ខេត្តក្រចេះ ៖ ឯកឧត្តមឧបនាយករដ្ឋមន្ត្រី កិត្តិសេដ្ឋាបណ្ឌិត គាត ឈន់ បានស្នើសុំដល់ប្រជាពលរដ្ឋនិងយុវជន សិស្សានុសិស្ស រួមទាំងសមត្ថកិច្ចពាក់ព័ន្ធ រួមទាំងមន្ត្រីជំនាញជលផល ជាពិសេសកម្លាំងសមត្ថកិច្ច ត្រូវខិតខំការពាររក្សាធនធានធម្មជាតិ និងមច្ឆាជាតិ កុំទៅការពារអ្នកប្រព្រឹត្តបទល្មើសនេសាទខុសច្បាប់។
ឯកឧត្តមមានប្រសាសន៍បែបនេះ នៅក្នុងកម្មវិធីលែងកូនត្រីប្រមាណជាង ៥ម៉ឺនក្បាលនៅចំណុចទំនប់បឹងវែង ភូមិថ្មី១ ឃុំខ្សាច់អណ្តែត ស្រុកឆ្លូង ដែលរៀបចំដោយរដ្ឋបាលសាលាខេត្ត និងខណ្ឌរដ្ឋបាលជលផលខេត្តក្រចេះ នាព្រឹកថ្ងៃទី០២ ខែកក្កដាឆ្នាំ២០១៦ម្សិលមិញនេះ។
ឯកឧត្តមឧបនាយករដ្ឋមន្ត្រី កិត្តិសេដ្ឋាបណ្ឌិត គាត ឈន់មានប្រសាសន៍បន្ដថា ពេលលែងត្រីហើយ កុំអាលចាប់ ទុកឱ្យវាធំ ដើម្បីទុកឱ្យវារីកសាយភាយទៅតាមបណ្តាបឹងនានា ដើម្បីបង្កើនទិន្នផលត្រី ហេតុនេះត្រូវរួមគ្នាការពារត្រីឱ្យបានគង់វង់ ចាំដល់ពេលចាប់ ចាំចាប់។ ម្យ៉ាងទៀត ពេលចាប់ សូមចាប់ដោយឧបករណ៍ស្របច្បាប់ ជៀសជាងប្រើឧបករណ៍ខុសច្បាប់ ប្រដាប់ឆក់ ស្បៃមុង ដាក់ថ្នាំ ឬ ឧបករណ៍ផ្សេងៗនៅពេលទឹកធំឬទឹកស្រក ដែលធ្វើឱ្យប្រភេទត្រីឆាប់អស់ និងផុតពូជបំផុត។
ទន្ទឹមជាមួយនឹងការលើកឡើងខាងលើ ឯកឧត្តម ក៏បានមានប្រសាសន៍ផ្តាំផ្ញើបន្ថែមសូមឱ្យយើងអស់គ្នាជួយការពារព្រៃលិចទឹក កុំវាទព្រៃយកដីធ្វើកម្មសិទ្ធិឯកជន កុំកាប់ព្រៃចោល ហើយដាំដើមឈើបន្ថែម តាមបឹងត្រពាំងជាដើម។ ខណៈនោះដែរ ឯកឧត្តម មានសង្ឃឹមជឿជាក់ជាខ្លាំងចំពោះសមត្ថកិច្ច កងកម្លាំងប្រដាប់អាវុធ សង្ឃឹមថាមិនទៅការពារ រួមគំនិតឃុបឃិតជាមួយអ្នកប្រព្រឹត្តល្មើសច្បាប់ មានការឆក់ ដាក់ថ្នាំ និងឧបករណ៍ខុសច្បាប់ទៅចាប់ត្រីផងដែរ។
ម្យ៉ាងការធ្វើបែបនេះ វាមិនអាចធ្វើឱ្យពូជត្រី ប្រភេទត្រីតាមបឹង អូរ ត្រពាំង មិនមាននិរន្តរភាព សម្រាប់អ្នកជំនាន់ក្រោយបានឡើយ ផ្ទុយមកវិញមានតែធ្វើឱ្យខ្លួនឯងវិនាសតែប៉ុណ្ណោះ៕
