ភ្នំពេញ៖ក្រសួងមហាផ្ទៃកាលពីខែសីហាបានជូនដំណឹងឲ្យអភិបាលខេត្តរតនៈគិរី មណ្ឌលគិរី និងស្ទឹងត្រែង ត្រូវចាត់វិធានការទប់ស្កាត់ និងបង្ក្រាបបទល្មើសព្រៃឈើ ឲ្យបានទាន់ពេលវេលានិងមានប្រសិទ្ធភាព តែហាក់ដូចដូចគ្មានបានការអីទាំងអស់ព្រោះបទល្មើសនៅតែកើតមានបើយោងតាមសេចក្តីរាយការណ៍របសកាសែត។
នេះបើយោងតាមលិខិត របស់ក្រសួងមហាផ្ទៃ ចុះហត្ថលេខាដោយ លោក សក់សេដ្ឋា រដ្ឋលេខាធិការក្រសួងមហាផ្ទៃ ចុះថ្ងៃទី៣១ខែសីហា ឆ្នាំ២០១៨ ដែលទើបបែកធ្លាយផ្លូវការ នៅថ្ងៃទី១៤ ខែ តុលានេះមុនតែប៉ុន្មានថ្ងៃនាយករដ្ឋមន្ត្រីត្រូវចេញទៅប្រជុំជាមួយសហគមន៍អឺរ៉ុប។
សូមបញ្ជាក់ដែរថា៖វិធានការនេះបានធ្វើឡើងក្រោយពីក្រសួងមហាផ្ទៃ បានទទួលលិខិតពីប្រតិភូសហភាពអឺរ៉ុប អំពីរបាយការណ៍ស្ដីពី “បទល្មើសជាប្រព័ន្ធ៖ ប្រទេសវៀតណាមបានបន្តនាំចូលឈើហុបខុសច្បាប់ពីកម្ពុជា”។ ពាក់ព័ន្ធបទល្មើសព្រៃឈើនេះដែរ បន្ទាប់ពីចាប់ផ្កាយរណប លើអាកាសរួចមក ឃើញថា ខេត្តមណ្ឌលគីរីមាន សកម្មភាពកាប់ បំផ្លាញព្រៃឈើយ៉ាងច្រើន សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាឲ្យអភិបាលខេត្តមណ្ឌលគីរី លោក ស្វាយ សំអ៊ាង ចុះដោះស្រាយ និងការពារចំពោះបញ្ហា ព្រៃឈើ ដើម្បីកុំឲ្យមានការកាប់ជាបន្ដបន្ទាប់ទៀត ខណៈសម្ដេចបានព្រមានជាពាក្យសម្ដីធ្ងន់ៗថា បើធ្វើរឿងនេះ មិនបានទេ គឺពិតជាមានរឿងធំ កើតឡើងជាមិនខានឡើយ។តែអ្វីដែលហួសចិត្តនៅពេលចុះត្រួតពិនិត្យកាលពីថ្ងៃ៣១កញ្ញាលោកស្វាយសំអ៊ាងរកមិនឃើញមានបទល្មើសអ្វីមួយឡើយ?ក្នុងពេលដែលច្រកដាក់ដាំណាំលៀចេញឈើដូចព្យុះ។
កាលពីថ្ងៃទី២៦កញ្ញាក្នុងពេលធ្វើសន្និបាតបូកសរុបលទ្ធផលបោះឆ្នោតខេត្តបាត់ដំបង សម្ដេច ស ខេង ក៏បានជំរុញឲ្យធ្វើវិសោនកម្មច្បាប់ គ្រប់គ្រងព្រៃឈើ ដើម្បីការពារ ធនធានធម្មជាតិព្រៃឈើ ដែលមានផលប៉ះពាល់យ៉ាងខ្លាំង នាពេលបច្ចុប្បន្ន ព្រោះច្បាប់ការពារព្រៃឈើ ពុំបានផ្ដល់អំណាចដល់អាជ្ញាធរ និងសមត្ថកិច្ចដែនដីទេ ដែលជាហេតុធ្វើឲ្យជនខិលខូចមួយ ចំនួនកាប់ ឈើខុសច្បាប់ នាំចេញជាបន្តបន្ទាប់ធ្វើឲ្យប៉ះពាល់បរិស្ថាន និងធនធានធម្មជាតិរបស់កម្ពុជា។
សម្ដេចអះអាងថា នៅអាណត្តិរាជរដ្ឋាភិបាលថ្មីនេះ សម្ដេចនឹងជំរុញការកែប្រែច្បាប់នេះ ជាចាំបាច់ ដើម្បីផ្ដល់អំណាចដល់អាជ្ញាធរដែនដី សមត្ថកិច្ច រួមគ្នាទប់ស្កាត់ និងការពារព្រៃឈើកម្ពុជា។
កាលពី ឆ្នាំ២០១៧ ទីភ្នាក់ងារស៊ើបអង្កេត ផ្នែកបរិស្ថានដែលមានមូលដ្ឋាននៅ ទីក្រុងឡុងដ៍ ចក្រ ភពអង់គ្លេស បានចេញរបាយការណ៍ មួយមានចំណងជើងថា “ជនល្មើសមុខដដែល៖ជំនួញឈើខុស ច្បាប់របស់វៀតណាម”។ របាយការណ៍នេះបានឲ្យដឹងថា ឆ្នាំ២០១៦ដល់ឆ្នាំ២០១៧ ទំហំឈើ ប្រមាណ៣០ម៉ឺនមែត្រគូប ត្រូវបានលួចលាក់នាំចេញ និងធ្វើឲ្យស្របច្បាប់ ពីប្រទេសកម្ពុជាទៅវៀត ណាម។ សកម្មភាពកាប់ឈើ ខុសច្បាប់ ក៏កើតឡើងខ្លាំងផងដែរ នៅតំបន់ការពារក្នុងខេត្តរតនគិរី ដូចជា តំបន់ការពារសហគមន៍ ក្នុងឧទ្យានវីរជ័យ ឧទ្យានជាតិអូយ៉ាដាវ និងតំបន់ជម្រកសត្វព្រៃលំផាត់។តែរដ្ឋាភិបាលមិនទទួលស្គាល់របាយការណ៍ឡើយ៕
