ភ្នំពេញ៖ នៅក្នុងឱកាសបុណ្យភ្ជុំបិណ្ឌនោះ សម្តេចតេជោ ហ៊ុន សែននាយករដ្ឋមន្ត្រីបានសម្រេចផ្តល់កាដូមួយថ្មីទៀត ជូនដល់ប្រជាពលរដ្ឋ ដោយបញ្ជារឱ្យសាលារាជធានីភ្នំពេញ បញ្ចេញរថយន្តក្រុង សាធារណៈ១២០គ្រឿង ដើម្បីដឹកជញ្ជូនប្រជាពលរដ្ឋក្មករដែលទទួលបានការឈប់សម្រាកចំនួន៣ នៅក្នុងឱកាសបុណ្យភ្ជុំបិណ្ឌ ដោយបើកប្រាក់ឈ្នួលមុនបុណ្យប្រពៃណីនេះផងដែរទៅមកមិនគិតថ្លៃលេងស្រុក រយៈពេល៦ថ្ងៃ នៅក្នុងឱកាសបុណ្យភ្ជុំបិណ្ឌ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានឲ្យកាសែតដឹងថា ដើម្បីសម្រួលដល់ការធ្វើដំណើររបស់ប្រជាពលរដ្ឋពីរាជធានីភ្នំពេញ ទៅខេត្តនានាក៏ដូចជាត្រឡប់ពីខេត្តនានាត្រឡប់មករាជធានីភ្នំពេញវិញឱ្យមានលក្ខណៈល្អប្រសើរនោះ។ការដឹកជូនប្រជាពលរដ្ឋទៅវិញទៅមកក្នុងឱកាសបុណ្យភ្ជុំដោយឥតគិតថ្លៃ រវាងរាជធានីភ្នំពេញទៅស្រុកកំណើតនេះ នឹងចាប់ផ្តើមធ្វើឡើងនៅរៀងរាល់ម៉ោង៥៖៣០នាទីព្រឹក ពីថ្ងៃទី០៦ ដល់ថ្ងៃទី១១ ខែតុលា ឆ្នាំ២០១៨ ដោយអនុវត្តនៅលើផ្លូវជាតិលេខ១ ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ ផ្លូវជាតិលេខ៦, ផ្លូវជាតិលេខ៧ និងផ្លូវជាតិលេខ៨។
បើតាមសេចក្ដីជូនដំណឹង ស្តីពីការបំរើសេវាដឹកជញ្ញូនសាធារណៈនិងទីតាំងចំណតសម្រាប់ដឹកជញ្ជូនបងប្អូនមន្ត្រីរាជការ កងកម្លាំងប្រដាប់អាវុធ កម្មករ កម្មការិនី និងប្រជាពលរដ្ឋពីភ្នំពេញ ទៅតាមបណ្ដាខេត្ដ និងពីបណ្តាខេត្ត មករាជធានីភ្នំពេញវិញ ដោយមិនបង់ប្រាក់ ចាប់ពីថ្ងៃទី០៦ ដល់ថ្ងៃទី១១ ខែតុលា ឆ្នាំ២០១៨ ខាងមុខនេះ ដោយចេញដំណើរចាប់ពីម៉ោង៥:៣០នាទីព្រឹក។
១-ផ្លូវជាតិលេខ១ ភ្នំពេញ-ស្វាយរៀង-ព្រៃវែង ចំណតនៅផ្លូវ៦០ម៉ែត្រ ទល់មុខក្រុមហ៊ុនម៉ែកស៊ឺដែស (Mercedes) ។
២-ផ្លូវជាតិលេខ២ ភ្នំពេញ-តាកែវ-កែប ចំណតនៅផ្លូវ៦០ម៉ែត្រ ទល់មុខក្រុមហ៊ុនម៉ែកស៊ឺដែស (Mercedes) ។
៣-ផ្លូវជាតិលេខ៣ ភ្នំពេញ-កំពត ចំណតនៅផ្សារសិនជូរីផ្លាហ្សា ។
៤-ផ្លូវជាតិលេខ៤ ភ្នំពេញ-កំពង់ស្ពឺ-ព្រះសីហនុ ចំណតនៅផ្សារសិនជូរីផ្លាហ្សា ។
៥-ផ្លូវជាតិលេខ៥ ភ្នំពេញ-កំពង់ឆ្នាំង-ពោធិ៍សាត់-បាត់ដំបង-បន្ទាយមានជ័យ ចំណតនៅសួនច្បារឬស្សីកែវ។
៦-ផ្លូវជាតិលេខ៦ ភ្នំពេញ-កំពង់ធំ-សៀមរាប ចំណតនៅផ្លូវបេតុងជ្រោយចង្វាររបស់ក្រុមហ៊ុន OCIC ខាងជើងរង្វង់មូលព្រហ្មមុខបួន។
៧-ផ្លូវជាតិលេខ៦,៧ ភ្នំពេញ-កំពង់ចាម ចំណតនៅផ្លូវបេតុងជ្រោយចង្វាររបស់ក្រុមហ៊ុន OCIC ខាងជើងរង្វង់មូលពហ្មមុខបួន។
៨-ផ្លូវជាតិលេខ៦,៨ ភ្នំពេញ-ត្បូងឃ្មុំ-ក្រចេះ-ស្ទឹងត្រែង ចំណតនៅគីឡូម៉ែត្រលេខ៩។
ជាមួយនោះដែរសាលារាជធានីភ្នំពេញ នឹងប្រើប្រាស់រថយន្តក្រុងចំនួន៩៥គ្រឿង ដើម្បីដឹកជញ្ជូនដោយមិនបង់ប្រាក់រយៈពេល០៣ថ្ងៃ ពីថ្ងៃទី០៨ ដល់ថ្ងៃទី១០ ខែតុលា ឆ្នាំ២០១៨។ ក្រៅពីនេះមន្ត្រីរាជការក៏ទទួលបានប្រាក់ឧបត្ថម្ភម្នាក់ៗ៥ម៉ឺនរៀល នៅក្នុងឱកាសបុណ្យភ្ជុំបិណ្ឌនេះថែមទៀត៕
