កំពង់ឆ្នាំង ៖ យោងតាមផែនការរបស់រដ្ឋបាលខេត្តកំពង់ឆ្នាំងនៅថ្ងៃទី១ ខែតុលា ឆ្នាំ២០១៨ អនុក្រុមការងារបន្លាស់ទីផ្ទះយួនជាង២០០០គ្រួសារ ដែលរស់នៅលើផ្ទះបណ្ដែតទឹក ក្នុងបឹងទន្លេសាបនោះ ឲ្យទៅរស់នៅលើដីគោកវិញឲ្យអស់ត្រឹមចុងឆ្នាំនេះ។
ជាលទ្ធផលបងប្អូនដែលនៅលើផ្ទះបណ្តែតទឹកបានស្ម័គ្រចិត្តធ្វើការបន្លាស់ទីបានមួយចំនួនហើយនៅគ្រប់គោលដែលរដ្ឋបាលខេត្តបានកំណត់។ក្នុងនោះនៅក្រុងកំពង់ឆ្នាំងបានចំនួន៧ផ្ទះនិងនៅបរិបូណ៌បាន៦០ផ្ទះហើយមកដល់ម៉ោង៣នេះ។អាជ្ញាធរខេត្តកំពង់ឆ្នាំង បានបញ្ជាក់ថា ទីតាំងថ្មី ដែលជនជាតិវៀតណាមត្រូវទៅរស់នៅនោះ គឺមិនឆ្ងាយពីទីតាំងចាស់នោះឡើយ។
លោក ឈួរ ច័ន្ទឌឿន អភិបាលខេត្តកំពង់ឆ្នាំង បានឲ្យកាសែតដឹងថា ការធ្វើបម្លាស់ទីជនជាតិវៀតណាមចំនួន២,៣៩៧គ្រួសារ ដែលរស់នៅលើផ្ទះបណ្ដែតទឹក ឲ្យទៅនៅលើគោកវិញនេះ គឺមានកិច្ចសហការជាមួយ សមាគមវៀតណាមនៅកម្ពុជា ដោយសមាគមនេះបានសហការជាមួយដៃគូឯកជន ដើម្បីផ្ដល់ទីតាំងសម្រាប់តាំងលំនៅថ្មីរបស់ជនជាតិវៀតណាមទាំងនោះ។
ទីតាំងថ្មីដែលជនជាតិវៀតណាមទាំងនោះត្រូវទៅរស់នៅ គឺ ត្រូវកំណត់ឲ្យទៅរស់នៅឃុំស្វាយជ្រុំ ស្រុករលាប្អៀរ ដោយមានទំហំដី៤០ហិកតា ដែលសមាគមវៀតណាម បានសហការជាមួយដៃគូឯកជន ដោយជួលឲ្យពួកគេរស់នៅ។
តាមផែនការរបស់អាជ្ញាធរខេត្តកំពង់ឆ្នាំង ការបម្លាស់ទីជនជាតិវៀតណាមឲ្យចេញពីបឹងទន្លេសាបនេះ គឺបានជូនដំណឹងតាំងពីឆ្នាំ២០១៥មកម្ល៉េះ ដោយដាក់កំហិតត្រូវជម្លៀសចេញឲ្យអស់នៅចុងឆ្នាំ២០១៨នេះ។ កន្លែងដែលជនជាតិវៀតណាមរស់នៅច្រើនជាងគេ គឺនៅម្តុំផ្សារក្រោម និងនៅតំបន់ឆ្នុកទ្រូ ស្ថិតក្នុង ស្រុកបរិបូរណ៌ និងនៅស្រុកកំពង់ត្រឡាច ជាដើម។
វត្តមានរបស់ជនជាតិវៀតណាម នៅលើទឹកបឹងទន្លេសាប ត្រូវបានអង្គការសង្គមស៊ីវិល ធ្វើការរិះគន់ថា បានធ្វើឲ្យខូចខាតដល់ផលប្រយោជន៍ធនធានធម្មជាតិរបស់ខ្មែរ តាមរយៈការបោះកាកសំណល់ចោលទៅក្នុងទឹក ការបង្ហៀរប្រេងម៉ាស៊ីនកាណូត ជារៀងរាល់ថ្ងៃ និងការបំពុលបរិស្ថានទឹកផ្សេងៗទៀត៕
