កាលពីរសៀលថ្ងៃទី ១៧ ខែមករា ឆ្នាំ២០១៤ កម្លាំងនគរបាលនាយកដ្ឋានប្រឆាំងបទល្មើសសេដ្ឋកិច្ច ក្រសួងមហាផ្ទៃដឹកនាំដោយលោកឧត្តមសេនីយ៍ត្រី ឡុង ស្រេង អនុប្រធាននាយកដ្ឋាន ព្រមទាំងមានការសម្រប សម្រួលពីលោក គឺ ប៊ុណ្ណារ៉ា ព្រះរាជអាជ្ញារងអមសាលាដំបូងរាជធានីភ្នំពេញ និងអាជ្ញាធរមូលដ្ឋានផងដែរ បានឆ្មក់ចុះឆែកឆេរទីតាំងទិញលក់ម៉ូតូគ្រប់ប្រភេទមួយកន្លែង ស្ថិតនៅផ្ទះលេខ ២៦៤Eo តាមបណ្តោយមហាវិថី ព្រះសីហនុ ក្នុងសង្កាត់បឹងកេងកងទី ១ ខណ្ឌចំការមន ជាប់អតីតរោងភាពយន្តគីរីរម្យ ។
លោកឧត្តមសេនីយ៍ត្រី ឡុង ស្រេង បានប្រាប់អ្នកកាសែតឱ្យដឹងថា ដោយទទួលបានការណែនាំចង្អុលបង្ហាញ ពី ឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិក៏ដូចជា បញ្ជាផ្ទាល់ពីលោកឧត្តមសេនីយ៍ទោ ជា សុមេធី ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច ព្រមទាំងមានការសហការពីតំណាងអយ្យការសាលាដំបូង រាជធានីភ្នំពេញផងនោះ សមត្ថកិច្ចបានចុះអនុវត្តទៅតាមពាក្យបណ្តឹងរបស់លោក ថាត់ វៃ ប្រធានក្រុមហ៊ុន M.W.METRO POLITAN INTERNATIONAL BRAL Co,Ltd ជាក្រុមហ៊ុននាំម៉ូតូម៉ាក KTM និងម៉ាក DUK ចូលផ្តាច់មុខ ។
លោកឧត្តមសេនីយ៍ត្រី ឡុង ស្រេង បន្តថា ក្រុមហ៊ុនបានរកឃើញទីតាំងមួយកន្លែងនៅជិតអតីតរោងភាព យន្តគីរីរម្យ យីហោ ដាន ចន្ធូ មានដាក់លក់ម៉ូតូម៉ាក DUK ចំនួន ៦គ្រឿង ដែលនាំមកពីប្រទេសអូទ្រីស មានបង់ពន្ធត្រឹមត្រូវ តែមិនបានឆ្លងកាត់ក្រុមហ៊ុនផ្តាច់មុខនោះទេ បានជាក្រុមហ៊ុនប្តឹងឱ្យសមត្ថកិច្ចចុះឆែកឆេរ ។ ក្រោយពីការឆែកឆេរ ក៏បានរកឃើញម៉ូតូម៉ាកដូចខាងលើចំនួន ៦ គ្រឿង ដែលក្រុុមហ៊ុននាំចូលផ្តាច់មុខបានប្តឹង សមត្ថកិច្ចបានដកហូតយកម៉ូតូទាំងនោះ យកទៅរក្សាទុកនៅនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួង មហាផ្ទៃ ដើម្បីចាត់ការទៅតាមផ្លូវច្បាប់ ហើយសមត្ថកិច្ចក៏បានអញ្ជើញម្ចាស់ទីតាំងលក់ម៉ូតូខាងលើ គឺអ្នកស្រី ដាន ចន្ធូ ទៅសាកសួរផងដែរ ។
លោកឧត្តមសេនីយ៍ត្រី ឡុង ស្រេង ក៏បានសំណូមពរដល់អាជីវករផ្សេងៗទៀត សុំឱ្យរកស៊ីអាជីវកម្មដោយ ស្របច្បាប់ កុំរំលោភសិទ្ធិលើអ្នកដទៃ នាំឱ្យប៉ះពាល់ដល់ផ្លូវច្បាប់ ។ សូមបញ្ជាក់ថា ជាញឹកញាប់គេឧស្សាហ៍ឃើញ កម្លាំងនគរបាលនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃចុះទប់ស្កាត់ និងចាប់បង្ក្រាបរាល់បទល្មើសពាក់ ព័ន្ធសេដ្ឋកិច្ចដូចជា ការក្លែងបន្លំម៉ាករបស់ផលិតផល និងការនាំចូលទំនិញគេចពន្ធជាដើម ៕