រាជធានីភ្នំពេញ ៖ នៅព្រឹកថ្ងៃទី១៤ ខែកក្កដា ឆ្នាំ២០១៦នេះ កម្លាំងសមត្ថកិច្ចរាជធានីភ្នំពេញ បានយកដីកាថ្មីមួយទៀត ទៅបិទនៅជញ្ជាំងផ្ទះ លោក កឹម សុខា ដោយហាមមិនឲ្យលោកធ្វើដំណើរចេញទៅក្រៅប្រទេសនោះឡើយ។
យោងតាមដីកា បានបញ្ជាក់ថា លោក កឹម សុខា ត្រូវបានដាក់ឲ្យស្ថិតនៅក្នុងការ ពិនិត្យពីបទ «បដិសេធក្នុងការចូលខ្លួន» ប្រព្រឹត្តនៅរាជធានីភ្នំពេញ កាលពីថ្ងៃទី២៦ ខែឧសភា ឆ្នាំ២០១៦ តាមមាត្រា ៥៣៨ នៃក្រមព្រហ្មទណ្ឌ ជាបទល្មើស ដែលច្បាប់តម្រូវឲ្យផ្តន្ទាទោស ដាក់ពន្ធនាគារ។ ក្នុងដីកា បានបញ្ជាក់ទៀតថា លោក កឹម សុខា ត្រូវគោរពនូវកាតព្វកិច្ច ដោយមិនត្រូវចាកចេញ ក្រៅដែនដី នៃព្រះរាជាណាចក្រកម្ពុជា នោះឡើយ។ ប្រសិនបើលោក កឹម សុខា គេចវេសដោយចេតនា ពីកាតព្វកិច្ចត្រួតពិនិត្យតាមផ្លូវតុលាការ ចៅក្រមស៊ើបសួរអាចសម្រេចឃុំខ្លួន ជនត្រូវចោទជាបណ្តោះអាសន្ន តាមមាត្រា ២៣០ នៃក្រមនីតិវិធីព្រហ្មទណ្ឌ។
លោកចៅក្រមស៊ើបសួរ ថាន់ ឡេង បានបញ្ជាឲ្យភ្នាក់ងារ មានសមត្ថកិច្ច នៃកម្លាំងសាធារណៈអនុវត្ត ឲ្យបានសម្រេចតាមខ្លឹមសារ នៃដីកាសម្រេច នឹងត្រូវរាយការណ៍ ជូនចៅក្រមស៊ើបសួរ ក្នុងករណីជនត្រូវចោទ លោក កឹម សុខា មិនគោរពតាមដីការសម្រេច ៕
