ភ្នំពេញ ៖ កំណើនវត្តមានជនជាតិចិននៅស្រុកខ្មែរក្នុង១ឆ្នាំៗមានប្រមាណ១០ម៉ឺននាក់ ។ នេះបើតាមការឲ្យដឹងពីលោក សុខ ផល រដ្ឋលេខាធិការក្រសួងមហាផ្ទៃ។
ថ្លែងក្នុងកម្មវិធីជួបសំណេះសំណាលជាមួយនាយនគរបាលជាន់ខ្ពស់ និងនាយកនគរបាល នៃអគ្គនាយកដ្ឋានអន្ដោប្រវេសន៍ នៅថ្ងៃទី១៣ ខែកញ្ញា ឆ្នាំ២០១៨ លោកសុខ ផលនាយឧត្តមសេនីយ៍ចូលនីវត្តន៍ សន្ដិបណ្ឌិត បានឲ្យដឹងថា៖ កាលពីឆ្នាំ២០១៧ ចិននៅកម្ពុជាជាង១០ម៉ឺននាក់ ក៏ប៉ុន្ដែឆមាសទី២ ឆ្នាំ២០១៨ ចិនបានកើនឡើងដល់២១ម៉ឺននាក់។
ក្នុងចំណោម២១ម៉ឺននាក់នោះ ខេត្តព្រះសីហនុ មានជនជាតិចិនជាង៨ម៉ឺននាក់ ដែលក្នុងនោះចិនដែលមានបណ្ណ័ការងារនៅខេត្តព្រះសីហនុជាង២ម៉ឺននាក់។ “ពីនេះទៅដល់ដាច់ឆ្នាំ២០១៨ គឺអ្នកធ្វើមុខរបរ៥ម៉ឺននាក់ទៀត នឹងមកដល់កម្ពុជា (ជនជាតិចិន) ចឹងត្រៀមខ្លួនឲ្យហើយទៅ៥ម៉ឺននាក់ទៀត ចែកទៅកំពងសោម៥០ភាគរយ ។ កំពងសោម(ក្រុងព្រះសូហនុ)គិតទៅ១០ម៉ឺននាក់បាត់ គាត់មានផែនការច្បាស់លាស់ណាស់ ព្រោះសំណង់ឥឡូវកំពុងធ្វើច្រើនគឺសំណង់អនឡាញ”។
គោលដៅសំខាន់ៗដែលចិនមកស្រុកខ្មែរ ចំនួន៣នៅកម្ពុជា រួមមាន ទី១-ភ្នំពេញ ,ទី២-សៀមរាប និងទី៣-ព្រះសីហនុ។ លោកសុខផលបានដាក់បទបញ្ជារថា៖ប្រសិនបើជនជាតិចិនណាមួយប្រព្រឹត្តខុសទៅនឹងច្បាប់របស់កម្ពុជា គឺដឹកតាមយន្ដហោះ ទៅប្រទេសចិនភ្លាមៗតែម្តង។
នាយឧត្តមសេនីយ៍ គៀត ច័ន្ទថារិទ្ធដែលទើបចូលកាន់តំណែងជា អគ្គនាយកដ្ឋានអន្តោប្រវេសន៍ក្តៅៗក៏បានសន្យាធានាដល់ការគ្រប់គ្រងឲ្យបានច្បាស់លាស់ ក្នុងការចេញ-ចូលនូវជនអន្តោប្រវេសន៍គ្រប់ជាតិសាសន៍ទាំងអស់មិនថា តាមព្រំដែនទឹក និងគោកនោះឡើយ ខណៈក្រសួងមហាផ្ទៃអំពាវនាវឲ្យនគរបាលអន្តោប្រវេសន៍មានការប្រុងប្រយ័ត្នបន្ថែមទៀត ចំពោះជនជាតិចិនខុសច្បាប់មួយចំនួននៅខេត្តព្រះសីហនុ។
សូមរំលឹកថាដោយសារច្បាប់វិនិយោគស្រុកខ្មែរល្អមានច្បាប់អាចឲ្យជនបរទេសទិញផ្ទះជាន់ទីមួយធើជាកម្មសិទ្ធបាន ក៏ដូចជាមេដឹកនាំអាជ្ញាធរចិនខ្មែរប្រកាសពីយុទ្ធសាស្ត្រចំណងសាមគ្គីភាពគ្រប់ជ្រុងជ្រោយបានធ្វើឲ្យទំហំពាណិជ្ជកម្ម កម្ពុជា-ចិនកើនឡើងឥឈប់។មានការប៉ាន់ស្មានថាការរកស៊ីជាមួយចិន នឹងកើនឡើងដល់៦,០០០លានដុល្លារ នៅឆ្នាំ២០២០ ខណៈកម្ពុជាមានមហិច្ឆតាចង់ស្រូបយកទេសចរចិនឲ្យបានដល់១លាននាក់កាលឆ្នាំ២០១៧ នឹងឈានដល់២លាននាក់នៅឆ្នាំ២០២០ ។សូមបញ្ជាក់ដែរថាកន្លងមកមានការប៉ាន់ស្មានលក្ខណៈប្រជាសាស្ត្រថាផ្ទៃដីស្រុកខ្មែរល្មមអាចដាក់បានមនុស្ស២៥លាននាក់។
