ភ្នំពេញ៖ព្រះរាជក្រឹត្យ ចុះថ្ងៃទី២២ ខែកញ្ញា ឆ្នាំ២០១៨ដោយសម្តេចសាយឈុំប្រមុខរដ្ឋស្តីទី ដែលបានផ្សព្វផ្សាយជាសាធារណៈ នៅថ្ងៃទី២៦ ខែកញ្ញា ឆ្នាំ២០១៨ បានឲ្យដឹងថា៖ រាជរដ្ឋាភិបាលកម្ពុជា នីតិកាលទី៦នេះ មានទីប្រឹក្សា សរុបចំនួន ២០៧ រូប ។
ទីប្រឹក្សាមានឋានៈស្មើឧបនាយករដ្ឋមន្ត្រី ចំនួន បីរូប ឋានៈស្មើទេសរដ្ឋមន្ត្រី ១៣រូប ឋានៈស្មើរដ្ឋមន្ត្រី ៦៣រូប ឋានៈស្មើរដ្ឋលេខាធិការ ៤៥រូប និងឋានៈស្មើអនុរដ្ឋលេខាធិការ ៨៣រូប។ក្នុងនោះមានទីប្រឹក្សាជាជនបរទេស ចំនួន ១១រូបរួមមាន៖ ជនជាតិជប៉ុន ទុយនីស៊ី បារាំង អាម៉េរិក បែលហ្ស៊ិក អូស្ត្រាលី និងម៉ាឡេស៊ី។ទីប្រឹក្សាជាជនបរទេសរបស់រាជរដ្ឋាភិបាលទាំង ១១រូបនោះ រួមមាន៖ ១-លោក ហារុហ៊ីសា ហាន់ដា, ២-លោក អាស៊ីឌីន បេឆាអ៊ូជ, ៣-លោក ក្លូត ហ្គួរ ,៤-លោក ប្រេតតុន ស្ការូន្នី, ៥-លោក រ៉ាអ៊ូល ម៉ាក ជេណា, ៦-លោក អាឡាំង បេនីស៊ី ,៧-លោកស្រី ហេឡិន ចាវីស, ៨-លោក ចេន លីបគង់ ,៩-លោក តេរូអូ ជីនណៃ ,១០-លោក យ៉ាម៉ាដា យ៉ូស៊ីតាកា និង១១-លោក ចន ជី រាយស៍។
ទីប្រឹក្សាជាជនបរទេស ចំនួន ១១ រូបនេះ ក្នុងនោះ ៩ រូប មានឋានៈស្មើរដ្ឋមន្ត្រី មួយរូប មានឋានៈស្មើនឹងរដ្ឋលេខាធិការ និងមួយរូប មិនមានឋានៈស្មើអ្វីទេ។ ទីប្រឹក្សាបរទេស បួនរូប មិនទទួលប្រាក់បៀវត្សឡើយ៕
