កំពង់ឆ្នាំង ៖ ចាប់បានហើយឃាតករដែលសម្លាប់ក្មេងស្រីទាំងពីរនាក់បងប្អូន ស្ថិតនៅភូមិថ្មី ឃុំផ្សារ ស្រុកបរិបូណ៌ ខេត្តកំពង់ឆ្នាំងនារសៀលថ្ងៃទី ២១ ខែតុលា ឆ្នាំ ២០១៨ ។លោកឧត្តមសេនីយ៍ទោឡុចវណ្ណារ៉ាស្នងការនគរបាលខេត្តកំពង់ឆ្នាំងបានឲ្យកាសែតដឹងថាជនដៃដល់មានឈ្មោះ ឆុំ ពយ គឺជាអ្នករស់នៅជិតខាងក្មេងស្រីរងគ្រោះ ។
ជនសង្ស័យនោះបានសារភាពថា នៅមុនពេលកើតហេតុ ខ្លួនបានឡើងទៅរំលោភក្មេងស្រីជាបង តែខណៈនោះក្មេងស្រីជាប្អូនបានឃើញ និងស្រែក ។ដោយសារខ្លាចធ្វើឲ្យបែកការណ៍ ជនសង្ស័យបានយកខ្នើយ សង្កត់ដង្ហើមបណ្តាលឲ្យស្លាប់ទាំង២នាក់ភ្លាមៗតែម្ដង ។
សូមបញ្ជាក់ផងដែរថានៅក្រោយពេលកើតហេតុ សមត្ថកិច្ចក៏បានឃាត់ខ្លួនឪពុកមា និងម្ដាយមីងរបស់ជនរងគ្រោះទៅសាកសួរ ប៉ុន្តែចុងក្រោយទើបរកឃើញថា អ្នកទាំងពីរពុំបានជាប់ពាក់ព័ន្ធនឹងករណីខាងលើនេះឡើយ ។
ករណីឃាតកកម្មទៅលើក្មេងស្រីពីរនាក់បងប្អូនខាងលើនេះបានកើតឡើងកើតឡើងនៅភូមិថ្មី ឃុំផ្សារ ស្រុកបរិបូរណ៍ ខេត្តកំពង់ឆ្នាំង កាលពីថ្ងៃទី ថ្ងៃទី១៨ ខែតុលា ឆ្នាំ២០១៨ ។
ជនរងគ្រោះទាំងពីរនាក់បងប្អូនមានឈ្មោះ ទី១ អ៊ុល លក្ខណា អាយុ១៤ឆ្នាំ និងទី២ ឈ្មោះ អ៊ុល ធីតា អាយុ៧ឆ្នាំ ចំណែកឪពុកទៅធ្វើការនៅឯប្រទេសថៃ និងម្ដាយធ្វើការជាកម្មកររោងចក្រនៅទីក្រុងភ្នំពេញ ។
តាមការធ្វើកោសល្យវិច្ច័យសពកាលពីយប់ថ្ងៃទី១៨ ខែតុលា អាជ្ញាធរ បានអោយដឹងថា កុមារីរងគ្រោះឈ្មោះ អន លក្ខិណា អាយុ១៤ឆ្នាំ ត្រូវបានឃាតកវាយបំបាក់ឆ្អឹងជំនីខាងស្ដាំ វាយពកក្បាល និងដៃជើងទាំង៤ កាច់បំបាក់ ដើម្បីយកសពញាត់បញ្ចូលក្នុងហិបដាក់ខោអាវ។ ចំណែកកុមារី ឈ្មោះ ជុន មេត្តា អាយុ៧ឆ្នាំ ក៏ត្រូវបានឃាតកកាច់បំបាក់កសម្លាប់ចោល ហើយញាត់ចូលក្នុងហិបទាំង២នាក់បងប្អូនផងដែរ៕
