ភ្នំពេញ៖ រថយន្ដតូយ៉ូតាស៊េរីឆ្នាំ៦៨ដែលសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ជិះពេលតស៊ូរំដោះប្រទេសជាតិ ចេញពីរបប ប៉ុលពតត្រូវបានសម្តេចពិជ័យសេនាទៀបាញ់រដ្ឋមន្ត្រីក្រសួងការពារជាតិនិងជាប្រធានគណៈកម្មាការសាងសង់វិមានឈ្នះ-ឈ្នះ យកទៅដាក់តាំងបង្ហាញក្នុងវិមានឈ្នះឈ្នះ នាព្រឹកថ្ងៃទី០១ ខែតុលា ឆ្នាំ២០១៨នេះ ដើម្បីជាភស្តុតាងអំពីប្រវត្តិនៃការតស៊ូរំដោះជាតិ។
លោកឧត្តមសេនីយ៍ឯក យ៉ាត់ ទូច មេបញ្ជាការរង និងជានាយខុទ្ទកាល័យ បញ្ជាការដ្ឋានអង្គរក្ស បានឲ្យដឹងថា រថយន្ដដែលសម្ដេចតេជោ ហ៊ុន សែន ជិះដើម្បីចេញទៅតស៊ូរំដោះជាតិ ដើម្បីផ្ដូលរំលំរបបប្រល័យពូជសាសន៍ ប៉ុល ពតនោះ គឺម៉ាក Toyota ពណ៌ស ផលិតនៅឆ្នាំ១៩៦៨។ មកដល់ពេលបច្ចុប្បន្នរថយន្តនេះមានអាយុ ៥០ឆ្នាំហើយ។
សូមជម្រាប វិមានឈ្នះ ឈ្នះ ដែលជានិម្មិតរូបនៃសុខសន្តិភាពកម្ពុជា ហើយកំពុងសាងសង់ នៅខណ្ឌជ្រោយចង្វារ រាជធានីភ្នំពេញនេះ គ្រោងនឹងសម្ពោធជាផ្លូវការក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២៩ ខែធ្នូ ឆ្នាំ២០១៨ ខាងមុខនេះ ចំនឹងថ្ងៃដែលរាជរដ្ឋាភិបាលកម្ពុជា ប្រារព្ធពិធីខួប២០ឆ្នាំ នៃគោលនយោបាយឈ្នះ-ឈ្នះ (ឆ្នាំ១៩៩៨-ឆ្នាំ២០១៨) ផងដែរ ។
វិមានឈ្នះ ឈ្នះនេះ បានចាប់ផ្តើមសាងសង់ឡើងកាលពីខែកុម្ភៈ ឆ្នាំ២០១៦ ដោយទំហំដី៨ហិកតា ស្ថិតនៅខណ្ឌជ្រោយចង្វារ រាជធានីភ្នំពេញ។ ថវិកាដែលយកមកសាងសង់ គឺជាថវិកាបដិភាគរបស់រាជរដ្ឋាភិបាល យ៉ាងណាក៏ដោយ គេមិនបានបញ្ជាក់ថា ការចំណាយនូវការសាងសង់អស់ថវិកាប៉ុន្មាននោះឡើយ។
