ខេត្តរតនគិរី ៖ អាជ្ញាធរខេត្តរតនគិរីត្រូវបានប្រជាពលរដ្ឋរិះគន់ថថា៖ មានភាពធូររលុងខ្លាំង ចំពោះសកម្មភាពជំនួញឈើ ខុសច្បាប់ក្នុងអាណាចក្រខ្លួន ក្នុងនាមអាជ្ញាធរគ្រប់គ្រងដែនដីខេត្តមួយនេះ ។
សេចក្តីរាយកាណ៍ឲ្យដឹងថា៖ចាប់ពីថ្ងៃទី៣០ ខែកញ្ញា ដល់ថ្ងៃទី២ ខែតុលា ឆ្នាំ២០១៨ គេបានឃើញដោយផ្ទាល់ភ្នែកពី សកម្មភាពដឹកជញ្ជូនឈើល្មើសច្បាប់ ឆ្លងចេញទៅប្រទេសវៀតណាម តាមច្រកអន្តរជាតិអូរយ៉ាដាវ នៅចំពោះមុខ សមត្ថកិច្ចជាច្រើនស្ថាប័ន ដែលមាននៅក្នុងអនុក្រឹត្យ តួនាទីភារកិច្ចប្រចាំការនៅច្រកបន្តកន្ទុយគ្នាដូច ហែកឋិន ដោយឈ្មួញប្រើរថយន្តប្រភេទ សាំយុង , បាឡែន , ឡង់គ្រីស័រកែច្នៃ , សរុបជិត៣០០គ្រឿងក្នុង ថ្ងៃ។
ក្បួនឡានខាងលើ មានឈ្មួញធំៗដែលអ្នករតនៈគិរីស្គាល់ រួមមាន ១-ឈ្មោះ ណុប ណាក់ ហៅ(ណាក់ ក្បាលធំ)ប្រើស្បែកប៉េអឹមខេត្តរតនគិរី រួមជាមួយឈ្មោះ ទូច ប្អូនអាប៉ែត ដឹកជញ្ជូនឈើតាមរថយន្តសាំយ៉ុងពាក់ស្លាក លេខ០៩០។ ទី២-ប្រពន្ឋលោក ហូវ ជីវ៉ៃ ។ ទី៣-ឈ្មោះទូច និងប្រពន្ធឈ្មោះណាត ដឹកជញ្ជូន ឈើតាមរថយន្ត ពាក់ស្លាកលេខ៥៥៨៨ និងទី៤-ឈ្មោះ នីកាចាញ ដឹកជញ្ជូន ឈើតាម រថយន្តសាំយ៉ុង ពាក់ស្លាកលេខ០៨០៨ មានទីលំនៅ ភូមិកាចាញ សង្កាត់កាចាញ ក្រុងបានលុង ខេត្តរតនគិរី។
ដើម្បីចេញរួចឈ្មួញត្រូវតែបង់លុយឲ្យសមត្ថកិច្ចជាង៥០កន្លែងទើបឆ្លងផុត។ ហាងឆេង សម្រាប់ រថយន្ត សាំយ៉ុងដឹកឈើប្រណិតមួយ បង់ ១កន្លែង ចាប់ពី ៣០ម៉ឺនរៀល ទៅ ៤០ម៉ឺនរៀល ដល់សរុប ១ខែ ឈ្មួញត្រូវចំណាយ លុយរត់ការ ចាប់ពី ១ម៉ឺនដុល្លា ឡើងទៅ។គេមិនច្បាស់ទេថា តើក្នុងមួយខែៗមេឈ្មួញទាំងនោះ បានផ្តល់ ផលប្រយោជន៍ យកទៅជូនលោកខេត្ត និងសមត្ថកិច្ចគ្រប់លំដាប់ថ្នាក់ប៉ុន្មានម៉ឺនដុល្លារនោះទេ បានជាមេឈ្មួញ ទាំងនោះអាច យកស្បែកថ្នាក់ខេត្ត ទៅពង្រឹងពង្រីកមុខជំនួញរកស៊ីដឹកជញ្ជូនឈើខុសច្បាប់ របស់ខ្លួន កាន់តែ អនាធិបតេយ្យខ្លាំងឡើង ដោយមិនខ្វល់ការរឹតបន្តឹង របស់ប្រមុខរាជរដ្ឋាភិបាល ចឹងនោះ?។
