មណ្ឌលគីរី ៖ ថ្មីៗនេះឯកសារសម្លេងមួយ ពីសកម្មភាពរបស់លោក អេង គីមសាន្ត ប្រធានការិយាល័យបរិស្ថានស្រុកអូររាំង បានឃាត់ម៉ូតូដឹកឈើដោយបានទាមទារប្រាក់ចំនួន១០ម៉ឺន បើមិនបាននោះទេ លោកប្រធានការិយាល័យនឹងចាត់វិធានការបង្ក្រាបត្រូវបានគេទម្លាយ ។
គេបានឮការប្រកែកគ្នារវាងលោក អេង គីមសាន្ត នឹងស្ត្រីម្នាក់ដែលរកស៊ីដឹកឈើតាមម៉ូតូ ដោយអះអាងថា ខ្លួនដឹកបន្តិចបន្តួចមិនគួរណាលោកអេង គីមសាន្ត គ្មានការយោគយល់។ជាងនេះទៅទៀត គេបានឮពីការទារប្រាក់ចំនួន១០ម៉ឺនរៀលពីសំណាក់បុរសម្នាក់ដែលគេអាចស្គាល់ថា ជាប្រធានការិយាល័យបរិស្ថានស្រុកអូររាំង តែត្រូវបានស្ត្រីនោះសុំត្រឹម៤ម៉ឺនរៀល ឡើងដល់៨ម៉ឺនរៀល។នេះជាករណីយ៍មួយតែកន្លងមកគេថ្លាប់តែឮពាក្យចចាមរាមថា លោក អេង គីមសាន្ត ប្រធានការិយាល័យបរិស្ថានស្រុកអូររាំង តែងចាប់ឃាត់ម៉ូតូដឹកឈើទារលុយចាប់ពីរ៥ម៉ឺនរៀលទៅ១០ម៉ឺនរៀល ក្នុងម៉ូតូមួយគ្រឿង។
លោកអេង គីមសាន្តនៅថ្ងៃទី២០ កញ្ញា ២០១៨ បានឲ្យកាសែតដឹងថា«ប្រហែលនិយាយច្រលំហើយគ្មានអ្នកណានៅអូររាំង ឃាត់ម៉ូតូយកលុយ១០ម៉ឺនទេ…ហើយម៉ូតូមួយគ្រឿងគ្មានផងហ្នឹង…ប្រជាពលរដ្ឋនោះឈ្មោះអី ហើយអ្នកណាគេ…និយាយឲ្យច្បាស់មើល…ថាឲ្យចំទៅ កុំឲ្យនិយាយចឹង…បរិស្ថានៗ បរិស្ថានអូររាំងច្រើនណាស់ មិនមែនសម្តៅតែខ្ញុំមួយទេណា…»។
លោក អេង គីម សាន្តថា«វាមិនដែលអ្នកណាគេ យកឈើពីប្រជាពលរដ្ឋហើយអត់ដាក់កន្លែង ហើយយកលុយពីគាត់ទៀត អាហ្នឹងវា ហួសហេតុពេកហើយ និយាយហ្នឹងវាហួសហេតុ បើគេចាប់គេដាក់នៅស្នាក់ការហើយ ក្រែកលោវា មន្ត្រីផ្សេងៗ វាចាប់យកទៅដាក់ឡាន ហើយបើគេចាប់ឈើហើយ គេយកទៅដាក់ស្នាក់ការ គេធ្វើកំណត់ហេតុហើយ វាមិនដែលគេចាប់ហើយមិនធ្វើទេ ហើយបើគេយកលុយក៏គេមិនចាប់ឈើនឹងដែល គេអនុគ្រោះឲ្យហើយ »។
លោកឌិន ប៊ុនធឿន នាយកដែនជម្រកការពារសត្វព្រៃកែវសីមាឲ្យដឹងថា«លោកអេង គីមសាន្ត បីខែមុនមានពីរម៉ូតូតែប៉ុណ្ណោះ(បញ្ជូនវត្ថុតាងទៅស្នាក់ការ)តែម្តងទេ ក្រោយមកមិនដែលឃើញទេ»។ក្រុមអ្នកតាមដានបញ្ហាបរិស្ថានសង្គមបានស្នើរដល់លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីអង្គភាពប្រ ឆាំងអំពើរពុករលួយពិសេសគឺក្រសួងបរិស្ថាន ដែលមានឯកឧត្តម សាយ សំអាល់ មេត្តាជួយត្រួតពិនិត្យពីសកម្មភាពរបស់លោកប្រធានការិយាល័យបរិស្ថានស្រុកអូររាំងផង ដែលបានប្រើសិទ្ឋអំណាចរបស់ខ្លួនធ្វើការងារផ្ទុយពីច្បាប់ ៕
