើការដោះដូរទីតាំងខាងលើនេះ និងសុំធ្វើប័ណ្ណកម្មសិទ្ធិ មុនធ្វើការអភិវឌ្ឍជាថ្នូរនឹង ទីតាំងដីរបស់ក្រុមហ៊ុនដែគមានទំហំ ៧០.០០០ ម៉ែត្រការ៉េ ស្ថិតនៅភូមិខ្វារ សង្កាត់ដង្កោ ខណ្ឌដង្កោ រាជធានីភ្នំពេញ និងសាងសង់អាគារ អគ្គស្នងការដ្ឋាននគរបាលជាតិទំហំ ៣២ម៉ែត្រx៦០ម៉ែត្រ កំពស់ ១០ជាន់ មានចំនួន ១អគារ, អគារស្នាក់នៅរបស់កងកម្លាំង ចំនួន២ អគារ តាមបទដ្ឋានបច្ចេកទេស លក្ខណៈស្តង់ដារទាំងគុណភាព និងសោភ័ណ្ឌភាព ព្រមទាំងបំពាក់សម្ភារៈបរិក្ខារទំនើបៗ និងរៀបចំបណ្តាញទឹក-ភ្លើង ជណ្តើរយន្តម៉ាស៊ីនត្រជាក់ និងចាក់ដីបំពេញបន្ថែម លើទីតាំងធ្វើរបងព័ទ្ធ ជុំវិញក្លោងទ្វារប៉ុស្តិ៍យាម ជូនវិញផងដែរ ។
ពាក់ព័ន្ធការដូរទីតាំងខាងលើនេះ ត្រូវបានមន្ត្រីនគរបាលជាតិជាច្រើនធ្វើការរិះគន់យ៉ាងខ្លាំងផងដែរថា អគារអគ្គស្នងការដ្ឋានចាស់នេះ បើវាទ្រុឌទ្រោមមែនអាចជុសជុលបានតើ ហើយបើខ្វះអគារ អាចសង់បន្ថែមបានតើ? ។ មន្ត្រីប៉ូលិសលើឡើងថា ក្រុមហ៊ុន បានសម្លឹងឃើញទីតាំងនេះជាដីមាស ដីល្អ សម្រាប់សាងសងអគារពាណិជ្ជកម្ម ខុនដូរ សណ្ឋាគារ ។ល។ ហើយដោះដូរឱ្យទីតាំងអគ្គៈនេះទៅកន្លែងឆ្ងាយ ជាដីមានតម្លៃថោក។ក្រុមមន្ត្រីនគរបាលបញ្ជាក់ថា នេះគេប្រើភាសាដោះដូរទីតាំង ហើយបើដោះដូរមិនមានផលចំណេញទេនោះ គេមិនដោះដូរទេ។
