ខេត្តព្រះសីហនុ ៖ សមត្តកិច្ចនៃអាជ្ញាធរខេត្តព្រះសីហនុបានចុះបង្ក្រាបទីតាំង ចែកចាយប្រេីប្រាស់ថ្នាំញៀន ទ្រង់ទ្រាយធំមួយកន្លែង ក្នុងរង្គសាលស្កាយឡាញ(ក្លឹប ឬបាឌីស្កូ) ចាប់ពីម៉ោង ១ និង៤៥នាទីយប់រំលងអាធ្រាត្រឆ្លងចូលថ្ងៃទី១៦ ខែសីហា ឆ្នាំ២០១៨ រហូតដល់ម៉ោង៥ភ្លឺថ្ងៃដដែលចាប់ឃាត់មនុស្សនិងដកហូតបានគ្រឿងញៀនមួយចំនួន។
ឧត្តមសេនីយ៍ទោ ជួន ណារិន្ទ ស្នងការនគរបាល ខេត្តព្រះសីហនុអោយកាសែតដឹងពីប្រតិបត្តិការណ៍នេះថា សមត្ថកិច្ច បានឃាត់ខ្លូនជនសង្ស័យចំនួន ៥៣នាក់ ស្រី៧នាក់។ ក្នុងនោះមានជនជាតិចិន១០នាក់ ជនជាតិឥណ្ឌូនេស៊ី ១៧នាក់ ជនជាតិកូរ៉េ ២នាក់ ដែលភាគច្រើន គឺជាបុគ្គលិកបម្រើការងារក្នុងកាស៊ីណូហ្គោដិនស៊ី និងកាស៊ីណូ តុងហ្វាងមិនជូ។ សមត្ថកិច្ចក៏បានឃាត់ខ្លួនពលរដ្ឋខ្មែរ ចំនួន២៤នាក់ដែលចូលក្លឹបនេះផងដែរ។
ក្រៅពីឃាត់មនុស្ស សមត្ថកិច្ចក៏ដកហូតបានថ្នាំញៀន ខេតាមីន និង អិចស្តាស៊ី ចំនួន២៦កញ្ចប់ ដបថ្នាំញៀនសំរាប់លាយជាមួយទឹក៤ដប។ ក្រោយពេលពេលធ្វើតេស្ដអ្នកទាំងអស់នោះ មានផ្ទុកសារធាតុថ្នាំញៀន។សមត្ថកិច្ចនគរបាល កំពុងសាកសួរ ដើម្បីឈានទៅបន្តនិតិវិធីតាមផ្លូវច្បាប់ ៕
