លោកឧត្តមសេនីយ៌ត្រី បែន រ័ត្ន ស្នងការរងនគរបាលរាជធានីភ្នំពេញ ត្រូវបានប្រកាសផ្ទេរភារកិច្ច និងតែងតាំងជាស្នងការនគរបាលខេត្តកំពង់ចាម ជំនួសលោក ឧត្តមសេនីយ៌ទោ ឆាយ គឹមសុន ដែលត្រូវចូលនិវត្តន៍ ។
ពិធីប្រកាសផ្ទេរភារកិច្ច និងតែងតាំង បានធ្វើឡើងនៅសាលប្រជុំ សាលាខេត្តកំពង់ចាម កាលពីរសៀលថ្ងៃទី ១៦ ខែមករា ឆ្នាំ ២០១៤ ក្រោមអធិបតីភាព លោកនាយឧត្តមសេនីយ៌ នេត សាវឿន អគ្គស្នងការនគរបាលជាតិ ព្រមទាំងមានការចូលរួមពីលោកអភិបាលស្រុក – ក្រុង លោកអធិការនគរបាលស្រុក-ក្រុង នាយប៉ុស្តិ៍រដ្ឋបាល ទាំង ១៧៣ ឃុំ-សង្កាត់ និងប្រធានមន្ទីរនានា ជុំវិញខេត្តផងដែរ ។
បន្ទាប់ពីស្តាប់របាយការណ៍ របស់លោក ឆាយ គឹមសុន ស្តីពីការអនុវត្តភារកិច្ចបម្រើប្រជាពលរដ្ឋ និងសង្គមជាតិ ក្នុងពេលដែលលោកកាន់តំណែងជាស្នងការនគរបាលខេត្តកំពង់ចាមកន្លងមកនេះ ។
លោកឧត្តមសេនីយ៌ត្រី បែន រ័ត្ន ស្នងការនគរបាលខេត្តកំពង់ចាម ដែលទើបតែងតាំងថ្មី បានធ្វើការប្តេជ្ញាចិត្តថា ៖
១-ស្មោះត្រង់ជានិច្ចចំពោះជាតិ សាសនា ព្រះមហាក្សត្រ ។
២-គោរពអនុវត្តដោយស្មោះត្រង់ រដ្ឋធម្មនុញ្ញ និងកម្មវិធីនយោបាយរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាប្រមុខ ។
៣-ជម្រុញការអនុវត្តបទបញ្ជា និងគោលការណ៍ដឹកនាំ ដ៏ខ្ពង់ខ្ពស់ របស់លោក ឧបនាយករដ្ឋមន្រ្តី រដ្ឋមន្រ្តី ក្រសួងមហា ផ្ទៃ និងលោកនាយ ឧត្តមសេនីយ៍ អគ្គស្នងការនគរបាលជាតិ ។
៤-ធ្វើជាសេនាធិការពិតប្រាកដ ជូនគណៈបញ្ជាការឯកភាពរដ្ឋបាលខេត្តកំពង់ចាម អំពីកិច្ចប្រតិបត្តិការរក្សាសន្តិសុខ សណ្តាប់ធ្នាប់ សាធារណៈ ឲ្យកាន់តែល្អប្រសើរ ឡើងថែមមួយកម្រិតទៀត ។
លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ មានប្រសាសន៍កោតសរសើកងកម្លាំងនគរបាល ខេត្តកំពង់ចាម ដែលអនុវត្តគោលនយោបាយ ភូមិ-ឃុំ មានសុវត្ថិភាព បានល្អប្រសើរ ធ្វើឲ្យខេត្តនេះប្រែមុខមាត់ថ្មី ។ ចំណែកការចូលនិវត្តន៍របស់លោកឧត្តមសេនីយ៍ទោ ឆាយ គឹមសុន គឺបានបន្សល់ ទុក្ខនូវស្នាដៃគំរូ ល្អៗជាច្រើន។ ជាមួយនោះដែរ កម្លាំងនគរបាលត្រូវតែនាំគ្នាលុបបំបាត់នូវការខុសឆ្គងនានា ជាមួយនឹងប្រជាពលរដ្ឋ ហើយស្នងការថ្មីលោកឧត្តមសេនីយ៍ បែន រ័ត្ន ត្រូវតែយកចិត្តទុកដាក់ពង្រឹង ជំនាញសមត្ថភាពហ្វឹកហាត់ដល់មន្រ្តីនគរបាល ធ្វើយ៉ាងណា ប្រកបដោយធនធានមនុស្ស ត្រូវតែគោរពច្បាប់ និងសីលធម៌វិន័យឲ្យបានល្អប្រសើ ពិសេសត្រូវទប់ស្កាត់បទល្មើសនានា ដើម្បីធានាភូមិ-ឃុំ មានសុវត្ថិភាព ៕