ខេត្តក្រចេះ ៖ កម្លាំងប៉ុស្តិ៍រដ្ឋបាលឃ្សឹមសហការ ជាមួយជំនាញផ្នែកយុត្តិធម៌នៃអធិការដ្ឋាននគរបាលស្រុកស្នួលចាប់បានចោរលួចម៉ាស៊ីនត្រង់ស៊ីន័រ ម៉ាស៊ីនបូមទឹកនឹងអាគុយ ស្ថិតក្នុងភូមិដូង ឃុំឃ្សឹម ស្រុកស្នួលខេត្តក្រចេះកាលពីថ្ងៃទី២៧ខែសីហាឆ្នាំ២០១៨នេះ។
មន្ត្រីនគរបាលស្រុកស្នួលបានឲ្យដឹងថា ជនសង្ស័យឈ្មោះ ហេន វីរះ ភេទប្រុស អាយុ២៦ឆ្នាំ ជាតិខ្មែរ រស់ ភូមិស្រែរនាម ឃុំឃ្សឹម ស្រុកស្នួល ខេត្តក្រចេះ។ចំណែកជនរងគ្រោះមានឈ្មោះភឿ ភាព ភេទប្រុសអាយុ៦០ឆ្នាំរស់នៅក្នុងភូមិដូង ឃុំឃ្សឹមស្រុកស្នួលខេត្តក្រចេះ។
មន្ត្រីនគរបាលរូបនោះបានបញ្ជាក់ថាជនសង្ស័យ បានធ្វើសកម្មភាព លួច ម៉ាស៊ីនត្រង់ស៊ីន័រ១/ ម៉ាស៊ីនបូមទឹក១ និង អាគុយ១ ដាក់ លើម៉ូតូ រួចយកជិះគេចខ្លួនក្នុងខណះ ពេលដែលជនរងគ្រោះមិននៅផ្ទះ។ ក្រោយពេលទទួលបានពត៌មានពីជនរងគ្រោះភ្លាមៗ កម្លាំងប៉ុស្តិ៍នគរបាលឃុំឃ្សឹម សហការជាមួយកម្លាំងជំនាញផ្នែកយុត្តិធម៍ នៃ អធិការដ្ឋាននគរបាលស្រុកស្នួលតាមរកឃាត់ខ្លួនមុខសញ្ញា ជនសង្ស័យខាងលើបានយកប៉ុស្តិ៍នគរបាលឃុំឃ្សឹម ដើម្បីសាកសួរ។
បច្ចុប្បន្ន ជនសង្ស័យខាងលើ ក្រោយពីកម្លាំងជំនាញសួរនាំរួច បានធ្វើការឃាត់ខ្លួន បណ្តោះអាសន្ន នៅអធិការដ្ឋាននគរបាលស្រុកស្នួល ដើម្បីបញ្ជូនសំណុំរឿងទៅជំនាញខេត្តចាត់ការតាមនីតិវិធីច្បាប់បន្ត៕
ដោយ កិះ ខន ក្រចេះ
