ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ មិនតម្រូវឲ្យកសិដ្ឋាន ដាំដំណាំទាំងអស់ មកចុះបញ្ជីនៅក្រសួងដើម្បីទទួលបានសិទ្ធនាំចេញនោះទេគឺតម្រូវឲ្យតែអ្នកចង់នាំចកចេញទៅស្រុកចិនតែប៉ុណ្ណោះ។
សេចក្តីប្រកាសព័ត៌មាន របស់ក្រសួងកសិកម្មចុះថ្ងៃទី១៣ ខែសីហា ឆ្នាំ២០១៨ បានបកស្រាយថា ដើម្បីឲ្យចេកនៅកម្ពុជា អាចធ្វើការនាំចេញ ទៅកាន់ចិនជាផ្លូវការ ក្រសួងនិងស្ថានទូត នៃសាធារណរដ្ឋប្រជាមានិតចិន ដែលតំណាងឲ្យរដ្ឋបាលគយចិន បានចុះហត្ថលេខាលើ ពិធីសារស្តីពី លក្ខខណ្ឌតម្រូវភូតគាមអនាម័យ សម្រាប់ការនាំចេកកម្ពុជា ទៅកាន់ប្រទេសចិន កាលពីថ្ងៃទី២ ខែសីហា ឆ្នាំ២០១៨។
ក្នុងពិធីសារនោះ មិនមានតម្រូវឲ្យម្ចាស់កសិដ្ឋាន ដាំដំណាំឈើហូបផ្លែ ត្រូវចុះបញ្ជីនៅក្រសួងនោះទេ គឺតម្រូវឲ្យតែក្រុមហ៊ុន ឬម្ចាស់កសិដ្ឋានដាំដំណាំចេក ដែលមានបំណងនាំចេញ ទៅកាន់ចិនតែប៉ុណ្ណោះ មកចុះបញ្ជីរជាផ្លូវការនៅក្រសួង ដើម្បីសមត្ថកិច្ចជំនាញ ការពាររុក្ខជាតិ និងភូតគាមអនាម័យ នៃប្រទេសទាំងពីរពិនិត្យ និងវាយតម្លៃ លើលក្ខណៈបច្ចេកទេស ការគ្រប់គ្រងការដាំដុះ ការវេចខ្ចប់ ឲ្យស្របតាមលក្ខខណ្ឌ តម្រូវភូតគាមអនាម័យ ដូចមានចែងក្នុងការពិធីសារមុន នឹងធ្វើការនាំចេញ”។
នៅថ្ងៃចុះពិធីសារនោះដែរ កម្ពុជាបាននិងកំពុងបន្តស្នើសុំទៅភាគីចិន ឲ្យពិនិត្យលទ្ធភាព និងពន្លឿនការងារបន្ថែម ក្នុងការនាំចូល ផលិតផលកសិកម្ម ចាំបាច់មួយចំនួនទៀត ទៅកាន់ទីផ្សារចិន ដូចជា៖ ផ្លែស្វាយ ផ្លែមៀន (តាង៉ែន) ផ្លែស្រកានាគ ម្រេច ផ្លែដូង និងសំបុកទឹកមាត់ ត្រចៀកកាំ សម្រាប់ធ្វើការនាំចេញ ទៅចិនជាបន្តទៀត។កាបកស្រាយរបស់ក្រសួងកសិកម្មនេះ បន្ទាប់ពីមានសារព័ត៌មាន ក្នុងស្រុកបានចុះផ្សាយថា ក្រសួងប្រកាសឲ្យកសិដ្ឋាន ដាំដំណាំ ឈើហូបផ្លែទាំងអស់ ត្រូវមកចុះបញ្ជីនៅក្រសួង ដែលធ្វើឲ្យមានការភ័ន្តច្រឡំ ពីសាធារណជន។
សូមបញ្ជាក់ថា ផលិតផលកសិកម្មកម្ពុជា បាននាំចេញទៅកាន់ប្រទេសចិន កាលពីឆ្នាំ២០១៧ មានអង្ករជិត ២០០ពាន់តោន ផលិតផលដំឡូងមីក្រៀម និងម្សៅសរុបចំនួន ជាង៥៨ពាន់តោន កៅស៊ូមានចំនួន ៣.៣៤០តោន ស្ករអំពៅមានចំនួន ១៤.៩៤០តោន និងផលិតផលកសិកម្ម មួយចំនួនទៀត។មានការកត់សម្គាល់ដែរថាការបើកទីផ្សារកសិផលរបស់ចិនឲ្យកម្ពុជាគឺក្រោយពីចិនមានសង្គ្រាមពាណិជ្ចកម្មជាមួយអាមេរិកក៏ដូចជាពេលដែលកម្ពុជាប្រឈមុខនិងការដាក់ទណ្ឌកម្មពីសហគមន៍អឺរ៉ុបផងដែរ៕
