ខេត្តរតនគីរី៖ ក្មេងជំទង់ ៣នាក់ បងប្អូន បានក្លាយជាក្មេងកំព្រាក្រោយពេលដែលឪពុកឈឺធ្ងន់អត់លុយទិញថ្នាំលេប ក៏ស្លាប់ចោលនៅក្នុងខ្ទមហើយមិនដឹងថាត្រូវធ្វើម៉េចក៏ទុករហូតបួន ប្រាំថ្ងៃមកហើយបណ្រាលឲ្យសពឡើងហើមស្អុយទើបដឹងដល់ប្រជាពលរដ្ឋ ក្នុងស្រុកអូរយ៉ាដាវ នៅរសៀលថ្ងៃទី១២ ខែកក្កដា ឆ្នាំ២០១៦។
ប្រជាពលរដ្ឋក្នុងភូមិ ប៉ក់ញៃ ឃុំប៉ក់ញៃ ស្រុកអូរយ៉ាដាវ ខេត្តរតនគីរី បាននាំគ្នាផ្អើលឈូឆ ទៅមើលសាកសព ស្អុយរលួយក្នុងខ្ទមដាច់ស្រយាលឆ្ងាយពីភូមិ ព្រមទាំងនាំគ្នាចេញមកឈរតាមដងផ្លូវ ដើម្បីបក់ដៃហៅ អ្នកធ្វើដំណើតាមផ្លូវអោយជួយចូលបុណ្យដល់សព ។ បុរសដែលស្លាប់ចោលកូននោះមានឈ្មោះ ស៊ិន បូរ៉ា អាយុ៤៩ឆ្នាំ ជនជាតិខ្មែរ មានស្រុកកំណើតនៅភូមិ កូនធ្មាត ឃុំអញ្ចើម ស្រុកត្បូងឃ្មុំ ខេត្តត្បូងឃ្មុំ មានប្រពន្ធឈ្មោះ សាន សុខុម ទើបតែស្លាប់បានប្រហែល៥ ទៅ៦ខែមុន។ពេលនេះ បន្សល់កូនកំព្រា៣នាក់ កូនបងឈ្មោះ រ៉ា សាន ប្រុស អាយុ១៣ឆ្នាំ កូនទី២ឈ្មោះ រ៉ា វិត ស្រី អាយុ ១១ឆ្នាំ និងកូន ទី ៣ ឈ្មោះ រ៉ា ស្រីម៉ៅ អាយុ ៧ឆ្នាំ។
តាមឲ្យដឹងពីអ្នកភូមិថា គ្រួសារទូរគត៍នេះ មកពីខេត្តត្បូងឃ្មុំ មករស់នៅភូមិឡំ ឃុំយ៉ាទង់ ស្រុក អូរយ៉ាដាវ។ ដោយជីវភាពតោកយ៉ាកពេក ប្រពន្ធឈឺគ្មានថ្នាំព្យាបាលក៏ស្លាប់បាត់ទៅ ហើយរូបគាត់ក៏ឈឺកាន់តែធ្ងន់។ប្រជាពលរដ្ឋក្នុងភូមិជាជនជាតិដើម ភាគតិច គេខ្លាចស្លាប់ក្នុងភូមិគេទៀត ក៏នាំគ្នាដេញគ្រួសារនេះចេញពីភូមិ គាត់ក៏នាំកូនមកទាំងឈឺ សង់ខ្ទមប្រក់តង់នៅលើដីព្រៃជិតចំការគេមួយកន្លែង ដោយពុំមានអ្នកណាដឹងនោះទេ។ ទើបតែរសៀលថ្ងៃនេះ ប្រជាពលរដ្ឋដើររកផ្សិត ក៏ប្រទះឃើញក្មេង៣នាក់អង្គុយទទូតង់ ហើយជិតនោះប្រមាណជា២០ម៉ែត្រ មានខ្ទមប្រក់តង់មួយ ពួកគាត់ក៏សួរទៅក្មេងៗ ថា ហេតុអីបានជាមកទទូរតង់នៅទីនេះ ហើយខ្ទមប្រក់តង់មួយទៀតជាខ្ទមអ្នកណា ទើបក្មេងទាំងនេះប្រាប់ថា ឪពុកគេឈឺស្លាប់នៅក្នុងខ្ទម បួនប្រាំថ្ងៃហើយ ទើបគេនាំប្អូនមកទទូរតង់នៅទីនេះ។
ក្រោយពេលប្រជាពលរដ្ឋផ្អើលឈូឆ រាយការណ៍ទៅសមត្ថកិច្ចៗ រួច លោក ងើយ ដន អធិការរង ស្រុកអូរយ៉ាដាវ ក៏ដឹកនាំកម្លាំងចុះមកដល់ជួយចាត់ចែងសព។
លោកអធិការរង ងើយ ដន ក៏បានអោយដឹងដែរថា ដោយសពនេះ មានភាពស្អុយរលួយទៅហើយនោះ ត្រូវបូរជា ដុតទាំងទាំងខ្ទមនេះតែម្ដង។ ចំណែកក្មេងទាំង ៣នាក់ ត្រូវយកទៅចិញ្ចឹមនៅស្រុកសិន រងចាំមានអង្គការណា គេយកទៅចិញ្ចឹម។
សូមបញ្ជាក់ដែរថា ៖ ក្មេងទាំង៣នាក់នៅតូចៗ មិនស្គាល់សាច់ញាតិ ហើយមិនដឹងថាក្មេងទាំងនេះមានសាច់ញាតិ ឬ អត់។ ក្រដល់ថ្នាក់ឈឺ ដេកចាំថ្ងៃស្លាប់ទាំងប្ដី ប្រពន្ធ ចំណែកកូនបងអាយុ១៣ឆ្នាំ ដើរធ្វើការអោយគេ បានប្រាក់បន្តិចបន្តួចយកមកចិញ្ចឹមឪពុកដេកឈឺ និងចិញ្ចឹមប្អូនៗ រហូតដល់ឪពុកស្លាប់មិនហ៊ានប្រាប់គេ ខ្លាចគេដេញចេញពីកន្លែងនោះទៀត៕
