ភ្នំពេញ ៖ សម្តេចតេជោ ហ៊ុន សែន ក្រោយពីត្រូវបានព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជាតានរយៈព្រះរាជក្រឹត្យបាន ត្រាស់បង្គាប់ចាត់តាំងជានាយករដ្ឋមន្ត្រីកម្ពុជា សម្រាប់អាណត្តិទី៦ នៅថ្ងៃទី១៧ ខែសីហា ឆ្នាំ ២០១៨ ។
សម្តេចតេជោ នឹងរៀបចំសមាភាពរាជ រដ្ឋាភិបាល បញ្ជូនទៅ រដ្ឋសភា នីតិកាលទី៦ ដើម្បីសុំការផ្តល់សេចក្តីទុកចិត្ត ពីសមាជិក សមាជិកានៃរដ្ឋសភា ដែលនឹងប្រជុំនៅថ្ងៃទី៦ ខែកញ្ញា ឆ្នាំ២០១៨។
សម្តេចតេជោហ៊ុនសែន បានផ្ញើសារលិខិតថ្លែងអំណរគុណ ថ្វាយព្រះមហាក្សត្រចំពោះការចាត់តាំងនេះ។យោងតាមសារលិខិតថ្វាយព្រះមហាក្សត្រកម្ពុជា សម្តេចតេជោ បានទូលថា “ទូលព្រះ បង្គំជាខ្ញុំ សូមព្រះបរមរាជាអនុញ្ញាត ថ្លែងនូវអំណរព្រះមហាករុណាទិគុណជាអនេកកប្បការ ថ្វាយព្រះករុណាជាអម្ចាស់ជីវិត លើត្បូង ដែលទ្រង់សព្វព្រះរាជហឫទ័យប្រោសព្រះរាជទាន ព្រះរាជក្រឹត្យចាត់តាំងទូលព្រះបង្គំជាខ្ញុំ ជានាយករដ្ឋមន្ត្រីកម្ពុជា”។
សម្តេចសន្យាថានឹងខិតខំយកអស់កម្លាំងកាយចិត្ត និងស្មារតី ដើម្បីបំពេញភារកិច្ច ដ៏វិសេសវិសាល និងឧត្តុងឧត្តម ដែលព្រះករុណាជាអម្ចាស់ទ្រង់បានព្រះរាជទានដល់សម្តេច។
សូមបញ្ជាក់ថាបើតាមលទ្ធផលផ្លូវការដែលចេញផ្សាយដោយ គ.ជ.ប បានឲ្យដឹងថា គណបក្សប្រជាជនកម្ពុជារបស់ សម្តេចតេជោ ហ៊ុន សែន ប្រធានគណបក្សបានទទួលសំឡេងគាំទ្រច្រើនលើសលប់ រហូតដល់៤,៨៨៩,១១៣សំឡេង ស្មើនឹងប្រមាណ ៧៧ភាគរយនៃសំឡេងសន្លឹកឆ្នោតបានការ ទាំងមូល ៦,៣៦២,២៤១។តួលេខនេះបើតាមគជពគណបក្សប្រជាជនកាន់កាប់អសនៈទាំង១២៥ក្នុងរដ្ឋសភា។
នៅគ្រប់បណ្តារាជធានី/ខេត្ត គណបក្សកាន់អំណាច៥ អាណត្តិជាប់ៗគ្នាកន្លងមក ទទួលបានសំឡេងគាំទ្រនាំមុខគេដាច់ បើធៀបនឹងគណបក្សនយោបាយទាំង១៩ផ្សេងទៀត ដែលចូលរួមប្រកួតប្រជែង ក្នុងការបោះឆ្នោត៕