ក្រចេះ៖ ស្រុកចិត្របុរី គឺជាស្រុកមួយក្នុងចំណោមស្រុក ក្រុង ទាំង៦ ក្នុងខេត្តក្រចេះ ដែលរងផលប៉ះពាល់ធ្ងន់ធ្ងរខ្លាំងជាងគេ។ ប៉ះពាល់ឃុំចំនួន 8ឃុំ ក្នុងនោះរួមមាន ឃុំដារ បុសលាវ ថ្មគ្រែ កោះច្រែង សំបុក ថ្មអណ្ដើក គោលាប់ និងឃុំចង្ក្រង់។
ជាក់ស្ដែងនៅថ្ងៃសៅរ៍ ទី២២ ខែកញ្ញាចុងសប្ដាហ៍នេះ អាជ្ញាធរខេត្តក្រចេះ បាននាំយកពូជស្រូវចំនួន១០០តោន ប្រគល់ជូនប្រជាពលរដ្ឋដែលមានលទ្ធភាពស្ដារឡើងវិញ បន្ទាប់ពីរងគ្រោះដោយទឹកជំនន់ទន្លេមេគង្គឆ្នាំ ២០១៨ ស្ថិតនៅឃុំចំនួន៨ ក្នុងស្រុកចិត្របុរី ស្មើនឹងប្រជាពលរដ្ឋសរុបចំនួន ១៣៣៦គ្រួសារ។
ដោយឡែកនៅព្រឹកថ្ងៃដដែលនោះដែរ ឯកឧត្តម វ៉ា ថន អភិបាលខេត្តក្រចេះ អមដំណើរដោយលោកមេបញ្ជាការរងកងកម្លាំងទាំងបីប្រភេទ លោកប្រធានមន្ទីរកសិកម្មខេត្ត និងលោក ហង្ស ចាន់ឌី អភិបាលស្រុកចិត្របុរី បានចុះជួបសំណេះសំណាលជាមួយបងប្អូនប្រជាពលរដ្ឋចំនួន៣៣៦គ្រួសារ និងផ្ដលពូជស្រូវចំនួន១៧តោន នៅបរិវេណសាលាឃុំដារ។
មានប្រសាន៍សំណេះសំណាលជាមួយបងប្អូននាឱកាសនោះ ឯកឧត្តម វ៉ា ថន អភិបាលខេត្ត បាននាំមកនូវបណ្តាំផ្ញើសាកសួរសុខទុក្ខពីសំណាក់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ដែលជានិច្ចជាកាលសម្តេចទាំងទ្វេ តែងតែគិតគូរអំពីសុខទុក្ខរបស់បងប្អូនប្រជាពលរដ្ឋជានិច្ច។ ឯកឧត្តម បានជំរុញឲ្យប្រជាពលរដ្ឋទាំងអស់ត្រូវខិតខំបង្កបង្កើនផលកសិកម្មគ្រប់ប្រភេទតាមលទ្ធភាពគ្រួសារ ដើម្បីលើកកម្ពស់សេដ្ឋកិច្ច ជីវភាពរស់នៅ ក្រោយរងការខូចខាតដោយទឹកជំនន់ ទន្ទឹមគ្នានេះក៏ត្រូវប្រុងប្រយ័ត្នចំពោះបញ្ហាសុខភាពផងដែរ។
ឆ្លៀតឱកាសនេះដែរ ឯកឧត្តមអភិបាលខេត្ត បានថ្លែងអំណរគុណចំពោះបងប្អូនប្រជាពលរដ្ឋទាំងអស់ ដែលបានចូលរួមក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨កន្លងមកនេះ ដោយបានបង្ហាញឆន្ទៈតាមរយៈសន្លឹកឆ្នោត ក្នុងការជ្រើសរើសថ្នាក់ដឹកនាំប្រទេសជាតិ។ ក្នុងអាណត្តិថ្មីរបស់រាជរដ្ឋាភិបាលកម្ពុជា អាណត្តិទី៦នេះ ឯកឧត្តមប្តេជ្ញាខិតខំកសាង អភិវឌ្ឍន៍ និងបម្រើរាល់សេវាតម្រូវការរបស់ប្រជាពលរដ្ឋឲ្យកាន់តែខ្លាំងក្លាបន្ថែមទៀត ឆ្លើយតបទៅនឹងការផ្តល់នូវសេចក្តីទុកចិត្តរបស់បងប្អូន។
ប្រជាពលរដ្ឋបានសម្តែងការសាទរជាខ្លាំង ដោយទទួលបាននូវការយកចិត្តទុកដាក់ពីរាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា និងគណៈអភិបាលខេត្តក្រចេះជាពិសេស ឯកឧត្តម វ៉ា ថន ដែលជានិច្ចកាលលោកតែងតែចុះសួរសុខទុក្ខនិងបាននាំយកអំណោយចែកជូនជាប់ជាប្រចាំ និងបានថ្លែងអំណរអគុណយ៉ាងជ្រាលជ្រៅចំពោះសម្តេចតេជោ ហ៊ុន សែន ។
សូមបញ្ជាក់ថា អំណោយពូជស្រូវរបស់រាជរដ្ឋាភិបាលផ្តល់ជូននាពេលនេះ គឺមានពូជស្រូវសែនក្រអូប អ៊ីអ៊ែរ៦៦ និងពូជស្រូវសែនពិដោរ ដោយក្នុង១គ្រួសារមានផ្ទៃដីទំហំចាប់ពីកន្លះហិកតាឡើងាតៅ នឹងទទួលបានពូជស្រូវ ៥០គីឡូក្រាមឡើងដូចគ្នា៕