ច្រកអូរយ៉ាដាវដែលអាជ្ញាធរខេត្តរតនៈគិរីទទួលខុសត្រូវ គឺជាច្រកដែលចេញបទល្មើសព្រៃឈើ មានលក្ខណៈទ្រង់ទ្រាយធំ កើតមានជាហូរហែ ។ ក្នុងនោះអ្នកសារពតិមានដែលធ្លាប់រងគ្រោះដោយសារសមត្តកិច្ចនៅទីនោះគម្រាមបាននិយាយថា លោក អ៊ី ចំរើន ប្រធានការិយាល័យនគរបាលអន្តោ ប្រវេសន៍ច្រកអន្តរជាតិអូរយ៉ាវដាវ ត្រូវបានគេចាត់ទុកថា ជាមេខ្លោងទទួលផលប្រយោជន៍ពីបទល្មើសឆ្លងកាត់ ខណៈឲ្យមន្ត្រីខ្លួនជាអ្នកបើកច្រក ជាអ្នករារាំងសារព័ត៌មាន ។
ប្រជាពលរដ្ឋរាយការណ៍ថា ឈើដែលដឹកជញ្ជូនឆ្លងទៅប្រទេសវៀតណាមតាមច្រកអូរយ៉ាដាវ មួយចំនួនធំដឹកចេញពី ស្រុកវ៉ឺនសៃ ស្រុកកូនមុំ ស្រុកលំផាត់ ពីក្រុងបានលុង និងមួយចំនួនធំពីស្រុកបរកែវ និងស្រុកអូរយ៉ាដាវនេះតែ ម្តង ។
ជួនកាលដឹកមកតាមបណ្តាស្រុក-ក្រុង ឆ្ពោះទៅកាន់វៀតណាម តាមច្រកអន្តរជាតិអូរយ៉ាដាវ ខ្លះទៀត យកមកទុកបណ្តោះអាសន្ន នៅស្រុកអូរយ៉ាដាវក្បែរៗច្រក និងជិតអតីតស្នាក់ការរដ្ឋបាលព្រៃឈើ តាមដងផ្លូវ ដ៏អនាធិបតេយ្យ រង់ចាំលោកអ៉ី ចំរើនបើកច្រក ឈ្មួញនឹងលើកដាក់រថយន្ត ដឹកទៅកាន់ប្រទេសវៀតណាមតាម ច្រកអន្តរជាតិនេះ ក្នុងរយៈពេលបីទៅបួនថ្ងៃនឹងអស់ឈើដែលលាក់ទុកនោះតែម្តង ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកាលពីថ្ងៃទី២៦កញ្ញា បានប្រកាសពីការថតឃើញបទល្មើសព្រៃឈើក្នុងខេត្តមណ្ឌលគិរីហើយបានស្តីបន្ទោស លោក ស្វាយ សំអ៊ាង អភិបាលនៃគណៈអភិបាលខេត្តមណ្ឌលគិរី ដែលមិនបានបង្ក្រាបបទល្មើសព្រៃឈើ ។’
ដោយឡែក លោក ថង សាវុន អភិបាលនៃគណៈអភិបាលខេត្តរតនគិរី មិនទាន់រងនូវការស្តីបន្ទោសពីសម្តេច ក្រឡាហោមនៅឡើយទេ ខណៈច្រកអន្តរជាតិអូរយ៉ាដាវកំពុងចរាចរណ៍ឈើឆ្លងទៅប្រទេសវៀតណាម ហើយ តំបន់មួយចំនួនរងការកាប់បំផ្លាញព្រៃឈើ ៕