ត្បូងឃ្មុំ៖ លោកឧត្តមសេនីយ៍ ហ៊ុន ម៉ាណែត បានថ្លែងនាព្រឹកថ្ងៃទី១៤ ខែតុលានេះថា ខ្មែររួមគ្នានៅក្រោមដំបូលសុខសន្តិភាព ប្រទេសផ្សេងមិនអាចធ្វើអ្វីបានឡើយ។
លោកហ៊ុនម៉ាណែតថ្លែងបែបនេះនៅក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវអគារសិក្សានៃសាលារៀនអន្តរជាតិអាល់រ៉ូសម៉ានចំនួន ១ខ្នង មាន២ជាន់ ១០បន្ទប់ ស្ថិតនៅភូមិថ្នល់កែង ឃុំសេដា ស្រុកតំបែរ ខេត្តត្បូងឃ្មុំ ។លោកហ៊ុនម៉ាណែតមេបញ្ជាការកងទព័ជើងគោករូបនេះបានរំលឹកប្រសាសន៍សម្ដេចតេជោ ថា៖ យើងត្រូវរួមគ្នាឈរឡើងដើម្បីការពារឯករាជ្យ សន្តិភាព និងអធិបតេយ្យភាពរបស់ខ្មែរយើង មិនឱនក្បាលចំពោះនរណាទាំងអស់។
លោកបានឱ្យដឹងថា សមទ្ធិផលដែលយើងមានថ្ងៃនេះ បានដោយសារការចូលរួមពីតួអង្គសំខាន់ៗ រួមមាន សប្បុរសជនដែលមានទឹកចិត្តបរិច្ចាគថវិកាផ្ទាល់ខ្លួនចូលរួមនៅក្នុងការកសាង អាជ្ញាធរគ្រប់លំដាប់ថ្នាក់ និងប្រជាពលរដ្ឋ ដែលបានជួយសម្របសម្រួល និងជំរុញការកសាងសមិទ្ធផលនៅថ្ងៃនេះ។ តួអង្គសំខាន់មួយទៀត គឺសុខសន្តិភាព និងគោលនយោបាយត្រឹមត្រូវ របស់រាជរដ្ឋាភិបាលដែលដឹកនាំដោយសម្តេចតេជោ ដែលបង្កឱកាសឱ្យសប្បុរសជនចូលរួមអភិវឌ្ឍ ជួយប្រជាពលរដ្ឋកម្ពុជា និងផ្ដល់សិទ្ធិសេរីភាពនៅក្នុងជំនឿសាសនាផ្សេងៗនៅកម្ពុជា។ នេះគឺជាស្មារតីនៃការចូលរួម ស្មារតីរួមគ្នានៅក្នុងការកសាងនៅក្រោមដំបូលនៃសន្តិភាព។
លោកបានសង្កត់ធ្ងន់ថា គោលនយោបាយទាំងអស់ដែលយើងមាននៅថ្ងៃនេះ គឺបានមកពីការចូលរួមប្រទេសជាមិត្តជាដៃគូ ប៉ុន្តែអ្វីដែលសំខាន់បំផុត គឺយើងជាខ្មែរ យើងរួមគ្នាធ្វើក្រោមដំបូលសុខសន្តិភាពតែមួយ។ យើងបានបញ្ចប់សង្គ្រាម និងកសាងប្រទេសដោយខ្មែរតែមួយ នេះជាស្មារតីជាតិនិយមរបស់យើង ខ្មែរដើម្បីខ្មែរទាំងអស់គ្នា។
លោក ហ៊ុន ម៉ាណែត បានលើកឡើងថា យើងបានកសាងមកដល់ថ្ងៃនេះ មិនមានន័យថាយើងមិនស្វាគមន៍មិត្តភាពជាមួយបណ្តាប្រទេសនោះទេ យើងស្វាគមន៍មិត្តទាំងអស់ដែលជាមិត្តពិតប្រាកដមិនមែនជាមិត្តក្លែងក្លាយនោះទេ។ មិត្តដែលពិតប្រាកដ គឺជួយដោយចិត្តស្មោះដើម្បីផលប្រយោជន៍ប្រជាពលរដ្ឋ យើងទទួលដើម្បីឲ្យប្រជាពលរដ្ឋយើងមានបាន។