ព្រះសីហនុ៖ ខេត្តព្រះសីហនុ៖នៅរសៀលថ្ងៃទី១៨ ខែកញ្ញា ឆ្នាំ២០១៨ នេះលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ បាន ចុះផ្ទាល់ ដើម្បីត្រួតពិនិត្យសកម្មភាពរំលោភឆ្នេរសមុទ្រ ខេត្តព្រះសីហនុ ។
បើតាមសេចក្ដីប្រកាសព័ត៌របស់ក្រសួងបានឲ្យដឹងថា៖លោក ជា សុផារ៉ាដែលទើបទទួលតំណែងជាប្រធានអាជ្ញធរជាតិដោះស្រាយទំនាស់ដីធ្លីផងនោះបាន ចុះត្រួតពិនិត្យសកម្មភាពចាក់ដីរំលោភចូលឆ្នេរសមុទ្រ នៅចំណុចឆ្នេរព្រែងត្រែង ភូមិ៤ ឃុំអូរត្រេះ ក្រុងស្ទឹងហាវ ខេត្តព្រះសីហនុគឺ អនុវត្តតាមបទបញ្ជាដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃកម្ពុជា ។
ការចុះត្រួតពិនិត្យនេះ គឺ ដើម្បីបញ្ជាឲ្យកាយយកដីដែលបានចាក់បំពេញចេញវិញ និង រក្សាឆ្នេរធម្មជាតិដូចដើម ។
ជាមួយគ្នានេះ ក្រសួងរៀបចំដែនដីនគរូបនីយកម្មនិងសំណង់ ក៏បានចេញលិខិតមួយអំពាវនាវដល់ម្ចាស់ដីនៅតាមបណ្តោយឆ្នេរសមុទ្រ ជ្រាប និង ចៀសវាង សកម្មភាពចាក់ដីរំលោភចូលឆ្នេរសមុទ្រតទៅទៀត ?។
ចាំមើលថាលោកជាសុផារ៉ាអាចរកឃើញអ្នកប្រព្រឹត្តបទល្មើសរំលោភឆ្នេរសមុទ្រយកមកផ្តន្ទាទោសបានទេ?ឬបានត្រឹមតែធ្វើឲ្យល្អមើល?។
សូមបញ្ជាក់ដែរថាក្នុងពេលចុះនោះគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាក៏បានចេញលិខិត បានព្រមានផ្អាកការសាងសង់ និងផ្អាកការធ្វើអាជីវកម្មជាបណ្ដោះអាសន្ន នូវសំណង់លំនៅឋាន ពាណិជ្ជកម្ម សេវាកម្ម សណ្ឋាគារ ភោជនីយដ្ឋាន និងរោងចក្រ ដែលមានស្រាប់ និង/ឬគម្រោងសាងសង់ថ្មី ប្រសិនបើមិនបានគោរពតាមការណែនាំ ស្ដីពីការរៀបចំអាងប្រព្រឹត្តកម្មទឹកកខ្វក់ អាងបង្គន់អនាម័យ និងប្រព័ន្ធបណ្ដាញលូនៅតាមឆ្នេរសមុទ្រខេត្តព្រះសីហនុផងដែរ។
