ភ្នំពេញ ៖ លោកហ៊ិនរតនាដែលគេស្គាល់ថាជាគ្រូបង្ហាត់ឆ្កែដ៏ល្បីបានជួបគ្រោះថ្នាក់ចរាចរណ៍កាលពីប៉ុន្មានថ្ងៃកន្លងមកនេះបណ្តាលឲ្យលោករងរបួសធ្ងន់ធ្ងត្រូវសម្រាកពេទ្យ។
ហេតុការណ៍គ្រោះថ្នាក់ចរាចរណ៍មួយនេះ បង្កឡើងដោយជនជាតិចិន បានបើកបររថយន្តបុកចំពីក្រោយយ៉ាងពេញទំហឹង តែមិនបានចុះមកដោះស្រាយឡើយតែបែជាបើកឡានកិនថែមទៀត។
នេះបើតាមហ្វេសប៊ុកដែលអះអាងថាជាសាច់ញាតិ។មកទល់ពេលនេះស្ថានភាពជំងឺរបស់លោកនៅតែធ្ងន់ធ្ងរខ្លាំង បើទោះបីជាលោកទទួលការវះកាត់ឆ្អឹងខ្នងរួចទៅហើយក្តី ប៉ុន្តែលោកនៅតែអាចនឹង ប្រឈមជាមួយនឹងការបាត់បង់ជីវិតបាន ដោយសារការខ្ទាំសួតនិងរលាកសួត, Crush Syndrome, ថែមទាំងការបាតបង់ឈាមជាច្រើនក្នុងរយៈពេលខ្លី ថែមទៀតផង។
បច្ចុប្បន្នលោក ហ៊ិន រតនា កំពុងគេងសម្រាកព្យាបាល ក្នុងបន្ទប់សង្គ្រោះបន្ទាន់ នៅឯមន្ទីពេទ្យ ខ្មែរ-សូវៀត និងកំពុងតែត្រូវការឈាមប្រភេទ O+ និង AB ចំនួន៤ប្លោកជាបន្ទាន់ផងដែរ។សូមបញ្ជាក់ដែរថាលោកហ៊ិនរតនា គឺជាគ្រូបង្ហាត់ឆ្កែដ៏ល្បីម្នាក់ តំណាងអោយប្រទេសកម្ពុជា ។ ដោយសារតែសមត្ថភាពបង្ហាត់ឆ្កែរបស់លោកមានភាពខ្លាំងពូកែ ត្រូវបានបរទេសទទួលស្គាល់ រហូតបានចេញមុខនៅក្នុងកម្មវិធីទូរទស្សន៍អន្តរជាតិ ដ៏ល្បីឈ្មោះ National Geography ថែមទៀតផង៕
