រាជធានីភ្នំពេញ៖បុរសម្នាក់ត្រូវខ្សែលួសម្ចាស់ស្រែរាយឆក់កណ្តុរ ឆក់ស្លាប់នៅលើភ្លឺស្រែបង្កឲ្យមានការភ្ញាក់ផ្អើលកាលពីវេលាម៉ោងជាង ៦ព្រឹក ថ្ងៃទី១៤ ខែកក្កដា ឆ្នាំ២០១៦ នៅចំណុចវាលស្រែមួយកន្លែងនៅជាប់ការដ្ឋានរបស់បុរីហាយលែន ស្ថិតក្នុងភូមិក្តីចាស់ សង្កាត់បាក់ខែងខណ្ឌជ្រោយចង្វា។
ជនរងគ្រោះឈ្មោះ ថន ហុកសេង ភេទប្រុស អាយុ៣៤ឆ្នាំ មុខរបរជាអ្នកបើកគ្រឿងចក្រឲ្យក្រុមហ៊ុនការដ្ឋានសំណង់ បុរីហាយលែន ស្នាក់នៅក្នុងការដ្ឋានជិតកន្លែងកើតហេតុ មានស្រុកកំណើតនៅខេត្តតាកែវ ចំណែកម្ចាស់ស្រែឈ្មោះ ស៊ឹម វណ្ណា ហៅ ទូច ភេទប្រុស អាយុ៥៥ឆ្នាំ។
បើតាមសមត្ថកិច្ចឲ្យដឹងទៀតថា ម្ចាស់ស្រែបានរាយខ្សែលួសតចេញពីអាគុយព័ទ្ធស្រែដែលមានទំហំប្រមាណ ជា១ហិកតាដើម្បីការពារសត្វកណ្ដុរចូលកាត់ស្រូវ ហើយជាធម្មតាព្រលឹមឡើងគាត់តែងតែមកដកភ្លើងចេញ។ ចំណែកជនរងគ្រោះតែងតែទៅរើសកណ្ដុរដែលត្រូវខ្សែភ្លើងឆក់ងាប់យកមក ធ្វើជាអាហារស្ទើរតែរាល់ថ្ងៃដែរ តែចៃដន្យអាក្រក់ព្រឹកមិញប្រហែលជាគាត់ទៅរើសកណ្តុរងាប់មុនពេល ម្ចាស់ស្រែដកភ្លើង ក៏បណ្ដាលឲ្យឆក់ លុះពេលម្ចាស់ស្រែទៅស្រែក៏ប្រទះឃើញដេកស្លាប់នៅលើវាលស្រែ ក៏រាយការណ៍ទៅសមត្ថកិច្ចបង្កឲ្យមានការភ្ញាក់ផ្អើលតែម្តង ។
ក្រោយពេលធ្វើកោសល្យវិច្ច័យសព សមត្ថកិច្ចបានធ្វើការសន្និដ្ឋានថា ជនរងគ្រោះពិតជាស្លាប់ដោយសារឆក់ខ្សែភ្លើងពិតប្រាកដមែន ហើយក៏ប្រគល់សពឲ្យសាច់ញាតិយកទៅធ្វើបុណ្យតាមប្រពៃណី ។ ចំណែកម្ចាស់ស្រែក៏ត្រូវសមត្ថកិច្ចឃាត់ខ្លួនភ្លាមៗផងដែរ ដោយចោទប្រកាន់ពីបទមនុស្សឃាតដោយអចេតនា៕