បាត់ដំបងៈ កុមារីម្នាក់ដែលមានអាយុប្រមាណជាង៣ឆ្នាំត្រូវបានប្រជាពលរដ្ឋ និងសមត្ថកិច្ចប្រទះឃើញនៅក្នុងព្រៃលើភ្នំសំពៅកំពុងដេកតែម្នាក់ឯង មុនពេលដែលហ្វូងសត្វស្វាធ្វើសកម្មភាពចាប់យកហែកចែកគ្នាស៊ី ។លោក ម៉ី ឆេងលី មេប៉ុស្តិ៍នគរបាលរដ្ឋបាល ភ្នំសំពៅ បានឲ្ យដឹងថា៖ ប្រជាពលរដ្ឋ ដែលជាភ្ញៀវទេសចរណ៍ ព្រមទាំងសមត្ថកិច្ចដែលកំពុងធ្វើការ ចេញល្បាត បានប្រទះឃើញក្មេងស្រីម្នាក់ ដែលមានអាយុប្រមាណជាង៣ឆ្នាំ ត្រូវបានឪពុក ម្តាយចិត្តតិរិច្ឆានយកទៅបំបរបង់ចោល នៅលើកំពូលភ្នំសំពៅ កាលពីវេលាម៉ោង៨ និង៣០នាទី ព្រឹកថ្ងៃទី១២ ខែកក្កដា ឆ្នាំ២០១៦ ដែលទីតាំងនេះ ស្ថិតក្នុងភូមិភ្នំសំពៅលិច ឃុំភ្នំសំពៅ ស្រុកបាណន់ ខេត្តបាត់ដំបង ។
កុមារីត្រូវបានគេចងកន្សែងធ្វើជាអង្រឹងដាក់អោយដេកនៅទីនោះ តែម្នាក់ឯង ព្រមទាំងមានរបស់របរក្មេងលេងមួយចំនួននៅក្បែអង្រឹងនោះផង តែគ្មានអ្នកណាម្នាក់នៅក្បែនឹងកុមារីនេះឡើយ ។
ប្រភពពីលក់ដូរនៅជើងភ្នំបាននិយាយថា នៅម៉ោងប្រហែលជា៧ព្រឹក មុនពេលកើតហេតុមួយសន្ទុះ គេបានឃើញមានម៉ូតូសង់កូរ៉េមួយគ្រឿង ដែលមានមនុស្សប្រុសជិះគ្នាពីរនាក់ បានឌុបគ្នាជិះឡើងទៅលើខ្នងភ្នំសំពៅនេះ ព្រមទាំងមានក្មេងស្រីរូបនេះនៅអង្គុយចំកណ្តាលផង ដោយគេមិនបានដឹងថា ជនទាំងពីរនាក់នេះយកក្មេងទៅបំបរបង់ចោលបែបនេះសោះ រហូតដល់ពេលមានការភ្ញាក់ផ្អើលទើបដឹង ។
បញ្ហានេះលោកមេប៉ុស្តិ៍បានសង្កត់ធ្ងន់ថា កុមារីរូបនេះគឺជាមនុស្សមិនគ្រប់លក្ខណៈដោយជើង ដៃកំរើកមិនរួច និងដើរឬលូនក៏មិនបានដែរ សូម្បីតែនិយាយក៏មិនកើតដោយចេះតែយំតែម្យ៉ាងប៉ុណ្ណោះ ហើយក៏ជាសំណាងល្អដែរ ព្រោះបើទុកតែបន្តិចទៀតដោយគ្មានអ្នកណាឃើញទេនោះ កុមារីរូបនេះប្រាកដជាក្លាយទៅជាចំណីសត្វស្វាព្រៃជាមិនខាន ព្រោះនៅលើខ្នងភ្នំសំពៅនាពេលបច្ចុប្បន្ន សំបូរដោយសត្វស្វាយ៉ាងច្រើនផង ។
សកម្មភាពបែនេះប្រសិនបើសមត្តកិច្ចស្រាវជ្រាវរកឃើញអ្នកប្រព្រឹត្តនឹងត្រូវមានទោសពីបតប៉ុនប៉ងសម្លាប់មនុស្សជាមិនខាន។
ក្រោយពេលកើតហេតុគេមិនបានដឹងថាកុមារីរូបនេះគឺជាមនុស្សរស់នៅ ក្នុងភូមិ ឃុំណានោះទេ ដោយសារតែក្មេងស្រីរូបនេះ មិនចេះនិយាយ ដោយសមត្ថកិច្ចបានប្រគល់ទៅអោយអាជ្ញាធរឃុំ ដើម្បីនាំយកទៅដាក់នៅក្នុងមជ្ឈមណ្ឌលកុមារកំព្រា ខេត្តបាត់ដំបង៕