ភ្នំពេញ ៖ បុរសម្នាក់ដែលគេស្គាល់ថាជាអតីតថៅកែសណ្ឋាគារឆាយហុងម្តុំព្រែកលាភ បានបើកម៉ូតូទឹកដែលទើបទិញថ្មី ជិះលំហែលកាយតាមដងទន្លេមេគង្គ រួចធ្លាក់ទឹកទន្លេលិចបាត់រយៈពេល២ថ្ងៃមកហើយរកសាកសពមិនឃើញ។
សមត្ថកិច្ចបានឱ្យដឹងថាករណិយ៍នេះបានកើតឡើងតាំងពីល្ងាចថ្ងៃទី២៦ ខែសីហា ឆ្នាំ២០១៨ មកម្ល៉េះ នៅតាមដងទន្លេមេគង្គ ស្ថិតក្នុងភូមិល្វា សង្កាត់កោះដាច់ ខណ្ឌជ្រោយចង្វា ហើយរហូតមកដល់រសៀលថ្ងៃទី២៨ ខែសីហា ឆ្នាំ២០១៨នេះនៅតែ រកសាកសពជនរងគ្រោះមិនទាន់ឃើញ ។ ជនរងគ្រោះដែលថា ធ្លាក់ទឹកបាត់ខ្លួននោះមាន ឈ្មោះហុក ប៊ុនហ៊ុយ ហៅតាហ៊ុយ មានអាយុ ជាង៤៧ឆ្នាំ ជាអតីតថៅកែសណ្ឋាគារឆាយហុង និងបច្ចុប្បន្នជាថៅកែហាងគុយទាវមួយកន្លែង នៅក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វា ។
ប្រភពពត៌មានពីសមត្ថកិច្ចគរបាលបានឱ្យដឹងទៀតថា ជនរងគ្រោះរូបនេះបានបើកម៉ូតូទឹក ដែលទើបទិញក្នុងតម្លៃជិត២ម៉ឺនដុល្លារលំហែរកាយតាមដងទន្លេ ។ មិនដឹងជាមូលហេតុអ្វីនោះទេ ខណៈបើកបរបានបាត់ខ្លួន ឃើញតែម៉ូតូទឹកក៏បានអណ្តែតតាមទឹកចូលខាង ហើយត្រូវនគរបាលយកទៅរក្សាទុក ។ បន្ទាប់មក ទើបមានការភ្ញាក់ផ្អើលដល់ក្រុមគ្រួសារនាំគ្នាជួលទូកជួយរក តែរកពុំឃើញសោះ ៕