ព្រឹកថ្ងៃអង្គារ ២រោជ ខែស្រាពណ៍ ឆ្នាំច សំរិទ្ធិស័ក ព.ស ២៥៦២ ត្រូវនឹងថ្ងៃទី២៨ ខែសីហាឆ្នាំ២០១៨ ក្រុមការងារចម្រុះខេត្តព្រះសីហនុ ដឹក នាំដោយលោក លី ចិត្តនិយម ប្រធានការិយាល័យសំណង់និងអភិវឌ្ឍ នៃសាលាខេត្តព្រះសីហនុ សហការជា មួយអាជ្ញាធរក្រុង សង្កាត់លេខ៣ ចុះរុះរើសំណង់អនាធិបតេយ្យសាងសង់រំលោភចំណីអូរ នៅតាមបណ្ដោយអូរ អណ្តូងអ៊ុនតាក់ ស្ថិតនៅសង្កាត់លេខ៣ ក្រុង ខេត្តព្រះសីហនុ ។
លោក លី ចិត្តនិយម មានប្រសាសន៍ឲ្យដឹងថា ដោយអនុវត្តតាមការណែនាំរបស់ឯកឧត្តម យន្ត មីន អភិបាល នៃគណៈអភិបាលខេត្តព្រះសីហនុ ក្នុងការរំដោះចំណីអូរ ប្រឡាយ និងកែលម្អសោភ័ណ្ឌភាព បរិស្ថានក្រុងព្រះសីហនុ ពិសេសការរំដោះចំណីអូរ កុំឲ្យមានការជន់លិចនៅរដូវភ្លៀង ។
លោកបានបន្តថា មុននឹងឈានដល់ការចុះរុះរើថ្ងៃនេះ អាជ្ញាធរខេត្ត ក្រុង សង្កាត់ បានធ្វើការណែនាំ ជូនដំណឹងជាបន្តបន្ទាប់ដល់ម្ចាស់តូបទាំង៣ ដែលសាងសង់រំលោភចំណីអូរ កុំឲ្យធ្វើការសាងសង់តូបខុសច្បាប់ នាំឲ្យខាតបង់ថវិកា និងបង្កអោយស្ទះចរន្តទឹកហូរ។ ក៏ប៉ុន្តែពួក គាត់បានផ្គើននឹងការជូនដំណឹងរបស់អាជ្ញាធរ ហើយនៅតែបន្តសាងសង់តូបដោយខុសច្បាប់ ។
ការរុះរើតូបទាំងបីនេះ គឺដើម្បីរំដោះចំណីអូរ ប្រឡាយនៅក្នុងក្រុងព្រះសីហនុ បញ្ចៀសការលិចលង់ដោយសារតែទឹកភ្លៀងនៅរដូវវស្សា ។
សកម្មភាពនេះយើងនឹងធ្វើនៅតាមអូរ ប្រឡាយសំខាន់នៅក្នុងក្រុងព្រះសីហនុជាបន្តបន្ទាប់ទៀត ដើម្បីរៀបចំបរិស្ថាន សោភ័ណភាពទីក្រុងទេសចរណ៍ ស្របពេលដែលខេត្តព្រះសីហនុ កំពុងត្រូវមានការអភិវឌ្ឍរីកចម្រើនយ៉ាងគំហុកនារយៈពេល ២ឆ្នាំចុងក្រោយនេះ ។ លោក លី ចិត្ដនិយម ក៏បានអំពាវនាវដល់ប្រជាពលរដ្ឋកុំចាញ់បោកគេ ទិញដីចំណីអូរប្រឡាយ សាងសង់សំណង់ដោយខុសច្បាប់បន្តទៀត។
ជុំវិញបញ្ហានេះដែរ អភិបាលខេត្តព្រះសីហនុ ឯកឧត្តម យន្ត មីន បញ្ជាក់ថាចាប់ពីពេលនេះតទៅអាជ្ញាធរនឹងចាត់វិធានការតាមផ្លូវច្បាប់ដោយគ្មានការយោគយល់ទៀតទេចំពោះបុគ្គលទាំងឡាយណាដែលរំលោភអូរប្រឡាយផ្លូវទឹកនាំអោយប៉ះពាល់បរិស្ថាន និងសោភណ ភាពទីក្រុងព្រះសីហនុ៕
