ភ្នំពេញ ៖ ក្រសួងមហាផ្ទៃបានប្រកាស ថា នឹងបន្ដស្រាវជ្រាវស៊ើបអង្កេត ឲ្យបានល្អិតល្អន់ថែមទៀត ទៅលើឃាតកម្ម បាញ់សម្លាប់ លោកបណ្ឌិត កែម ឡី អ្នកវិភាគបញ្ហាសង្គម និងនយោបាយ នៅព្រឹកថ្ងៃទី១០ ខែកក្កដា ឆ្នាំ២០១៦។សេចក្ដីប្រកាសព័ត៌មានរបស់ក្រសួងមហាផ្ទៃ បានឲ្យដឹង ថា នៅព្រឹកថ្ងៃទី១០ កក្កដា នៅក្នុងទីតាំង Star Mart នៃស្ថានីយ៍ប្រេងឥន្ធនៈ Caltex បូកគោ ស្ថិតនៅលើកាច់ជ្រុង មហាវិថីព្រះមុនីវង្ស និងមហាវិថីម៉ៅសេងទុង ក្នុងភូមិសាស្ដ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ បានកើតមានករណី បាញ់ប្រហារមួយ ដែលបានបណ្ដាលឲ្យ លោកបណ្ឌិត កែម ឡី អាយុ៤៦ឆ្នាំ មានមុខរបរ ជាប្រធានអង្គការ អភិវឌ្ឍន៍សង្គម មានទីលំនៅផ្ទះលេខ ០៨EO ផ្លូវលេខ៣៩២ សង្កាត់បឹងកេងកង១ ខណ្ឌចំការមន រាជធានីភ្នំពេញ បានទទួលមរណភាព នៅក្នុងព្រឹត្ដិការណ៍នោះ ។
សេចក្ដីប្រកាសព័ត៌មាន បានឲ្យដឹងបន្ដ ថា បន្ទាប់ពីព្រឹត្ដិការណ៍ បាញ់ប្រហារ ជនល្មើសបានរត់គេចខ្លួន ហើយត្រូវបាន ប្រជាពលរដ្ឋ ស្រែកឆោឡោ រហូតកម្លាំងសមត្ថកិច្ច ដេញពីក្រោយ ហើយចាប់ខ្លួនបាន នៅលើដងវិថីសុធារស ក្បែរវត្ដស្វាយពពែ ក្នុងសង្កាត់ទន្លេបាសាក់ ខណ្ខចំការមន រាជធានីភ្នំពេញ ដែលមានជាប់ខ្លួន នូវអាវុធខ្លីមួយដើម ម៉ាកឡុក។
បន្ទាប់ពីការចាប់ខ្លួន ជនដៃដល់ បានសារភាពថា រូបគេមានឈ្មោះ ជួប សម្លាប់ អាយុ៣៨ឆ្នាំ មានទីកន្លែងកំណើត នៅស្រុកស្វាយចេក ខេត្ដបន្ទាយមានជ័យ ហើយបានទៅរស់នៅ ប្រកបរបប ធ្វើជាកម្មករចំការដំណាំ នៅខេត្ដស្រះកែវ ប្រទេសថៃ។ ជាមួយនឹងការរៀបរាប់ នូវហេតុការណ៍នេះ ក្រសួងមហាផ្ទៃ ក៏បានចូលរួមរំលែកទុក្ខ ដ៏ក្រៀមក្រំនេះ ជាមួយក្រុមគ្រួសារនៃសព និងសូមថ្កោលទោស យ៉ាងដាច់អហង្កា ចំពោះទង្វើមនុស្សឃាត ដ៏សាហាវឃោរឃៅនេះ ព្រមទាំងបន្ដចាត់វិធានការ ស្រាវជ្រាវស៊ើបអង្កេត ឲ្យបានល្អិតល្អន់ថែមទៀត តាមនីតិវិធី ដើម្បីបញ្ជូនជនល្មើស និងអ្នកផ្សំគំនិត ទៅតុលាការ ធ្វើការផ្ដន្ទាទោស ទៅតាមផ្លូវច្បាប់ ជាធរមាន។
