ភ្នំពេញ ៖ យុវជនពីររូបដែលដឹងថាជាមនុស្សស្និទស្នាលជាមួយលោកកែម ឡី នៅពេលដែលលោកនៅរស់ត្រូវគេឃើញថា បានភៀសខ្លួនទៅក្រៅប្រទេស បន្ទាប់ពីបានបង្ហោះសារលើបណ្ដាញសង្គមហ្វ៊េសប៊ុក កាលពីម្សិលមិញថា « ពេលនេះពួកខ្ញុំអត់មានសុវត្ថិភាពទេ ហើយ កំពុងតែនៅកន្លែងមួយ»។
យុវជនពីររូបដែលដឹងថាជាសកម្មជនបរិស្ថាន ដែលជាបងប្អូនគ្នាមានឈ្មោះថា ឈុំ ហួត និង ឈុំ ហួរ (ឈ្មោះក្នុងហ្វ៊េសប៊ុក Chum Hout Chum Hour) ធ្លាប់ត្រូវបានលោកកែម ឡី សរសើរថាជា គំរូនៃសកម្មជនបរិស្ថាន ដែលមានសេចក្ដីក្លាហាន រឹងប៉ឹង និងមោះមុតក្នុងយុគសម័យថ្មីនេះ។ ជាមួយគ្នានោះដែរ លោកកែម ឡី បានសរសេរលើទំព័រហ្វ៊េសប៊ុករបស់លោកមុនពេលត្រូវគេធ្វើឃាតថា «យុវជនពីររូបនេះដែលជាសកម្មជនបរិស្ថានពិត ចេញពីទឹកចិត្ត ស្មារតី និងសុច្ចរិតភាព ដែលសូមឲ្យសាធារជនមេត្តាផ្តល់ការគាំទ្រ លើកទឹកចិត្ត និងឧបត្ថមគាំទ្រដើម្បីបន្តសកម្មភាពឲ្យ ជាប់ជានិច្ច និងស្វិតស្វាញ»។
នៅព្រឹកថ្ងៃទី ១៤ កក្កដា ឆ្នាំ២០១៦ យុវជនសកម្មជនបរិស្ថានទាំងពីររូប បានបង្ហោះរូបថ្មីមួយទៀតខណៈពេលពួកគេទាំងពីរកំពុងស្ថិតនៅក្នុង យន្តហោះ ដោយដៃទាំងពីររបស់ពួកគេមានកាន់បង្ហាញលិខិតឆ្លងដែន និងបានសសេរ ពាក្យមួយឃ្លាថា «មានតែខោ អាវមួយកំភ្លេពាក់ជាប់នឹងខ្លួន ត្រូវបង្ខំចិត្តចាកចេញទៅទាំងអារម្មណ៍ក្ដុកក្ដួលក្រៃលែង។ លាហើយកម្ពុជាអើយ»។
សូមបញ្ជាក់ដែរថា នៅក្រោយការសម្លាប់ លោកកែម ឡីបន្តិច យុវជនទាំងពីរនេះ បានផ្តល់បទសម្ភាសន៍ ដល់អ្នកសារព័ត៌មានថា មុនការធ្វើឃាត លោកកែម ឡីមួយថ្ងៃ លោកកែម ឡី បានជួបជាមួយអ្នកទាំងពីរ។ កំឡុងអង្គុយពិភាក្សា យុវជនទាំងពីរ ព្រមទាំងលោកកែម ឡី ចាប់អារម្មណ៍ថា មានគេតាមដានរូបលោក។ យុវជនទាំង២បានរៀបរាប់ថា លោកកែម ឡីបានដឹងពីចេតនាប៉ុនប៉ងធ្វើឃាត តែលោកនៅតែមិនព្រមចាកចេញ ទៅក្រៅប្រទេសនោះទេ។