មណ្ឌលគិរី ៖ ឯកឧត្តម ស្វា្ងយ សំអ៊ាង អភិបាលនៃគណៈអភិបាលខេត្តមណ្ឌលគិរី បានមានប្រសាន៍សង្កត់យ៉ាងធ្ងន់ទៅលើការការពារអភិរក្សព្រៃឈើក្នុងតំបន់អភិរក្សជីវៈចម្រុះ ដើម្បីឲ្យមានធនធានធម្មជាតិកើនឡើងក្នុងប្រទេស ក៍ដូចជាការចូលរួមគ្នាដាំដើមឈើបង្កើននៅសម្បត្តិធម្មជាតិ ។
ឯកឧត្តមថ្លែងដូច្នេះ ក្នុងកម្មពិធីបុណ្យរុក្ខាទិវា ដែលប្រារព្ធឡើងនៅព្រឹកថ្ងៃទី០៥ កក្ដដាឆ្នាំ២០១៦ ស្ថិតក្នុងភូមិអូរណា ឃុំស្រែខ្ទុម ស្រុកកែវសីមា ដែលមានការចូលរួមពីសំណាក់ មន្ដ្រីរាជការ កងកម្លាំងប្រដាប់អាវុធទាំងបីប្រភេទ និងប្រជាពលរដ្ឋប្រមាណជាង៤០០នាក់។
ឯកឧត្តម ស្វាយ សំអ៊ាង បានមានប្រសាសន៍បន្ដថា ដើម្បីធានាឲ្យមាននូវការគ្រប់គ្រងព្រៃឈើមានភាពជានិរន្ដរ ផ្ដល់ផលប្រយោជន៍សម្រាប់សង្គមជាតិ សេដ្ឋកិច្ច និងបរិស្ថាន ក៍ដូចជាបញ្ជៀសនូវរាល់បញ្ហា គ្រោះរាំងស្ងួត គ្រោះធម្មជាតិ ចូលយើងទាំងអស់គ្នារួមដាំឈើឡើងវិញ និងរួមគ្នាទប់ស្កាត់នូវការកាប់បំផ្លាញព្រៃឈើគ្រប់សកម្មភាព ។
ឯកឧត្តមបានផ្ដាំផ្ញើរដល់គ្រប់មន្ដ្រីជាន់ថ្នាក់ ក៍ដូចជា អាជ្ញាធរមូលដ្ឋាន រួមទាំងបងប្អូនប្រជាជលរដ្ឋទាំងអស់ ត្រូវតែយកចិត្តទុកដាក់ចំពោះបញ្ហាថែរក្សាការពារព្រៃឈើដើម្បីអភិវឌ្ឍន៍ ព្រោះព្រៃឈើជាសម្បត្តិធម្មជាតិមួយដ៍មានតម្លៃរបស់ជាតិយើង ដើម្បីឲ្យមានការចូលរួមចំណែកការពារព្រៃឈើ និងឲ្យប្រជាពលរដ្ឋក្នុងមូលដ្ឋានមានឱកាសទទួលបានផលពីព្រៃឈើ ឯកឧត្តមបានសម្រេចកំណត់យកទីតាំងនៅ សួនអាពាហ៍ពិពាហ៍កែវសីមា ស្ថិតក្នុងភូមិអូរណា ឃុំស្រែខ្ទុម ស្រុកកែវសីមា ដើម្បីប្រារព្ធពិធីបុណ្យរុក្ខាទិវា ដែលមានការដាំកូនឈើជាប្រភេទដូចជា បេង នាងនួន ក្រញូង ធ្នង់ គគីរ កកោះ ឈើទាល ផ្អៀក មានចំនួន៣០០ដើម និងដាំនៅលើផ្ទៃដីចំនួន២ហិចតាផងដែរ។
ជាចុងក្រោយនៃកម្មពិធី ឯកឧត្តម ស្វាយ សំអ៊ាង អភិបាលនៃគណៈអភិបាលខេត្តមណ្ឌលគិរី មានប្រសាសន៍ថា ដើម្បីធានាដល់ការប្រើប្រាស់ធនធានព្រៃឈើប្រកបដោយសមធម៌នោះ មានការចួលរួមពីសមាជិកសហគមន៍ ដើម្បីអភិវឌ្ឍន៍សហគមន៍បង្កើនជីវភាពរស់នៅ និងកាត់បន្ថយភាពក្រីក្ររបស់ប្រជាជននៅជនបទ កន្លងមក មានការចូលរួមយ៉ាងសកម្មពីសំណាក់អាជ្ញាធរមូលដ្ឋាន រដ្ឋបាលព្រៃឈើ អង្គភាពមន្ទីរពាក់ព័ន្ធ ព្រមទាំងអង្គការអន្ដរជាតិនានា ដោយបានឧបត្ថម្ភទាំងថវិកា សម្ភារៈ និងការផ្សព្វផ្សាយចំណេះដឹង ឲ្យប្រជាពលរដ្ឋបានយល់ដឹងនូវបញ្ហាថែរក្សាព្រៃឈើទាំងនេះ៕