អ្នកនាំពាក្យក្រសួងមហាផ្ទៃ ក៏អំពាវនាវដល់សាធារណជន ជាតិ-អន្ដរជាតិ និងបណ្ដាញផ្សព្វផ្សាយ ទាំងអស់ មេត្ដាទុកលទ្ធភាព ឲ្យកម្លាំងមានសមត្ថកិច្ច បន្ដកិច្ចការរបស់ខ្លួន តាមជំនាញ ជៀសវាង ផ្សព្វផ្សាយព័ត៌មាន មិនច្បាស់លាស់ ដែលអាចនាំឲ្យមតិសាធារណៈ មានការយល់ច្រឡំ។ករណីនេះដែរលោកឧត្តមេននីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានបញ្ជាក់នៅក្នុងសន្និសីទកាសែតនៅរសៀលថ្ងៃទី១០ ខែកក្កដា នេះថានឹងបន្តស្វែងរកការពិតពីជនដៃដល់ដែលជាជនសង្ស័យបាញ់សម្លាប់លោក កែមឡីដែលសមត្ថកិច្ចចាប់ខ្លួន គឺជាឃាតករបាញ់សម្លាប់លោកកែម ឡី ។
លោកបានបញ្ជាក់ថា ឃាតករបានបាញ់ទៅលើលោកកែម ឡី ចំនួនពីរគ្រាប់ ទី១.ត្រូវក្បាលបៀមគ្រាប់ និងទី២.ត្រូវដើមដៃធ្លាយមកក្រោមដោះ និងមានភស្តុតាងគ្រប់គ្រាន់ដើម្បីដាក់បន្ទុក។ ហើយឈ្មោះជនសង្ស័យគឺមិនដែលជួបទេ តាមការឆ្លើយសារភាព គេមានឈ្មោះ ជួប សម្លាប់។ ហើយឈ្មោះនេះ មិនអាចជាឈ្មោះពិតប្រាកដទេ និងស្ថិតនៅក្នុងការស្រាវជ្រាវរបស់សមត្ថកិច្ចជាបន្តទៀត។ ចំពោះកាំភ្លើងដែលជនដៃដល់បាញ់លោកកែម ឡី គឺជាកាំភ្លើងម៉ាកឡុក។ ហើយចំពោះករណីនេះ លោកនៅមិនទាន់អាចបញ្ជាក់បានទេ នៅពេលស្រាវជ្រាវបានគ្រប់គ្រាន់ទើបអាចបញ្ជាក់បាន។ ហើយសមត្ថកិច្ចអត់បណ្តោយទេ គឺខិតខំធ្វើបញ្ហានេះ នៅពេលបានលទ្ធផល និងផ្តល់ព័ត៍មានបន្ថែមទៀត។លោកឧត្តមេននីយ៍ ជួន សុវណ្ណបញ្ជាក់ថា៖ ចំពោះការឆ្លើយសារភាពរបស់ជនសង្ស័យព្រោះជំនាញរបស់សមត្ថកិច្ចមិន អនុញ្ញាតឲ្យរាយការណ៍អំពីចម្លើយដែលជាពន្លឺនៃការស្រាវជ្រាវបន្តរបស់ សមត្ថកិច្ចទេ។ជនដៃដល់នឹងត្រូវបញ្ជូនទៅតុលាការនាព្រឹកថ្ងៃទៅ១១ កក្កដាឆ្នាំ២០១៦។
លោក ជា មុនីប្រធានសហជីពសេរីកម្មករនៃព្រះរាជាណាចក្រកម្ពុជា ដែលបានទៅពិនិត្យដល់កន្លែងកើតហេតុ នៃការបាញ់សម្លាប់លោកកែម ឡី នៅព្រឹកថ្ងៃទី១០ កក្កដានេះ បានបញ្ជាក់ប្រាប់ក្រុមអ្នកសារព័ត៌ មានថា ការបាញ់សម្លាប់លោកកែម ឡីនៅពេលនេះ ជាករណីដូចគ្នា ទៅនឹងការបាញ់សម្លាប់លោកជា វិជ្ជា ដែលជាបងប្រុសរបស់លោក កាលពីឆ្នាំ២០០៤ដែរ ។ លោកថា ឃាតកហាក់មានសំអាង ដោយ គ្មានភ័យខ្លាចអ្វីទាំងអស់ ហើយលោកជា មុនីអះអាងថា ករណីបាញ់សម្លាប់លោកកែម ឡី មិនមែន ជា រឿងឯកជនផ្ទាល់ខ្លួន នោះទេ…..។
សពលោកកែមឡីត្រូវបានដង្ហែរតាមរថយន្តរបស់លោកផ្ទាល់ទៅតំកល់ ធ្វើបុណ្យនៅវត្តក្តីចាស់តាមបណ្តោយផ្លូវជាតិលេខ៦ក្នុងឃុំបាក់ ខែងខណ្ឌជ្រោយចង្វររាជធានីភ្នំពេញ។
