ភ្នំពេញ ៖ ជម្លោះ ចោទប្រកាន់គ្នាទៅវិញទៅមករវាងចៅហ្វាយខេត្តកណ្តាលនិងក្រុមហ៊ុនឌីប៉ូ រហូតប្តឹងផ្ដល់ដល់តុលាការ និង បបួលគ្នាស្បថដល់ព្រះអង្គដងកើ មកដល់ពេលនេះ ស្ងាត់ឱ្យជ្រាបវិញ ។
ប្រភពព័ត៌មានច្បាស់ការណ៍មួយបាន បង្ហើបថា រឿងក្តីលោកម៉ៅ ភិរុណ អភិបាលខេត្តកណ្ដាល និង លោកលី សាម៉េត អគ្គនាយករងក្រុមហ៊ុនអេង ឌីប៉ូអភិវឌ្ឍន៍ដែលស្ថិតក្រោមចំណាត់ការរបស់លោកខាំ សុផារី ព្រះរាជអាជ្ញារងអមសាលាដំបូងរាជធានីភ្នំពេញ ទំនងត្រូវរ៉ូវគ្នាក្រៅប្រព័ន្ធតុលាការហើយ?! ។
សូមបញ្ជាក់ថា យោងតាមដីកាកោះអញ្ជើញរបស់លោកខាំ សុផារី ព្រះរាជអាជ្ញារងអមសាលាដំបូងរាជធានីភ្នំពេញ ចុះថ្ងៃទី១០ ខែសីហា ឆ្នាំ២០១៨ បានកោះអញ្ជើញលោក លី សាម៉េត ឱ្យចូលទៅកាន់អយ្យការអមសាលាដំបូងរាជធានីភ្នំពេញ នៅថ្ងៃទី២២ ខែសីហា ឆ្នាំ២០១៨ ដើម្បីឆ្លើយបំភ្លឺពីដំណើរ រឿង បរិហាកេរ្តិ៍ជាសាធារណៈ និង បទប្រមាថ តាមពាក្យ បណ្តឹងរបស់លោក ម៉ៅ ភារុណ អភិបាលខេត្តកណ្តាល។គ្រាន់តែមានដីកា លោកលី សាម៉េត បាន បង្ហោះសារតាមហ្វេសប៊ុកថា លោក ម៉ៅ ភិរុណ អភិបាលខេត្តកណ្តាល បានយកដីក្រុមហ៊ុន ឌីប៉ូទៅលក់ ធ្វើរបាយការណ៍កុហកសម្តេចហ៊ុនសែន ។
លោក លី សាម៉េត យោងពាក្យមស្តីប្រជាពលរដ្ឋថា លោកម៉ៅ ភិរុណបានកុហកប្រជាពលរដ្ឋហើយ ប្រជាពលរដ្ឋទាំងអស់ឆ្ងល់ថាយកស្នាមមេដៃពួកគាត់ធ្វើអ្វី? ហើយខាងលោក ម៉ៅ ភិរុណ ថា យកស្នាមមេដៃទៅ គាំទ្រសម្តេច តែផ្ទុយទៅវិញ លោក បានយកស្នាមមេដៃប្រជាជន ធ្វើរបាយការណ៍កុហកសម្តេច ហើយលោកយកដីក្រុមហ៊ុន ទៅលក់ចែកអ្នកមាន និងឧកញ៉ា មួយចំនួន(ស៊ិក) ។ លោក លី សាម៉េតអះអាង មានភ័ស្តុតាងគ្រប់គ្រាន់ មានទាំង វីដេអូឃ្លិប ។ចាំមើលៗថាតើដំរីឈ្មោះគ្នាអ្នកណាឈ្នះ។តាមធម្មជាតិគឺខ្ទេចស្មៅ?!៕