កំពង់ស្ពឺ ៖ ពុទ្ធបរិស័ទចំណុះជើងវត្តគីរីវង្សស្លែង មានការហួសចិត្តជាខ្លាំង នៅពេលដឹងរឿងចៅអធិការវត្ត និងគ្រូសូត្រស្តាំនាំគ្នាលួចផឹកស្រានៅក្នុងកុដិមានសង្សារផើម៥ខែតែមិនដឹងថាកូនតេជគុណអង្គណាក៏កើតទៅជាជម្លោះកាប់ចាក់គ្នាផ្អើលកាលពីវេលាម៉ោង៨យប់ ថ្ងៃទី៩តុលា ដែលជាថ្ងៃឆ្លងបុណ្យភ្ជំបិណ្ឌតែម្តង ។
អធិករណ៌ធ្វើអោយកក្រើកទាំងពុទ្ធចក្រ បានកើតឡើងនៅក្នុងវត្តគីរីវង្សស្លែង ដែលស្ថិតក្នុងភូមិតានុង ឃុំក្រសាំងអំពិល ស្រុកសំរោងទង ខេត្តកំពង់ស្ពឺ ។ សមត្តកិច្ចឲ្យដឹងថាចៅអធិការវត្តនាម សាន គឹមស៊ន បានទាញកាំបិតផ្គាប់កាប់ទៅលើគ្រូសូត្រស្តាំឈ្មោះ សុខ ប៊ុនធី បណ្តាលអោយរបួសដៃនិងភ្លៅដេរអស់៨ថ្នេរ។
ពុទ្ធបរិស័ទចំណុះជើងវត្តគីរីវង្សស្លែង បានអះអាងថា ចៅអធិការ សាន គឹមស៊ន និងគ្រូសូត្រស្តាំ សុខ ប៊ុនធី បាននាំគ្នាលួចផឹកស៊ីនៅក្នុងកុដ្ឋជាច្រើនលើកច្រើនសារណាស់មកហើយ និងលួចមានស្រីស្នេហ៌តែម្នាក់រួមគ្នាទៀតផង ប៉ុន្តែទាំងគណៈកម្មការវត្ត និងពុទ្ធបរិស័ទមិនហ៊ានមាត់ បានត្រឹមតែលួចខ្សឹបខ្សៀវគ្នា។ ខ្លះមិនពេញចិត្តចំពោះទង្វើខុសឆ្គង ប្រាស់ចាក់ពីវិន័យរបស់សង្ឃទាំង២នេះ ក៏នាំគ្នាលែងមកធ្វើបុណ្យក្នុងវត្តនេះទៀតផង។
រហូតមកដល់ថ្ងៃភ្ជំបិណ្ឌធំ នៅវេលាម៉ោង៣រសៀល ពេលដែលពុទ្ធបរិស័ទ និងគណៈកម្មការអាចារ្យវត្តត្រឡប់ទៅផ្ទះអស់ ជាឳកាសល្អថែមទាំងមានគ្រឿងចង្ហាន់ដែលគេយកមកប្រគេននៅសល់ហូរហៀរថែមទៀត ចៅអធិការវត្តនាម សាន គឹមស៊ន និងគ្រូសូត្រស្តាំនាម សុខ ប៊ុនធី ក៏បបួលគ្នាផឹកស៊ីនៅក្នុងកុដ្ឋតែ២នាក់ រហូតដល់ម៉ោង៨យប់ ពេលដែលស្រវឹងក៏ចាប់ផ្តើមរៀបរាប់ពីរឿងស្រីកំណាន់ ដែលមានផ្ទៃពោះ៥ខែ មិនដឹងជាកូនចៅអធិការ ឬកូនគ្រូសូត្រស្តាំ?។
ដល់រៀបរាប់ចុះឡើងៗក៏កើតទៅជាទំនាស់តឹងសរសៃករ ហើយសង្ឃ សាន គឹមស៊ន ក៏ទាញកាំបិទផ្គាប់កាប់ទៅលើគ្រូសូត្រស្តាំ ត្រូវចំដៃនិងភ្លៅបណ្តាលអោយរងរបួស ហើយគ្រូសូត្រស្តាំក៏ស្ទុះរត់ចេញមកក្រៅស្រែកអោយគេជួយ ទើបធ្វើអោយមានការភ្ញាក់ផ្អើលពេញវត្តតែម្តង។
តែករណីយ៍អំពើហឹង្សាសង្ឃនេះ លោកនាយប៉ូស្តិរដ្ឋបាលក្រសាំងអំពឹលបាននិយាយថា គ្រាន់តែជារឿងតូចតាច សម្រួលគ្នាទៅចប់ហើយ?!។ ប៉ុន្តែគ្រូសូត្រស្តាំមិនសុខចិត្តបានដាក់ពាក្យប្តឹងទាមទារជម្ងឺចិត្ត៥ពាន់ដុល្លារ ចំណែកចៅអធិការវត្តសុំសង៥០០ដុល្លារសិនសម្រាប់មើលជម្ងឺ។
ដោយសារបែករឿងក្រោយពីផ្ទុះកើតអធិករណ៌ នៅថ្ងៃទី១១តុលាឆ្នាំ២០១៨ អាជ្ញាធរនិងមន្ត្រីធម្មការ បានចុះទៅផ្សឹកសង្ឃទាំង២ អោយទៅជាគ្រហស្ថវិញ។ជាលទ្ធផលគេឃើញថា គ្រូសូត្រស្តាំ សុខ ប៊ុនធី បានព្រមសឹកដើរចេញពីវត្ត ប៉ុន្តែអតីតចៅអធិការវត្តនាម សាន គឺមស៊ន មិនព្រមដោះស្បង់ចីពរ និងមិនព្រមចេញពីវត្តគីរីវង្សស្លែងនោះទេ គឺនៅសំងំក្នុងវត្តដដែល។
ឯអាជ្ញាធរ និងមន្ត្រីធម្មការក៏មិនឃើញមានវិធានការអ្វីដែរ ធ្វើអោយគណៈកម្មការវត្ត និងពុទ្ធបរិស័ទចំណុះជើងវត្តទាំងអស់ កើតទុក្ខមិនសុខចិត្ត ហើយមានគំរោង ចង់លើកគ្នាទៅចាប់ដេញ ជនដែលធ្វើអោយខូចសាសនានោះចេញពីវត្ត។ មកដល់រសៀលថ្ងៃទី១៣តុលានេះ នៅមិនទាន់មានសកម្មភាពអ្វីកើតឡើងទេ៕
