ខេត្តបាត់ដំបង ៖នៅរសៀលថ្ងៃទី ២០ ខែតុលា ឆ្នាំ២០១៨ នៅចំណុចខាងមុខសាលាខេត្ត ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបងក្រុមអាជីវករប្រមាណជិត ១០០នាក់ដែលធ្លាប់លក់ដូរតាមមាត់ស្ទឺងបានធ្វើការតវ៉ា ពេលដែលអាជ្ញាធរខេត្តហាមមិនអោយលក់ដូរ នៅដងស្ទឹងសង្កែក្នុងពិធីបុណ្យអុំទូកខាងមុខដូចឆ្នាំមុនៗ ។
ក្រុមអាជីវករបានលើកឡើងថា ជារៀងរាល់ឆ្នាំក្នុងពិធីបុណ្យអុំទូក នៅស្ទឹងសង្កែនៃខេត្តបាត់ដំបង ខាងអាជ្ញាធរក្រុងបាត់ដំបង តែងតែផ្តល់ទីកន្លែងអោយពួកគាត់ដាក់លក់ដូរនៅតាមមាត់ស្ទឹងសង្កែត្រើយខាងលិច លុះនៅឆ្នាំ២០១៨នេះ ឱកាសថ្ងៃបុណ្យអុំទូកជិតចូលមកដល់ ពួកគាត់ក៏បាននាំគ្នាទិញសម្ភារៈ ចំណីអាហារត្រៀមយកមករៀបចំដាក់លក់ដូចរាល់ឆ្នាំ បែរជាត្រូវបានអាជ្ញាធរចុះហាមឃាត់មិនអោយលក់ទៅវិញ ។
គាតថា៖ បើសិនជាអាជ្ញាធរមិនអោយពួកគាត់លក់ ម្តេចក៏មិនជូនដំណឹងដល់ពួកគាត់មុន និងវាស់កន្លែងយកលុយពីពួកគាត់ធ្វើអ្វី លុះដល់ពេលគាត់ទិញសម្ភារៈចំណីអាហារត្រៀមយកមកដាក់តាំងលក់ បែរជាដេញមិនអោយពួកគាត់លក់ទៅវិញ តើសម្ភារៈនិងចំណីអាហារ ដែលទិញមកហើយយកទៅណា ? ដែលម្នាក់សុទ្ធសឹងតែខ្ចីបុលលុយគេយកមកទិញ ។
ក្នុងឱកាសនោះដែរគេឃើញមាន មានវត្តមាន លោក ផេង សិទ្ធី អភិបាលក្រុងបាត់ដំបង ចូលរួមមកដោះស្រាយដោយបង្វែរ អោយក្រុមអាជីវករ ដែលធ្លាប់ដាក់តាំងលក់នៅមាត់ស្ទឹងសង្កែត្រើយខាងលិចជារៀងរាល់ឆ្នាំក្នុងពិធីបុណ្យអុំទូក មកដាក់តាំងលក់នៅចំណុចខាងលិច និងជុំវិញសួននាគបាញ់ទឹកវិញ ដើម្បីទុកទីតាំងផ្លូវលេខ ១ និងសួនច្បារមាត់ស្ទឹងខាងលិច ចាប់ពីចំណុចគល់ស្ពានសម្តេចក្រឡាហោម ស ខេង រហូតដល់គល់ស្ពានថ្ម ថ្មី ហៅស្ពានសោហឺ អោយមានទីធ្លាសំរាប់បងប្អូនប្រជាពលរដ្ឋ ក៏ដូចជាភ្ញៀវទេសចរណ៍ដើរទស្សនាកម្សាន្តលេងនៅថ្ងៃពិធីបុណ្យអុំទូក ដែលប្រព្រឹត្តឡើងនៅថ្ងៃទី ២៣-២៤ ខែ តុលា ឆ្នាំ ២០១៨ ខាងមុខនេះ ។
ទោះជាយ៉ាងណាកដល់ព្រឹកថ្ងៃទី ២១ តុលានេះ នៅមិនទាន់ទទួលបានលទ្ធផលនៅឡើយទេ ដោយសារភាគីខាងក្រុមអាជីវករមិនទទួលយកទីកន្លែង ដែលខាងអាជ្ញាធរក្រុងចុះរៀបចំអោយនោះទេ ព្រោះទីតាំងដែលអាជ្ញាធរក្រុងរៀបចំអោយ មិនមានមនុស្សដើរឆ្លងកាត់នោះទេ តើលក់អោយនរណា ៕