ខេត្តព្រះសីហនុ ៖ ប្រសិនបើគ្មានការបង្ការទប់ស្កាត់អនុវត្តច្បាប់ឲ្យមានប្រសិទ្ធិភាពទេខេត្តក្រុងព្រះសីហនុនឹងគ្រប់គ្រងដោយក្រុមម៉ាហ្វីយ៉ាចិនជាមិនខាន។ជាក់ស្តែងករណិយ៍ជាជនជាតិចិន ជាប់ពាក់ព័ន្ធការបាញ់ប្រហារជនជាតិចិនដូចគ្នា បណ្តាលឲ្យរងរបួស៤នាក់ តាំងពីយប់ថ្ងៃទី១៦ ខែកក្កដា ឆ្នាំ២០១៨កន្លងទៅនេះទើបតែស្រាវជ្រាវចាប់បាន២នាក់ដកអាវុធបាន២ដើមតែប៉ុណ្ណោះនៅថ្ងៃទី០៥.០៩.១៨ វេលាម៉ោង២២:៣០នាទី ។
ជនសង្ស័យ ០២នាក់មានឈ្មោះ៖
១-ឈ្មោះរ៉េនហាយជុន( REN HAI JUN )ភេទប្រុស អាយុ ៤៦ ឆ្នាំ ជនជាតិចិន កាន់លិខិតឆ្លងដែនលេខ E០១១១៥៤៣៤ មុខរបរ មិនពិតប្រាកដ មានទីលំនៅ មិនពិតប្រាកដ ។
២-ឈ្មោះវូហាយហ្សូ( WU HAI ZHU )ភេទប្រុស អាយុ ៣០ ឆ្នាំ ជនជាតិចិន កាន់លិខិតឆ្លងដែនលេខ E៩២១១១៩៨៥ មុខរបរ មិនពិតប្រាកដ មានទីលំនៅ មិនពិតប្រាកដ ។
កាំភ្លើងខ្លី២ដើមមាន៖ ១,ម៉ាកBERETAលេខG643652បង់១គ្រាប់២។២,ម៉ាកGIOCK 19លេខWBEN763បង់១គ្រាប់៣។
ចិនជើងខ្លាំងខាងបាញ់នោះសារភាព ថា ពួកគេពិតជាបានធ្វើសកម្មភាពដោយប្រើភ្លើងខ្លី ០២ដើម បាញ់ទៅលើជនរងគ្រោះខណៈកំពុងផឹកស៊ីនៅក្នុងហាង «ស៊ី ហ៊ូ» ពិតប្រាកដមែន ព្រោះពួកគេខឹងនឹងជនរងគ្រោះដែលបាននិយាយប្រមាថមើលងាយពួកគេ ថាពួកគេជាមនុស្សដើរមិនត្រង់ផ្លូវ ដើរវាចៗបែបនេះមិនមែនជាមនុស្សល្អ ពេលដែលពួកគេទៅផឹកនៅក្នុងក្លឹប កាលពីថ្ងៃទី ១៥ ខែកក្កដា ឆ្នាំ២០១៨ ទើបនៅថ្ងៃកើតហេតុពួកគេបាញ់ទៅលើជនរងគ្រោះតែម្តង ។
ចំពោះកាំភ្លើងរូបគេបានទិញពីជនមិនស្គាល់មុខ ក្នុង១ដើមតម្លៃ៣,៨០០ដុល្លា ហើយពេលធ្វើសកម្មភាពរួច ពួកគេបានយកទៅកប់នៅក្នុងដីស្ថិតនៅក្រុម២២ភូមិ៣សង្កាត់៣ក្រុងព្រះសីហនុ។
សេចក្តីរាយការណ៍ឲ្យដឹងថា នៅយប់ថ្ងៃទី១៦ ខែកក្កដា ឆ្នាំ២០១៨នោះ ខណៈជនរងគ្រោះចិនកំពុងតែអង្គុយផឹកស៊ី ក្នុងហាង «ស៊ី ហ៊ូ»ស្ថិតក្នុងសង្កាត់លេខ៣ ក្រុងព្រះសីហនុ ស្រាប់តែលេចមុខ ជនដៃដល់២នាក់(ចិន) ពាក់មួកសុវត្ថិភាព និងអាវធំ ជិះម៉ូតូបិទស្លាកលេខ អមដោយកាំភ្លើង២ដើម បានទៅបាញ់ជនរងគ្រោះតែម្តង មិនដឹងថាពួកវាមានជម្លោះអីទេ។
សូមបញ្ជាក់ដែរថាថ្មីៗនេះលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានបញ្ជូនក្រុមការងារចំនួន១១រូប ទៅជួយពង្រឹងសន្តិសុខសណ្តាប់ធ្នាប់ក្នុង ខេត្តព្រះសីហនុ ដោយក្នុងនោះមាន នាយឧត្តមសេនីយ៍ផ្កាយ៤ម្នាក់ ឧត្តមសេនីយ៍ឯកផ្កាយ៣ម្នាក់ ឧត្តមសេនីយ៍ទោផ្កាយ២ ចំនួន៦នាក់ ឧត្តមសេនីយ៍ត្រីផ្កាយ១ ចំនួន២នាក់ និងវរសេនីយ៍ឯកម្នាក់ដើម្បីជួយពង្រឹងសន្តិសុខសណ្តាប់ធ្នាប់ក្នុងខេត្តព្រះសីហនុដែលមានបនល្បែងកាស៊ីណូប្រមាណ៥០កន្លែងសម្រាប់បំរើភ្ញៀវចិនៗ ។ សម្រាប់លោកឧត្តមសេនីយ៍ ជួន ណារឹន ស្នងការនគរបាលខេត្តព្រះសីហនុបានអះអាងប្រាប់កាសែតថា លោកធានាសន្តិសុខ១០០ភាគរយសូមភ្ញៀវទេសចរណ៍អញ្ជើញមកកំសាន្តចុះ!៕
