ក្រចេះ៖ ឯកឧត្តម កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា បានមានប្រសាសន៍ថា សន្តិភាព គឺជាមូលដ្ឋានគ្រឹះនៃសិទ្ធិមនុស្ស និងការអភិវឌ្ឍន៍។ ប្រទេសមួយមានការអភិវឌ្ឍន៍ទៅបានលុះត្រាតែប្រទេសនោះមានសុខសន្តិភាព ហើយដើម្បីអោយសន្តិភាពនេះនៅស្ថិតស្ថេរយូរអង្វែងទៅបាន ក្នុងនាមយើងជាពលរដ្ឋត្រូវគោរពច្បាប់ទាំងអស់គ្នា។
ឯកឧត្តមប្រធានគណៈកម្មាធិការសិទ្ធមនុស្សបានមានប្រសាសន៍លើកឡើងបែបនេះ នៅក្នុងឱកាសដែលឯកឧត្តមអញ្ជើញមកធ្វើបាឋកថា នៅខេត្តក្រចេះ ដោយមានវត្តមានចូលរួមពីឯកឧត្តម ធុន គ្រី សមាជិកក្រុមប្រឹក្សាខេត្ត និងលោក ប៉ែន លីណាត អភិបាលរងខេត្ត ព្រមទាំងសិស្ស និស្សិត និងអាជ្ញាធរពាក់ពន្ធ័ នៅព្រឹកថ្ងៃទី១៨ ខែតុលា ឆ្នាំ២០១៨ ។
ឯកឧត្តម កែវ រ៉េមី បានមានប្រសាសន៍ដោយគូសបញ្ជាក់ទៀតថា ការគោពច្បាប់ តម្រូវអោយយើងទាំងអស់គ្នាយល់ដឹងអំពីសិទ្ធិមនុស្ស ដែលជាទង្វើនៃការរស់នៅប្រចាំថ្ងៃ ក្នុងលក្ខខ័ណ្ឌចាំបាច់ សម្រាប់ការរស់នៅក្នុងភាពជាមនុស្សមានក្រមសីលធម៌ និង វិន័យ។ ចំពោះការប្រើប្រាស់សិទ្ធិសេរីភាពត្រូវប្រព្រឹត្តទៅតាមលក្ខខ័ណ្ឌកំណត់នៃច្បាប់ ដែលមិនធ្វើអោយប៉ះពាល់ដល់សិទ្ធិ និងសេរីភាពអ្នកដ៏ទៃ ។
សូមបញ្ជាក់ថា គម្រោងកម្មវិធីបាឋកថានេះរៀបចំឡើងដោយគណកម្មាធិការសិទ្ធិមនុស្សកម្ពុជា សហការជាមួយរដ្ឋបាលខេត្តក្រចេះ ដោយមានការចូលរួម ពីសំណាក់មន្ត្រីរាជការ លោកគ្រូ អ្នកគ្រូ សិស្សានុសិស្ស និងប្អូនៗយុវជន សរុបប្រមាណជាង៣០០នាក់។
គោលបំណងនៃកម្មវិធីបាឋកថានេះ គឺធ្វើឡើងដើម្បីផ្សព្វផ្សាយឲ្យយុវជនយល់ដឹងកាន់តែច្បាស់អំពីសន្តិភាព ដើម្បីថែរក្សាសន្តិភាព ព្រមទាំងរួមគ្នាអភិវឌ្ឍន៍ប្រទេសឱ្យកាន់តែរីកចម្រើន៕
ដោយ កិះខន
