នៅព្រឹកថ្ងៃទី ១១ កញ្ញា ២០១៨ នេះ សារនិងរូបភាពបង្ហោះក្នុងfacebook របស់ឯកឧត្តម ខៀវ កាញារិទ្ធ រដ្ឋមន្ត្រីក្រសួង ព័ត៌មានកំពុងត្រូវបានការចាប់អារម្មណ៍ខ្លាំងពីមហាជន ប្រជាពលរដ្ឋទូទៅ មន្ត្រីរាជការ ពិសេសអ្នកសារព័ត៌មាននានា គឺរូបក្នុងស្លាកសញ្ញាហាមបត់ឆ្វេងនៅត្រង់ចំណុចភ្លើងស្តុបមួយកន្លែង នៅក្នុងរាជធានីភ្នំពេញ ប៉ុន្តែមិនដឹងថាចំណុចត្រង់ ស្តុបនោះថិតនៅផ្លូវកែងលេខប៉ុន្មានក្នុងសង្កាត់ណាទេ គឺមាន ស្លាកសញ្ញាហាមបត់ឆ្វេង តែដល់គំនូសព្រួញសញ្ញានៅលើផ្លូវ ថ្នល់កៅស៊ូចង្អុលទិស គឺអាចអោយអ្នកបើកបរយានយន្ត បត់ ឆ្វេង បាន ។
ដូច្នេះត្រង់ចំណុចនេះគួរតែខាងជំនាញសាធារណ ការ និងដឹកជញ្ជូនរាជធានីភ្នំពេញ ដែលមានលោក សាំ ពិសិដ្ឋ ជាប្រធានមន្ទីរសាធារណការ និងដឹកជញ្ជូន ចុះពិនិត្យនឹងធ្វើ ការកែសំរួលឡើងវិញ កុំអោយមានបញ្ហាកើតឡើងរវាងនគរ បាលចរាចរណ៍ និងប្រជាពលរដ្ឋអ្នកបើកបរយានជំនិះ នៅ ពេលដែលត្រូវនគរបាលចរាចរណ៍ចាប់ឃាត់យានយន្តផាក ពិន័យដោុយយកឡេះថា អ្នកបើកបរមិនគោរពច្បាប់ចរាចរណ៍ និងមិនមើលស្លាកសញ្ញាហាមបត់ឆ្វេងនៅត្រង់ភ្លើងស្តុប ។
ករណីនេះ អ្នកបើកបររថយន្តម្នាក់ សុំមិនបញ្ចេញឈ្មោះ បានប្រាប់ថា គាត់បានរៀនសូត្រដឹងពីច្បាប់និងស្លាកសញ្ញាចរាចរណ៍ តាមដងផ្លូវ និងលើទ្រូងផ្លូវសាធារណៈគ្រប់សណ្ឋាន ភាពផ្លូវថ្នល់ គឺមានសញ្ញាចង្អុលបង្ហាញទិសនិងកំណត់ជាក់លាក់ក្នុងការអោយអ្នកបើកបរបានយល់ដឹងច្បាស់លាស់ និងចូលរួមគោរពអនុវត្តតាមច្បាប់ចរាចរណ៍ គឺមិនមែនដូចរូប សញ្ញាចរាចរណ៍ ដែលដាក់បង្ហាញហាមបត់ឆ្វេង ហើយនៅលើទ្រូងផ្លូវវិញ បែរជាមានសញ្ញាព្រួញចង្អលទិសអាចបត់បាន ដូចនេះទេ ។
លោកបន្តថា នេះអាចមកពីខាងជំនាញមានការ ធ្វេសប្រហែស ឬ ក៏ជាល្បិចត្រូវរ៉ូវគ្នាជាប្រព័ន្ធជាមួយនគរបាលចរាចរណ៍ ដើម្បីជាឡេះស្ទាក់ឃាត់យានយន្តផាកពិន័យយក លុយចែកគ្នាចាយ តែបើចំអ្នកបើកបរដែលគេយល់ដឹងពីច្បាប់ និងស្លាកសញ្ញាចរាចរណ៍ច្បាស់លាស់គេជជែកតវ៉ាក៏មានការ លើកលែងម្តងម្កាលទៅ ។
រឿងមន្ទីរសាធារណការដឹកជញ្ញូន រាជធានីភ្នំពេញ ដែលមានលោក សាំ ពិសិដ្ឋ ជាមេមន្ទីរនោះ គឺធ្លាប់ត្រូវបានសម្តេចតេជោ ហ៊ុន សែន ព្រមានធ្ងន់ៗម្តងជាពីរដងរួចមកហើយអំពីកណីធ្វើផ្លូវថ្នល់គ្មានគុណភាព ឬគេហៅថា លួចកេងស៊ីគំរោងចំណាយថវិការដ្ឋរាប់សិបលានរៀល ក្នុង ១គំតោងៗ និងករណី នៃការធ្វើស្ពានអាកាសឆ្លងផ្លូវសំរាប់អ្នក ថ្មើរជើងនៅមុខសាលារៀនជម្ពូរវ័ន ក្នុងខណ្ឌពោធិសែនជ័យ ក៏មិនត្រូវតាមលក្ខណៈស្តង់ដារដែរ ហើយត្រូវទទួលរងការរិៈគន់ពីប្រជាពលរដ្ឋខ្លាំងផងដែរ ។
ចំណុចរៀបរាប់ត្រួសៗខាង លើនេះ គឺជាការចាប់អារម្មណ៍ខ្លាំងរបស់មហាជនចំពោះ លោកវិស្វករ សាំ ពិសិដ្ឋ មេមន្ទីរសាធារការណការ ដែលបាន កាន់តំណែងកន្លែងខ្លាញ់រងើម ដុះស្លែតាំងពីជំនាន់លោកកែប ជុតិមា នៅជាអភិបាលរាជធានីភ្នំពេញ តរហូតមកដល់អាណត្តិលោក ប៉ា សុជាតិវង្ស និង បន្តមកដល់បច្ចុប្បន្នអាណត្តិលោក ឃួង ស្រេង ជាអភិបាលរាជធានីភ្នំពេញ ក៏នៅតែមិនរង្គោះរង្គើរតំណែងលោក សាំ ពិសិដ្ឋ ដែរ ករណី នេះប្រជាពលរដ្ឋ និងមន្ត្រី រាជការតូចតាចយល់ថាលោក សាំ ពិសិដ្ឋ មានខ្សែខ្នងបង្អែករឹងមាំសម្បើមណាស់ ទើបអាចចាក់គ្រឹះ ដុះស្លែនៅមន្តីរសាធារណការរាជធានីភ្នំពេញបានយ៉ាងរលូន បែបនេះ ? ។
ជុំវិញការលើកឡើងរបស់មហាជន ខាងលើនេះ អង្គភាពយើងខ្ញុំ មិនអាចសុំការបំភ្លឺពីលោក សាំ ពិសិដ្ឋ បានទេ ព្រោះលោកធ្លាប់បានប្រាប់ តាមទូរស័ព្ទនាពេលកន្លងមកថា លោករវល់ការងារច្រើន ណាស់ បើអ្នកកាសែតមានចម្ងល់ ឬមានសំណូមពរអ្វី សូមដាក់លិខិតលាយលាកអក្សរទៅរដ្ឋបាលមន្ទីរសាធារណការរាជធានីភ្នំពេញទៅ ៕