ខេត្តព្រះសីហនុ៖ លោក ជា សុផារ៉ា ឧបនាយរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូនីយកម្ម និងសំណង់ និងជាប្រធានគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គ.អ.ឆ.ក) អមដំណើរដោយ លោក ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ គ.អ.ឆ.ក និង ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងជាអនុប្រធាន គ.អ.ឆ.ក អាជ្ញាធរខេត្តព្រះសីហនុ និងមន្ត្រីជំនាញពាក់ព័ន្ធ បាន ចុះពិនិត្យ និងរៀបចំគម្រោងធ្វើប្រព័ន្ធចម្រោះទឹកកង្វក់ ស្ថានីយចម្រោះទឹកកង្វក់ និងស្ថានីយបូបបង្វែរទឹកកខ្វក់កុំឱ្យហូរចាក់ចូលសមុទ្រក្នុងភូមិសាស្ត្រខេត្តព្រះសីហនុកាលពីរសៀលថ្ងៃទី ១២ ខែតុលា ឆ្នាំ២០១៨ ម្សិលមិញនេះ ។
ក្នុងឱកាសនោះដែរ ឧបនាយករដ្ឋមន្ត្រី ជា សុផារ៉ា បានប្រកាសផ្តល់រថយន្តសម្រាប់សំអាតឆ្នេរចំនួនពីរគ្រឿងដល់រដ្ឋបាលខេត្តព្រះសីហនុ ទុកសម្រាប់សំអាតឆ្នេរនៅក្នុងខេត្តព្រះសីហនុដែលថ្មីៗនេះអ្នកលេងបណ្តាញសង្គមហ្វេសប៊ុកជេរពេគភូមិករណីយ៍សម្រាមបំផ្លាញបរស្ថានឆ្នេរ។
ឧកញ៉ា ម៉ុង ឫទ្ធីដែលមានវត្តមានជាមួយដែរ បានឲ្យដឹងថា ម៉ាស៊ីនសំអាតឆ្នេរនេះ នឹងបញ្ជាទិញពីប្រទេសអាល្លឺម៉ង់ ហើយមិនមែនទិញតែពីរគ្រឿង គឺទិញចំនួន៣គ្រឿង ដោយពីរគ្រឿងទុកប្រើក្នុងខេត្តព្រះសីហនុ និងមួយគ្រឿងទៀតទុកប្រើនៅក្នុងខេត្តកំពត និងខេត្តកែប។
ជាលទ្ធផលនៃការចុះនេះទី ១.បានស្ដារស្ថានីយប្រព្រឹត្តកម្មទឹកកង្វក់ចំនួន ១៦ហិកតា នៅតំបន់ឆ្នេរអូរឈើទាល ២.រៀបចំអាងស្ដុក ស្ថានីយបូមទឹកកង្វក់ នៅចំណុចអូរចំណា អូរឆ្នេរ៧ជាន់ និងស្ដារនៅតាមតំបន់មាត់សមុទ្របន្ថែមទៀត និង ៣. រៀបចំធ្វើអាងចម្រោះទឹកកង្វក់តាមអូរ ដោយចាប់ផ្ដើមដំបូងពីអូរម៉ារីយូ។