លោកកែម ឡី កើតក្នុងគ្រួសារក្រីក្រមួយនៅ ភូមិអង្គតាកុក ឃុំលាយបូ ស្រុកត្រាំកក់ ខេត្តតាកែវ។ បច្ចុប្បន្ន លោករស់នៅរាជធានីភ្នំពេញ។ឪពុករបស់លោកដែលជាសាស្ត្រាចារ្យ បានស្លាប់នៅជំនាន់ ប៉ុល ពត ធ្វើឲ្យលោក និងបងប្អូនប្រុសស្រីពីរនាក់ទៀត ក្លាយជាកូនកំព្រា រស់នៅជាមួយម្តាយមេម៉ាយ ចាប់តាំងពី ឆ្នាំ១៩៧៩ មក។
ការសិក្សា
បើទោះបីជាម្តាយមានមុខរបរត្រឹមជាអ្នកលក់នំបញ្ចុក ក៏ដោយ ក៏លោក កែម ឡី បានខិតខំព្យាយាមតស៊ូរៀនសូត្រ រហូតដល់ទទួលបានសញ្ញាបត្រជាន់ខ្ពស់នៅឯបរទេស ។
លោកកែម ឡី បានចាកចេញពី ខេត្តតាកែវ មកសុំស្នាក់អាស្រ័យនៅវត្ត បទុម ក្នុងរាជធានីភ្នំពេញ ដើម្បីបន្តការសិក្សានៅមហាវិទ្យាល័យ។ លោកបានស្នាក់នៅវត្តរហូតដល់រៀនចប់មហាវិទ្យាល័យ ហើយបានចូលធ្វើការនៅក្រសួង សុខាភិបាល កាន់ខាងផ្នែកជំងឺឆ្លង។
លោក កែម ឡី ទទួលបានសញ្ញាបត្រ នៅសាកលវិទ្យាល័យចុឡាលុងករណ៍ ប្រទេសថៃ ផ្នែកជំនាញសិក្សាស្រាវជ្រាវលើផ្នែកសុខភាពសាធារណៈ ទទួលបានសញ្ញាបត្រពីសាកលវិទ្យាល័យ ម៉ាឡៃយ៉ា ប្រទេសម៉ាឡេស៊ី លើផ្នែកវិទ្យាសាស្ត្រសង្គម។
ការងារ
លោក កែម ឡី បានឈប់ធ្វើការងាររដ្ឋ នៅក្នុងអំឡុង ឆ្នាំ២០០០ ហើយបានទៅធ្វើការ នៅកាកបាទក្រហមកម្ពុជា។ បន្ទាប់មកលោកបានចេញទៅធ្វើការនៅអង្គការក្រៅរដ្ឋាភិបាលនិងទៅ ធ្វើជាអ្នកប្រឹក្សាឲ្យអង្គការ UNDP អស់រយៈពេល ៤ឆ្នាំ។ ក្រោយពីបញ្ចប់ការងារនៅ UNDP លោកបានទៅធ្វើការឲ្យក្រុមហ៊ុនមួយនៅប្រទេស ថៃ ដែលក្រុមហ៊ុននោះ ធ្វើការងារជួយសង្គមច្រើន ជាពិសេសជួយដល់ជនក្រីក្រនៅ ថៃ នៅ កម្ពុជា នៅ ចិន និងនៅ ឥណ្ឌា ហើយបន្ទាប់ពីនោះ លោកបានទៅធ្វើជាទីប្រឹក្សាឲ្យក្រសួង សុខាភិបាល ខាងមូលនិធិសកល។ ក្រោយមកទៅកាន់ខាងបណ្តាញអង្គការក្រៅរដ្ឋាភិបាលហៅ HACC បានមួយរយៈ។
ការស្រាវជ្រាវ និងវិភាគនយោបាយ
ដំបូងឡើយ លោក កែម ឡី បានធ្វើការសិក្សាស្រាវជ្រាវភាគច្រើនខាងផ្នែកសង្គមកិច្ច បន្ទាប់មកខាងផ្នែកដីធ្លី សិទ្ធិលំនៅឋាន សិទ្ធិមនុស្ស ធនធានរ៉ែ ហើយនៅពេលថ្មីៗនេះ លោកបានធ្វើការសិក្សាស្រាវជ្រាវ ភាគច្រើនទៅលើរឿងនយោបាយ សេដ្ឋកិច្ច សង្គមកិច្ច និងវប្បធម៌។ល។
ជីវិតគ្រួសារ
លោក កែម ឡី បានរៀបអាពាហ៍ពិពាហ៍នាឆ្នាំ២០០១ ។ភរិយារបស់លោក គឺជាអាជីវករលក់ខោ អាវជជុះនៅផ្ទះល្វែងមួយ នៅផ្សារបឹងកេងកង ក្នុងរាជធានីភ្នំពេញ។ បច្ចុប្បន្ន មានកូនសុទ្ធតែប្រុសចំនួន ៤ នាក់ ទាំងនៅក្នុងផ្ទៃ ដែលជិតគ្រប់ខែផង ៕