ខេត្តក្រចេះ ៖ នៅភូមិដំរ៉ែ ឃុំបឹងចារ ស្រុកសំបូរ ខេត្តក្រចេះ គិតត្រឹមវេលាម៉ោង ៦យប់ ថ្ងៃទី២០ ខែតុលានេះ មានមនុស្សស្លាប់កើនឡើងដល់ ៥នាក់ហើយ ក្នុងចំណោមអ្នកពុលដែលត្រូវបានបញ្ជូនមកមន្ទីរពេទ្យបង្អែកខេត្តក្រចេះសរុប៧៨នាក់ ។
ករណីពុលស្រា សនេះ លោក ឈ្នាង សុវុត្ថា ប្រធានមន្ទីរសុខាភិបាល ខេត្តក្រចេះ បានប្រាប់ឲ្យដឹងថា ក្នុងចំណោមអ្នកពុលទាំងនោះ គិតត្រឹមថ្ងៃនេះ មាន៤២នាក់ បានធូរស្រាល ហើយវិលត្រលប់ទៅផ្ទះវិញ ។ ដោយឡែកសំណាកស្រា ស ដែលមន្ត្រីជំនាញយកមកពិសោធន៍ត្រូវបាន លោក ឈ្នាង សុវុត្ថា អះអាងថា មិនទាន់ចេញជាលទ្ធផលនៅឡើយទេ ។
សូមរំលឹកថា ករណីពុលស្រា ស នេះបានផ្ទុះឡើង នៅភូមិដំរ៉ែ ឃុំបឹងចារ ស្រុកសំបូរ ខេត្តក្រចេះ នៅល្ងាចថ្ងៃទី ១៨ តុលា ២០១៨ នេះក្រោយពីប្រជាពលរដ្ឋនៅភូមិខាងលើបញ្ចប់ការដកស្ទូងហើយ បាននាំគ្នាទទួលទានស្រា ស ដែលផលិតនៅក្នុងភូមិរបស់គាត់ ដែលបណ្តាលឱ្យមានអ្នកពុលស្លាប់ភ្លាមៗ ៣ នាក់នាថ្ងៃដំបូង ។សមត្តកិច្ចបានឃាត់ខ្លួនមានសិប្បកម្មផលិតស្រាខាងលើនិងដកហូតស្រានិងមេផលិតស្រាមួយចំនួនបញ្ចូនទៅតុលាការ។
គួរបញ្ជាក់ដែរថា ករណីពុលស្រា ស ក្នុងស្រុកសំបូរខេត្តក្រចេះនេះកើតមានជាញឹកញាប់ ជារៀងរាល់ឆ្នាំ ហើយក្នុងឆ្នាំនេះ ក្នុងស្រុកសំបូរ មិនមែនជាលើកទី ១ទេ ប៉ុន្តែ មន្ទីរពាក់ព័ន្ធហាក់បីដូចជា មិនមានចំណាត់ការណ៍អ្វីសោះ ទៅលើទីតាំង បិទ ឬផលិតស្រា ស ក្នុងខេត្តនេះសោះមិនដឹងថាមកពីហេតុអី? ៕