បន្ទាយមានជ័យ ៖ ថ្មីៗនេះ នៅតាមបណ្ដាញសង្គមហ្វេសប៊ុកមានចែករំលែកព្រោងព្រាតអំពីនារីម្នាក់ធ្វើអត្តឃាតដោយអះអាងថា នាងជាបេក្ខជនប្រលងធ្លាក់បាក់ឌុប ២០១៨។តែពុំមានឈ្មោះជនរងគ្រោះ ពេលវេលា និងទីតាំងច្បាស់លាស់ទេគ្រាន់តែថា « ក្មេងស្រីអាយុ ១៥ឆ្នាំប្រលងធ្លាក់ចងកសម្លាប់ខ្លួន និងក្រមាស្លាប់យ៉ាងអណោចអធ័ម! មានករណីធ្វើអត្តឃាត ចងកសម្លាប់ខ្លួនឯងនៅក្នុងបន្ទប់ដេក ដោយសារមានបញ្ហានៅក្នុងគ្រួសារស្ដីបន្ទោសបន្តិចបន្តួចរឿងប្រឡងបាក់ឌុបធ្លាក់ ហើយក៏សម្រេចចិត្តយកក្រមាចងកសម្លាប់ខ្លួនឯងដោយគ្មានក្រុមគ្រួសារដឹងឡើយ។
ប៉ុន្តែការពិតជាក់ស្ដែង នារីដែលធ្វើអត្តឃាតខាងលើ មិនមែនជាបេក្ខជនប្រលងបាក់ឌុបធ្លាក់នោះទេ នាងជាបុគ្គលិកកាស៊ីណូ នៅប៉ោយប៉ែតដែលស្លាប់សង្ស័យមានវិបត្តិស្នេហា។
ករណីយ៍នេះកើតឡើងនៅវេលាម៉ោងប្រហែល ៥ល្ងាចថ្ងៃទី១១ ខែកញ្ញា ឆ្នាំ២០១៨ ប្រជាពលរដ្ឋបានប្រទះឃើញនារីវ័យក្មេងម្នាក់បានធ្វើអត្តឃាតសម្លាប់ខ្លួនឯងដោយចង ក នៅនិងស្នួហាលខោអាវក្នុងបន្ទប់ដេកដោយមានវិបត្តិដោះស្រាយមិនចេញ នៅចំនុចដីស ស្ថិតក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់អ្នកយកព័ត៌មានឲ្យដឹងថាជនរងគ្រោះមានឈ្មោះជីកញ្ញា ស្រី អាយុ ១៨ឆ្នាំ ជាបុគ្គលិកកាស៊ីណូខែនទីង រស់នៅភូមិ សាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ លោក នួន នីណារ៉ូ បានបន្ថែមថានៅមុនពេលកើតហេតុនោះ ម្តាយជនរងគ្រោះបានប្រាប់អ្នកយកព័ត៌មានឲ្យដឹងថាកូនស្រីរបស់ខ្លួនបានទៅផ្សារទិញថ្នាំងុយដេក២បន្ទះយកមកលេប។
បន្ទាប់ពីលេបរួច នាងបានអារដៃខ្លួនឯង និងបានចាក់សោរទ្វារបន្ទប់ជាប់ ពេលនោះម្តាយបានយកសោរមកចាក់ឃើញកូនអារដៃខ្លួនឯងឈាមពេញបន្ទប់ក៏ហៅអ្នកជិតខាងដឹកយកទៅសង្គោះនៅមន្ទីរពេទ្យបង្អែកក្រុងប៉ោយប៉ែត។ ក្រោយពេលដែលកូនចេញពីមន្ទីរពេទ្យត្រឡប់មកផ្ទះវិញកូនបាននិយាយនឹងម៉ែថា កូនមិនបានរស់នៅថែម្តាយដូចមុនៗបន្តទៀតឡើយ។ ពេលនោះម្តាយតបវិញថាកូនកុំគិតច្រើនពេកបើមិនចង់ធ្វើការនៅកាស៊ីណូក៏ឈប់ទៅយើងមិនទាន់អត់បាយស៊ីឯណា។
ប្រភពខាងលើបានបញ្ជាក់ទៀតថា ម្តាយជនរងគ្រោះក៏ត្រឡប់ទៅផ្សារម្ដងទៀត ពេលមកដល់បន្ទប់កូនស្រីឃើញចាក់គន្លឹះជាប់នាំគ្នាធាក់ចូលស្រាប់តែឃើញកូនស្រីរបស់ខ្លួនចង ក សម្លាប់ខ្លួននៅស្នួហាលខោអាវស្លាប់មិនដឹងថ្មើរណាមកនោះទេ។ ក្រោយកើតហេតុហើយ គេបានឃើញមានសមត្ថកិច្ចចុះមកពិនិត្យសពហើយបានធ្វើការសន្និដ្ឋានថាសពនារីនេះពិតជាចង ក សម្លាប់ខ្លួនពិតប្រាកដគ្មានជាប់ពាក់ព័ន្ធអំពើឃាតកម្មនោះទេទំនងប្រហែលនារីរងគ្រោះមានវិបត្តិស្នេហាមិនអាចដោះស្រាយបាន។