ខេត្តកោះកុង៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន នៅព្រឹកថ្ងៃអាទិត្យ ទី១៤ ខែតុលា ឆ្នាំ២០១៨នេះបានសន្យាជួសជុលផ្លូវជាតិលេខ៤៨ដែលខូចជាង៦០គីឡូម៉ែតឲ្យហើយទានបុណ្យសមុទ្ទ។
ប្រសាសន៍លោកស៊ុនចាន់ថុលធ្វើឡើងពេលលោក បានដឹកនាំមន្ត្រីជំនាញ និងក្រុមការងារជួសជុលផ្លូវមកពីខាងក្រសួង និងកងវិស្វកម្ម ចុះពិនិត្យ និងចាប់ផ្តើមជួសជុលផ្លូវជាតិលេខ៤៨ ឡើងវិញ។
មន្ត្រីរដ្ឋបាលខេត្តកោះកុងបានឲ្យដឹងថា ការស្ថាបនាផ្លូវខាងលើនេះ គ្រោងបញ្ចប់ក្នុងអំឡុងខែធ្នូ ឆ្នាំ២០១៨ ពោលគឺ ស្ថាបនាឲ្យហើយ នៅមុនពិធីបុណ្យសមុទ្រចូលមកដល់ ។
លោក ស៊ុន ចាន់ថុល មានប្រសាសន៍ថា ផ្លូវដែលខូចខាតនេះ មានប្រវែងរហូតដល់ទៅ ៦០គីឡូម៉ែត្រ ចែកចេញជា ៩១កន្លែង។
ទោះជាបែបនេះក្តី ពេលនេះ ក្រសួងបានដាក់គ្រឿងចក្រ ដើម្បីជួសជុល រហូតដល់ជាង ១០០គ្រឿង ទាំងខាងក្រុមមន្ត្រីជំនាញសាងសង់ របស់ក្រសួង និងខាងក្រុមកងវិស្វកម្ម ប្រយោជន៍ដើម្បីពន្លឿនឲ្យការងារជួសជុលកំណាត់ផ្លូវជាតិលេខ៤៨ ចេញ ឬចូលនាខេត្តកោះកុង ឲ្យរួចរាល់ឲ្យបានមុនពិធីបុណ្យសមុទ្រ ដែលនឹងចាប់ផ្តើមនៅចុងឆ្នាំ២០១៨នេះ។
លោក ស៊ុន ចាន់ថុលឲ្យដឹងថា៖ ការជួសជុលផ្លូវខាងលើនេះ បានប្រើថវិកា របស់រាជរដ្ឋាភិបាលទាំងស្រុង គឺមិនប្រើប្រាស់ថវិកាកម្ចី មកពីប្រទេសកូរ៉េខាងត្បូងនោះទេ ៕