ក្រចេះ៖ ឧបករណ៍នេសាទខុសច្បាប់ជាច្រើនគ្រឿង និងជាច្រើនម៉ែត្រ ដែលជនខិលខូចតែងតែលួចធ្វើសកម្មភាពដាក់ពាំងនៅតាមអូរ ព្រែក ស្ទឹង បឹង និងនៅក្នុងដងទន្លេមេគង្គ ជាពិសេសនៅក្នុងរដូវបិទនេសាទ ត្រូវកម្លាំងសមត្ថកិច្ចចម្រុះ ចុះបង្ក្រាប និងបំផ្លាញ់ចោល។
ជាក់ស្ដែង កាលពីថ្ងៃទី១០ និងទី១១ ខែកក្កដា ឆ្នាំ២០១៦នេះ កម្លាំងសមត្ថកិច្ចចម្រុះ ចុះបង្ក្រាប និងធ្វើការបំផ្លាញ់ចោល ឧបករណ៍នេសាទខុសច្បាប់ មាន ព្រូលឬស្សីចំនួន ៥ផ្ទាំង មានប្រវែងជាង ២៥ម៉ែត្រ និងលបឬស្សី ចំនួន ៤គ្រឿង នៅនឹងកន្លែងតែម្ដង នៅតាមដងព្រែកឈ្នៃ ឋិតនៅក្នុងឃុំព្រែកសាម៉ាន់ ស្រុកឆ្លូង ខេត្តក្រចេះ។
លោក ម៉ុក ពន្លក នាយរងខណ្ឌរដ្ឋបាលជលផលក្រចេះ បានឲ្យដឹងថា កម្លាំងសមត្ថកិច្ចចម្រុះ រួមមាន ខណ្ឌរដ្ឋបាលជលផលក្រចេះ សហកាជាមួយ អាជ្ញាធរស្រុក អធិការរដ្ឋានរដ្ឋបាលជលផផលមេគង្គ នាយផ្នែករដ្ឋបាលជលផលព្រែកប្រសព្វ និងកម្លាំងសមត្ថកិច្ចទាំងបីប្រភេទ តែងតែសហការគ្នា ចុះធ្វើការបង្ក្រាបជារឿយៗនូវបទល្មើសនេសាទ ក៏ដូចជាឧបកណ៍នេសាទខុសច្បាប់ ដែលច្បាប់ហាមឃាត់មិនអោយប្រើប្រាស់ទាំងក្នុងរដូវបើក និងក្នុងរដូវបិទនេសាទ ។
លោក បានបន្តឲ្យដឹងថា ការចុះបង្ក្រាបខាងលើនោះ គឺធ្វើឡើងក្រោមការចង្អុលណែនាំពីលោក សៀន គិន នាយខណ្ឌរដ្ឋបាលជលផលក្រចេះ និងដោយមានការយកចិត្តទុកដាក់ខ្ពស់ពីថ្នាក់ដឹកនាំខេត្ត គឺឯកឧត្តម សរ ចំរុង អភិបាលនៃគណៈអភិបាលខត្តក្រចេះ និងដោយមានកិច្ចសហការល្អរវាងអាជ្ញាធរមូលដ្ឋាន ស្រុក សមត្ថកិច្ច និងប្រជាពលរដ្ឋ ដែលតែងតែយកចិត្តទុកដាក់ និងជួយផ្ដល់ប្រភពពត៌មានបានទាន់ពេលវេលា ដើម្បីងាយស្រួលចុះទប់ស្កាត់ និងបង្ក្រាប។
លោក ម៉ុក ពន្លក នាយរងខណ្ឌជលផល បានបញ្ជាក់ថា ការចុះបង្ក្រាបបទល្មើសនេសាទខុសច្បាប់នេះ គឺកម្លាំងសមត្ថកិច្ចចម្រុះ ក្រោមការដឹកនាំដោយផ្ទាល់របស់លោក នឹងចុះធ្វើការបង្ក្រាបដូចភ្លៀងរលឹមជាបន្តបន្ទាប់ទៀត ចាប់ពីថ្ងៃស្អែកនេះតទៅ នៅគ្រប់ទីកន្លែង ដែលស្ថិតនៅក្នុងដែនសមត្ថកិច្ចរបស់ខ្លួន៕
ដោយ កិះ ខន