ភ្នំពេញ៖ ទីតាំងផលិត និងវេចខ្ចប់ប៊ីចេងក្លែងក្លាយមួយកន្លែង ស្ថិតនៅផ្ទះលេខ AB4-5 ផ្លូវ 56R សង្កាត់ទួលសង្កែទី២ ខណ្ឌឫស្សីកែវ ត្រូវបានកម្លាំងសមត្តកិច្ចចំរុះរកឃើញ។
មន្ត្រីនគរបាលនៃនាយកដ្ឋាននគរបាលប្រឆាំងបទល្មើសសេដ្ឋកិច្ច បានឱ្យដឹងថា ប្រតិបត្តិការនេះបានធ្វើឡើងនាព្រឹកថ្ងៃទី២៧ ខែសីហា ឆ្នាំ២០១៨ ក្រោមការដឹកនាំផ្ទាល់របស់លោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាល ប្រឆាំងបទល្មើសសេដ្ឋកិច្ច ក្រោមការសម្របសម្រួលនីតិវិធីពីលោក ខាំ សុផារី ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។
ជនសង្ស័យម្នាក់ជាម្ចាស់ទីតាំងផលិត និងវេចខ្ចប់ គឺលោកស្រី សុខ វួចលីន អាយុ៤១ឆ្នាំត្រូវបានឃាត់ខ្លួន។កម្លាំងសមត្ថកិច្ចចម្រុះ ក៏បានរកឃើញនិងដកហូតភស្តុតាងមួយចំនួន រួមមាន៖ ប៊ីចេងបាវសចំនួន៣៥២បាវ ប៊ីចេងបាវគគីរចំនួន១២៥បាវ ប៊ីចេងរាយម៉ាក Win Win ចំនួន ១៤០បាវ ប៊ីចេងច្រករួច (500g)ចំនួន ៣២បាវ ប៊ីចេងច្រករួចម៉ាក Gold Cup ចំនួន ៤៧កេស ប៊ីចេងរូបវែក (250g) ម៉ាស៊ីនដេរម៉ាត់បាវ ២គ្រឿង ម៉ាស៊ីនអ៊ុតម៉ាត់ថង់ ១គ្រឿង ម៉ាស៊ីនរុំខ្សែ និងកាត់ខ្សែចំនួន ២គ្រឿង ជញ្ជីងថ្លឹង ២គ្រឿង បាវរូបវែក ៩៣បាវ និងប៊ីចេងរាយមិនទាន់វេចខ្ចប់មួយចំនួនទៀតទម្ងន់សរុប ១៧តោន។នេះជាលើកទី២ហើយដែលសមត្តកិច្ចរកឃើញទីតាំងផលិតប៊ីចេងក្លែងក្លាយ!៕
